Imarisassat tusarnaarlugit atuarlugitMeeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi pisortaq nutaaq
Nassiussisuuvoq: Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik
Helena Lynge Møller ulloq 1. september 2026 naalakkersuisoqarfimmi pisortatut atorfinissaaq, aqutsinermik annertuumik misilittagaqarluni kiisalu qitiusumik allaffeqarfimmik suliassaqarfimmillu ilisimasaqarluarpoq.
Naalakkersuisut aalajangerput Helena Lynge Møller Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi pisortatut 1. september aallarnerfigalugu atorfinitsinniarlugu.
Helena Lynge Møller maj 2026-imiilli naalakkersuisoqarfimmi pisortaagallarpoq. Tamanna sioqqullugu naalakkersuisoqarfiup iluani immikkoortortaqarfimmi pisortaasimavoq, suliniutinut akimortumik ingerlasunut, nakkutiginninnermut kiisalu politikkikkut allaffissornikkullu suliassanut assigiinngitsunut akisussaalluni.
Siusinnerusukkut Helena Lynge Møller Isumaginninnermut Aqutsisoqarfimmi immikkoortortaqarfimmi pisortaasimavoq, nuna tamakkerlugu pinaveersaartitsinermut immikkoortortaqarfik Paarisa akisussaaffigalugu. Tassani sulisunik aningaasaqarnernullu aqutsinermut akisussaaffeqarsimavoq kiisalu Naalakkersuisut politikkikkut pingaarnersiugaat suliniutaasalu atuutsinneqarnissaat akisussaaffigisimallugit.
Helena Lynge Møller Ilisimatusarfimmi inuiaqatigiilerinermi kandidatitut ilinniagaqarsimavoq, kiisalu aqutsinermut diplomuddannelse naammassisimallugu.
"Helena naalakkersuisoqarfimmi pisortatut atorfeqarnissamik akuersimmat assut nuannaarutigaara. Naalakkersuisoqarfiup suliaanik aamma suliassaqarfimmik ilisimasaqarluarpoq, naalakkersuisoqarfimmilu pisortaagallarnerminiilli aqutsinermik nukittuumik piginnaasaqarnini takutereerlugu. Suliassaq naammassisinnaagaa tamakkiisumik tatigaara, suleqatigiinnerpullu pitsaasoq ingerlaqqinnissaa qilanaaralugu."
Taamatut oqaaseqarpoq Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen.
Attavissaq
Sukumiisumik paasisaqarusukkuit naalakkersuisup allattaa Paarna Deemand Christiansen e-mailikkut padc@nanoq.gl imaluunniit oqarasuaatikkut: +299 24 79 51 attavigiuk.