Imarisassat tusarnaarlugit atuarlugitAalisarneq pillugu Savalimmiullu nutaamik sinaakkutaasumik isumaqatigiissusiorneq
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Kalaallit Nunaata Savalimmiullu ulloq 26. juuni 2026-mi atsioqatigiissutigaat aalisarneq pillugu sinaakkutaasumik isumaqatigiissut nutartigaq. Taassuma taarsissavaa aalisarneq pillugu sinaakkutaasumik 1997-imili isumaqatigiissutaasimasoq.
Sinaakkutaasumik isumaqatigiissutip nutarterneqarnissaa illuatungeriit tamarmik kissaatigisimavaat, 1997-ip kingorna aalisarneq pillugu suleqatigiinnerup ineriartorsimaneranut tulluarsarusullugu aamma siunissami suleqatigiinnissap ineriartorteqqinnissaanut tunngavissanut sinaakkutissat pilersinniarlugit. Suliaq aallarnisarneqarpoq nutarsaasoqarnissaanik suleqatigiittoqarnissaanillu Naalakkersuisooqatigiinniit kissaatigineqareersorlu. Aalisarneq inuussutissarsiornermut, aningaasarsiornermut inuiaqatigiinnullu Kalaallit Nunaanni Savalimmiunilu pingaarutilerujussuuvoq, taamaammat isumatusaarnerussaaq ilinniarfigeqatigiinnissaq kiisalu oqartussaasut akornini nakkutilliisoqarneq, ilisimatusarneq inuussutissarsiornerlu pillugit suleqatigiinnerup ineriartortinnissaa.
Aalisarnermut, Piniarnermut, Nunalerinermut Imminullu Pilersornermut Naalakkersuisoq Peter Borg sinaakkutaasumik isumaqatigiissutip atsiorneranut atatillugu ima oqaaseqarpoq: ”Savalimmiuni suleqatima tikeraarnissaa qilanaarisimavara taamatullu Kalaallit Nunaata Savalimmiullu akornanni aalisarnerup iluani suleqatigiinnissaq pillugu sinaakkutaasumik isumaqatigiissutip nutartikkap atsiornissaa. Aalisarnerup iluani Savalimmiut suleqatissaavoq pingaarutilik, pisassiissutissanik taartigiittaratta inuussutissarsiornerullu iluani suleqatigiittarluta, aamma nunap immikkoortuini nunallu tamalaat akornanni. Taamaattumik pingaartuuvoq suleqatigiinnerup nutarternissaa, siunissami attanneqarsinnaasumik. Qilanaaraara sinaakkutaasumik isumaqatigiissutip nutaap iluani suleqatigiinnitta ineriartorteqqinnissaa.”
Nunanut allanut Aalisarnermullu Naalakkersuisoq Bárdur á Steig Nielsen sinaakkutaasumik isumaqatigiissutip atsiorneranut atatillugu erseqqissaavoq:
”Aalisarneq pillugu suleqatigiinneq Savalimmiut Kalaallillu Nunaata akornanni atuuttoq sivisuumik ileqquusimavoq pingaaruteqaqalunilu. Sinaakkutaasumik isumaqatigiissutip nutarterneqarnerata uppernarsarpaa nunat suli piumassuseqartut aalisarnerup iluani suleqatigiinnerminnik nakussassaassallutik salliutitsissallutillu. Qilanaaraara siunissami suleqatigiinnissamik ineriartortitseqqinnissaq.”
Isumaqatigiissut maanna Savalimmiuni Inatsisartunut akuerisassanngorlugu saqqummiunneqassaaq, tamatumalu kigorna tamanut saqqummiunneqassaaq atortussanngortinneqarlunilu.
Sinaakkutaasumik isumaqatigiissutip atsiorneqarnerata saniatigut isumaqatigiissutaavoq nunani pineqartuni aalisarnermik ilinniartitaanerup sammineqarnissaa periarfissanillu misissuinermut atatillugu tusarniaaffigeqatigiittarnissaq.
Paasissutissat sukumiinerusut pillugit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigineqarsinnaavoq,ugguuna apn@nanoq.gl.