Naalakkersuisut avataani pisassiissutinik neqerooruteqartitsisimanertik atorunnaarsippaat, neqeroortitsinernillu nutaanik marlunnik saqqummiussillutik

Naalakkersuisut 2025-mi Kitaani qaleralinnut, saarullinnut nataarnanullu imartani aalisarnissamut pisassiissutinik ingerlatsisunut nutaanut neqerooruteqarput, tassungalu atatillugu piumasaqaatit atugassarititaasullu arlallit aalajangersarlugit. Neqeroortitsinermi qaleralittassat saarullittassallu ilaasa immikkoortinneqarnissaat, aalisarnerup iluani piginnittuussutsip siaruarterneqarnerunissaa siunniullugu, pingaartumillu inuusuttut aalisartut avataasiorluni aalisarnermi periarfissinneqarnissaat qulakkeernissaa siunertaavoq.

Qinnuteqaatit tamakkerlugit piumasaqaatinik atugassarititaasunillu tunngaveqartut ataatsimut naliliiffigereerlugit, Naalakkersuisut aalajangerput neqeroortitsisimaneq atorunnaarsinneqassasoq, neqeroortitsinissamillu nutartikkamik suliaqartoqassasoq. Atorunnaarsitsinermut tunngaviusut makkuupput:

Piginnittuussutsimik siammarterinnginneq
Qinnuteqartut amerlanerpaartaasa neqeroortitsinermi siunertaasoq naammassisimanngilaat, tassalu piginnittuussutsip siammarternerunissaata qulakkeerneqarnissaa. Qinnuteqartut amerlanerpaartaasa neqerooruteqarnermi piginnittuunerup siammasinnerusumik agguataarneqarneranik qulakkeerinissamik siunertaq naammassinngilaat. Qinnuteqartut amerlanerit ingerlatseqatigiiffiupput piginnittui ikittut, tamannalu inuiaqatigiinnit pigineqartut naleqartut inunnut ikittuinnarnut nuunneqarnissaannik kinguneqarsinnaavoq. Piginnittuunerup ilumut siammasissumik agguataarneqarnissaa qulakkeerniarlugu Naalakkersuisut qinnuteqartunik piginnittui amerlanerusunik piginnittullu siammasinnerusumik katitigaanerannik kissaateqarput.
Neqeroortitsinermi pisassat tamakkerniarlugit qinnuteqaatit
Pisassanik neqeroortitsinermi qinnuteqartut pisassat tamakkerlugit pissarsiarerusussimavaat, naak neqeroortitsinermi pisassiissutissat ingerlatseqatigiiffinnut marluk angullugit agguaanneqarnissaat pineqaraluartoq. Taamaaliornikkut aamma avataasiorluni aalisarnermi piginnittuussuseq siammarterneqarsinnaammat.
Nunani allamiunik pigineqartunik aalisariutinik atuinissamik pilersaarutit
Qinnuteqartut amerlanerpaartaasa namminneq aalisariummik pisinissamik tungaanut nunani allamiut pigisaannik aalisariutinik atuinissaq pilersaarutigisimavaat. Kisianni aningaasaqarnikkut inuiaqatigiinnullu iluaqutissatut pitsaanerpaavoq kalaallit aalisariutaasa pioreersut atorneqanngitsut aalisarnikkut pisinnaasaasa atorneqarnissaat. Aammattaaq nunani allamiut pigisaannik atuineq nunani allamiut sunniuteqarnerannik annertusaaqataasinnaavoq, tamannalu aalisarneq pillugu inatsimmi tunngaviusumik aalajangersakkanut naapertuutinngilaq.
Aasianni suliffissaqartitsinerup qulakkeerneqarnissaannik kissaateqarneq
Naalakkersuisunit pisassiissutissat ilaasa Aasianni suliffissanik qulakkeerinninnermut atorneqarnissaat kissaataavoq. Tamanna aalajangersimaqqissaartunik piumasaqaatitalinnik nutaamik neqeroortitsinissaq piumasaqaataavoq.
Allaffissornikkut maleruagassanut tunngasut
Ammasumik ingerlatsinissap, naligiissitsinerup aalajangernissamullu tunngavissat patajaatsuunissaat qulakkeerniarlugit pisariaqarpoq neqeroortitsisimanerup atuuttup atorunnaarsinnissaa nutaamillu neqeroortitsisoqarnissaa, piumasaqaatinik atugassarititaasunillu nutaanik imaqartumik.

Taamaalilluni 2025-mi neqeroortitsisimaneq atorunnaarsinneqarpoq, qinnuteqarsimasullu tamarmik tamatuminnga nalunaarfigineqassapput.

Siuliani taakkartorneqartut tunuliaqutaralugit Naalakkersuisut neqeroortitsinerit nutaat marluk avataani pisassanut tunngasut assigiinngitsunik piumasaqaatitaqarlutillu atugassaqartitsisut ingerlattussanngorpaat.

Neqeroortitsineq 1 Kitaani aalisartunut nutaanut avataasiorluni qalerallit 2.468,5 tonsit, (PNNP), saarulliit 1.950 tonsit nataarnallu 166,6 tonsit

Piumasaqaatit makkuupput:

Qinnuteqarfissap nalaani ingerlatseqatigiiffimmik pilersitsisoqareer-simasussaavoq, 100 %-imik kalaallinit pigineqartumik.
Aalisartut nutaat ullumikkut avataasiorluni aalisarnermi peqataanngitsut piginnittuussapput.
Aalisartut sinerissap qanittuani aalisarnermik ingerlataqareer-suusinnaapput, tassunga ilanngullugit aalisartut 2024 tikillugu sinerissamut qanittumi raajarniartuusimasut.
Ingerlatseqatigiiffiup angallatillu aningaasalersugaanerinut uppernar-saatit kakkiunneqassapput ilanngunneqassallutillu angallatip pisassiis-sutinik atuisussap ingerlanneqarneranut tunngasut, tassunga ilanngullugit paasissutissat angallammik piginnittumut tunngasut imaluunniit pisiariniakkamut tunngasut.
Immikkut ittumik akuersissuteqartoqarneratigut angallammik attartortoqarsinnaavoq, nammineq pigisassamik angallatitaarnissap tungaanut.
Angallammik nunami allamiumit pigineqartumik attartornissaq inerteqqutaavoq.
Kakkiunneqassaaq 2026-mi pisassiissutit 75 %-iisa tamakkerlugit pisarinissaannut pilersaarut.
Kakkiunneqassaaq niuernermut pilersaarut, ukiunut tulliuttunut tallimanut atuuttussaq, tassunga ilanngullugit aallartisarneq angallammillu ingerlatsineq kiisalu qaleralittassiissutit 25 %-iisa tulaassassat sumut tulaassornissaat naatsorsuutigineqarnersoq. Tulaassassat 25 %-imit amerlanerunissaat naatsorsuutigineqarpat tamanna ilanngullugu allanneqassaaq.
Pisassiissutinut qinnuteqaat nassiunneqassaaq, tassunga ilanngullugit paasissutissat angallammut tunngasut, sullissivik.gl-imi qinnuteqarnermi immersugassaq atorlugu: Avataasiorluni aalisarnissamut akuersissummik qinnuteqarit (sullissivik.gl)

Qinnuteqaatinik naliliinissami immikkut pingaartinneqartussaapput piginnittut qanoq amerlatigineri, ingerlatseqatigiiffillu amerlanerpaanik piginnittoqalersinnaasut salliunneqartussaapput. Neqeroortitsinermi atortussat tamakkerlugit uani takukkit

Neqeroortitsineq 2 Kitaani avataasiorluni qaleralittassat (PNNP) 2.468,5 tonsit aamma 2026-mi Tunumi avataasiorluni saarullittassat 5.000 tonsit.

Piumasaqaatit makkuupput:

Aalisartoq nutaaq, tak. PNNP-nalunaarummi § 8, piginnittut ilaat avataasiorluni aalisarnermut akuusinnaammata. Piginnittulli nutaajussapput aamma/imaluunniit soraarnerussutisiaqartarnermut ingerlatseqatigiiffiusinnaavoq, piginnittuussutsip siammarternissaa qulakkeerniarlugu.
Angallat Kalaallit Nunaanneersutut ilisarnaatilik 31. december 2026 nallertinnagu pissarsiarineqareersimasussaavoq, tungaanulli angallammik kalaallinit pigineqartumik attartortoqarsinnaalluni,
2026-mi pisassiissutit tamakkerlugit aalisarnissaannut aalisarnermut pilersaarummik kakkiussisoqassaaq,
avataasiorluni qaleralittassat 25 %-ii tulaassatut tuniniarneqartussat (628 tonsit nalingi) Aasiannut tulaanneqartussaapput aamma
Aasianni ukiumut suliffissat sapinngisamik amerlanerpaat qulakkeerniarneqassapput. Tassunga pilersaarut kakkiunneqassaaq.
Pisassiissutinut qinnuteqaat nassiunneqassaaq, tassunga ilanngullugit paasissutissat angallammut tunngasut, sullissivik.gl-imi qinnuteqarnermi immersugassaq atorlugu: Avataasiorluni aalisarnissamut akuersissummik qinnuteqarit (sullissivik.gl)

Qinnuteqaatinik naliliinermi immikkut pingaartinneqassapput Aasianni sulisorineqarsinnaasut qanoq amerlatigineri kiisalu suliffissaqartitsiniarnerup qanoq iliorluni qulakkeerneqarnissaanut pilersaarut. Pisassiissutissanik agguaassinermi aalajangiisuutinneqartussaavoq Aasianni suliffissaqartitsinerup siunissami qulakkeerneqarnissaa. Qinnuteqaammut atortussat tamakkiisut uani takuneqarsinnaapput

Neqeroortitsisoqassaaq 24. juuli nal. 23.59-ip tungaanut. Tamatuma kingorna qinnuteqaat ilanngussallu tamakkerlutik Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit tiguneqareersimassapput, ugguuna nassiunneqarsimassallutik apn@nanoq.gl imaluunniit Imaneq 1, 3900 Nuuk, Postboks 269-mut.

Neqeroortitsinermi peqataassagaanni atortussani piumasaqaatit atugassarititaasullu tamarmik naammassineqarsimasussaapput.

Paasissutissat sukumiinerusut pillugit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigineqarsinnaavoq, ugguuna apn@nanoq.gl.