Naalakkersuisut NIIK-mut inuillu innarluutillit peqatigiiffiinut aningaasaliissutissanik qulakkeerinnipput

Nunarput Naalagaaffiit Peqatigiit inuit innarluutillit pillugit isumaqatigiissutaannik naammassinnissinnaaqqullugu, Naalakkersuisut inunnut innarluutilinnut tunngasuni kajumissutsimik suliniutitigut pitsanngorsaarusupput. Taamaammat tamatumunnga tunngatillugu aningaasanik NIIK-p inuillu innarluutillit peqatigiiffiisa suliaminnut ingerlataminnullu atugassaminnik aningaasaliiffigineqarnissamik qinnuteqarfigisinnaasaannik immikkoortitsipput. 

”Inuit innarluutillit inuit allat assigalugit inuunermi pitsaasunik atugaqarnissamut tunngaviusumik pisinnaatitaaffeqarput. Inuit innarluutillit inuiaqatigiinni naligiimmik peqataatinneqarsinnaaqqullugit, peqatigiiffiit nammineq isummersuutaasa tusaaneqarnissaat pingaaruteqarpoq. Taamaammat tassa NIIK-p inuillu innarluutillit peqatigiiffiisa naapeqatigiinnissanut, aaqqissuussanut inunnut innarluutilinnut tunngasuni peqataanissanut inuiaqatigiinnilu oqalliseqataanikkut isummersoqataanissanut atugassaminnik aningaasaliiffigineqarnissamik qinnuteqarnissamut 2026-mi aamma periarfissaqartinneqarnerat nuannaarutissaavoq,” Peqqissutsimut Inunnullu Innarluutilinnut Naalakkersuisoq Anna Wangenheim oqarpoq. 

Inuit innarluutillit peqatigiiffii ilaatigut makkuupput: 

• Inooqat, Angajoqqaat ineriartornermigut akornutilimmik meerallit peqatigiiffiat
• ISI, Nunatsinni inuit tappiitsut isigiarsuttullu peqatigiiffiat
• Sugisaq, Inuit isumaliortaatsimikkut nappaatillit sugisaasalu peqatigiiffiat
• Kalaallit Tusilartut Kattuffiat (KTK)
• Landsforeningen Autisme – Kalaallit Nunaat
• ADHD Kalaallit Nunaat
• KNIPK, Kalaallit Nunaanni Innarluutillit Piginnaanikittullu Kattuffiat nunatsinni illoqarfinni arlalinni immikkoortortalik
• NIIK, Nunatsinni Inuit Innarluutillit Kattuffiat ilaasortami soqutigisaannik suliaqarfiullunilu inuit innarluutillit peqatigiiffiinut ataasiakkaanut ikiorneqarnissamik pisariaqartitsisunut allaffissornikkut ikiuullunilu siunnersuisarfiuvoq.

Nunarput Naalagaaffiit Peqatigiit inuit innarluutillit pillugit isumaqatigiissutaannik naammassinninnissamut atsiornikuuvoq. Danmark, Kalaallit Nunaat Savalimmiullu Naalagaaffiit Peqatigiit inuit innarluutillit pillugit ataatsimiititaliaannit nunani pingasuni taakkunani inuit innarluutillit atugaannut tunngasutigut 2024-mi aggustimi nalilersorneqarput.

Inuit innarluutillit peqatigiiffiisalu inunnut innarluutilinnut tunngasuni inatsisiliornerni politikkikkullu suliniuteqarnerni aaqqissuussamik peqataatinneqartannginnerat ernumanartutut, Naalagaaffiit Peqatigiit inuit innarluutillit pillugit ataatsimiititaliaata tamatumunnga tunngatillugu naliliinermi kingorna inaarutaasumik nalunaarusiamini oqaatigaa. Aningaasaliissutissatut aningaasanut inatsimmut immikkoortitat inuit innarluutillit peqatigiiffiisa tamatuma iliuuseqarfiginissaanik suliniutinik aallartitsinissaannut periarfissiisussaassapput.

Aningaasaliissutissatut immikkoortinneqartut 1 mio. kr.-upput, taakkualu affaat 0,5 mio. kr.-usut NIIK-mit qinnuteqarfigineqarsinnaasunngorlugit sinnerilu aamma 0,5 mio. kr.-usut inuit innarluutillit peqatigiiffiinit qinnuteqarfigineqarsinnaasunngorlugit avinneqarput.

Paasisaqarnerorusukkaanni Peqqissutsimut Inunnullu Innarluutilinnut Naalakkersuisoqarfik attavigineqarsinnaavoq. E-maili: pn@nanoq.gl, oqarasuaat +299 34 50 00.