Aalisarnermi avataasiortuni pisassiissutit nutaat suliffissanik qulakkeerinnillutillu piginnittuunerup siammasinnerusumik agguarneqarnissaanut tapertaassapput

Aalisarnermi avataasiortuni pisassiissutit, juunip 26-anni 2026 tamanut neqeroorutigineqartut, SiKu Trawl A/S-imut aamma Qeqertalik Seafood A/S-imut tunniunneqassasut Naalakkersuisut aggustip 18-ianni 2026 aalajangerput.

SiKu Trawl A/S-imut Kalaallit Nunaata Kitaani qaleralinnik (PNNP) 2.468,5 tonsinik, saarullinnik 1.950 tonsinik kiisalu nataarnartassanik 166,6 tonsinik pisassiissutit tunniunneqarput. Tunniussinerup siunertaraa aalisarnermi avataasiortumi piginnittuunerup ingerlatseqatigiiffinnut najukkaneersunut amerlanernut siammarnissaa. SiKu Trawl A/S ingerlatseqatigiiffik nutaajuvoq, piginnittunik nutaanik peqarluni pilersinneqartoq, ingerlatseqatigiiffiullu ineriartortitsinissamut pilersaarutaani aamma Kalaallit Nunaata Kujataani Narsamullu aalisarnerup inuussutissarsiornermillu ineriartortitsinermik nukittorsaanissaq immikkut ukkatarineqarpoq.

Neqeroorummut siullermut qinnuteqaatit arfineq-pingasut tiguneqarput, taakkunannga arfinillit piumasaqaatinik naammassinnittutut nalilerneqarput. Naalakkersuisut naliliinerminni SiKu Trawl A/S-ip piginnittunik nutaanik avataasiorluni aalisarnermut ilanngunnera pingaartumik isiginiarpaat, taamaalillunilu Kalaallit Nunaata ataatsimoorussamik aalisarnikkut pisuussutaasa piginnittuunerisa siammasinnerusumik agguarneqarnissaannut tapertaalluni.

Qeqertalik Seafood A/S-imut Kalaallit Nunaata Kitaani qaleralinnik (PNNP) 2.468,5 tonsinik kiisalu Tunumi saarullinnik 5.000 tonsinik pisassiissutit tunniunneqarput. Tunniussinermi Aasianni tunisassiorfimmi sulisoqarnikkut ingerlatsinerullu ingerlaannarnissaa qulakkeernissaa siunertaavoq.

Neqeroorummut aappaanut qinnuteqaatit marluk tiguneqarput, taakkulu tamarmik piumasaqaatinik naammassinnipput. Naalakkersuisut Aasianni ukiumut sulisunik qanoq amerlatigisunik pilersitsisoqarlunilu qulakkeerinnittoqarsinnaanersoq naliliinerminni pingaartumik isiginiarpaat, kiisalu 2026-imi pisassiissutit qanoq annertutigisumik aalisarneqarsinnaanersut aammalu ingerlatseqatigiiffiup tunisassiornermut sulisoqarnermullu pilersaarutaa. Ingerlatseqatigiiffiup pilersaarutaa Aasianni ukiumut sulisunik amerlanerpaanik qulakkeerinnittuunera tunngavigalugu,

Qeqertalik Seafood A/S toqqarneqarpoq. Ingerlatseqatigiiffiup ukiuni qulini aggersuni ukiumut minnerpaamik 54-59-inik sulisunik sulisitsinissani qulakkeerniarmagit, aalisakkat sorliit tunisassiarineqarnersut apeqqutaatinnagu.

Qalerallit 25 procentii Aasianni tulaanneqartussatut piumasaqaataasut ukiuni qulini pisassiissutinit pigisat atuuffianni tamarmi Aasianni tulaanneqassapput. Taamaattumik Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik Aasianni tunisassiornermut sulisoqarnermullu tunngasut ingerlaavartumik malittaralugit malitseqartitsissaaq.

Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg, ima oqaaseqarpoq:
”Naalakkersuisunut aalisarnikkut pisuussutivut ataatsimoorussavut sapinngisamik amerlanerpaanut iluaqutaanissaasa qulakkeernissaat pingaaruteqarpoq. Tunniussinerit marluk aqqutigalugit avataasiorluni aalisarnermi ingerlatseqatigiiffinnik najukkaneersunik nutaanik ilanngussivugut, Aasiannilu suliffissat tunisassiornerlu qulakkeerlugit. Taanna aalisarnermit pissarsiat siammasinnerusumik agguaanneqarnissaannut aammalu Kalaallit Nunaata tamakkerlugu inuussutissarsiornermik ineriartortitsinermik nukittorsaanissamut sulinerput pillugu pingaaruteqartuuvoq.”

Naalakkersuisoqarfiup ingerlatseqatigiiffiit marluullutik neqeroorutinut piumasaqaatinik atugassarititaasunillu naammassinnittuarnissaat ingerlaavartumik malittarissavaa.

Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl

______________________________________________

¹Ukiumut sulisoq ataaseq sapaatit akunneri 52-it, sapaatip akunneranut akunnerit 40-t tunngavigalugit naatsorsorneqartarpoq = akunnerit 2.080-it