Politikkikkut isumaqatigiissut Peqqinnissaqarfimmut 2026-mi 185 millionit koruuninik aningaasaliinertaqarpoq

Naalakkersuisut Peqqinnissaqarfimmi 2026-mi pitsanngorsaangaatsiarnissamik qulakkeerinnipput. Aningaasaqarnermut Akileraartarnermullu Naalakkersuisoq danskillu aningaasaqarnermut ministeriat Kalaallit Nunaata imminut napatittup pilersinnissaa pillugu 16. septembari 2025-mi tunngaviusumik isumaqatigiissummut uiggiutigalugu peqqissutsimut tunngatillugu isumaqatigiissutip immikkoortuanik taallugu Peqqinnissaqarfimmut 2026-mi saniatigut 185 mio. kr.-nit missaannik aningaasaliinertaqartumik 9. februaari 2026-mi isumaqatigiissuteqarput.

”Peqqissutsimut tunngatillugu isumaqatigiissutip immikkoortuanik taallugu isumaqatigiissummi aningaasaliissutit Peqqinnissaqarfiup aningaasaqarniarnerata patajaallisarnissaanut siunissarlu ungasinnerusoq eqqarsaatigalugu ineriartortinneqarnissaanut qulakkeerinninnissamut atoriaannanngoratsigit nuannaarutigaara. Aningaasaliissutit taakku nunatsinni innuttaasunut tamanut iluaqutaasussamik ullutsinnut naleqquttunik pitsaalluinnartunillu Peqqinnissaqarfimmi atortorissaarutissanik atortussanillu pisiortornissamut peqqinnissakkullu sullissinikkut naammassisaqarnerunissamut periarfissaqalersitsipput”, Peqqissutsimut inunnullu Innarluutilinnut Naalakkersuisoq Anna Wangenheim oqarpoq.

Isumaqatigiissut aningaasaliissutillu 2026-muinnaq ukioq ikaarsaariarfittut isigineqartumut tunngapput. Aningaasaliissutinilli agguaanerit aningaasaqarniarnikkut ukiunut tulliuttunut arlaliusunut missingersuutit aallaavigalugit pipput, taakkualu tassa immikkoortortanut tallimanut napparsimasunik misissuinermik katsorsaanermillu suliaqarfiusut, Peqqinnissaqarfimmilu nutarterinissaq sanaartortitsinissallu kiisalu Peqqinnissaqarfimmi arlalitsigut ineriartortitsinissaq tapertariisinnerisigut pingaarnersiuinikkut atugassatut agguarneqassapput.

Peqqinnissaqarfimmi nutarterineq sanaartortitsinissarlu
Peqqinnissaqarfiup illuutaanut atortuinullu tunngasuni atortorissaarutinik ullutsinnut naleqquttunik pisiortornissamik, napparsimasut isumannaatsuunerulernissaannik nunatsinnilu napparsimasunik peqqinnissakkut sullisseriaatsinik patajaallisaanerunissamik qulakkeerinninnissamut 2026-mi atugassatut katillugit 60 mio. kr.-t immikkoortinneqarput.

• Nunatsinni atortorissaarutit nappaatinik assiliilluni suussusersiuutaasut ullutsinnut naleqquttunik kingoraarserneqassapput, Peqqinnissaqarfimmi nappaatinik pitsaanerusumik pilertornerusumillu suussusersiueriaaseqalersinnaaqqullugu, napparsimasunik angallassinissat ikinnerpaaffissaaniilersinniarlugit qarasaasiakkullu eqaannerusumik nakorsiartitseriaaseqalersinnaaqqullugu. Tamatumunnga 2026-mi atugassatut 15 mio. kr.-t immikkoortinneqarput.
• Dronning Ingridip Napparsimmavissuani ukiuni arlalinni nutarterineq iluarsartuusseqqinnerlu napparsimmavimmi ingerlatsinermut tunngasuni akimmiffiit anigorsinnaaqqullugit nanginneqassapput. Tamatumunnga 2026-mi atugassatut katillugit 35. mio. kr.-t immikkoortinneqarput.
• Napparsimmaviit assigiissaartumik inissaqartitsisarnissaat pillugu iluarsartuussamik pilersaarusiorneqassaaq, napparsimasut qanigisaallu taavalu nunap immikkoortuini qitiusumik napparsimmavinnut sivikitsumik piffissaligaasumik suliartortut inissaqartitaagallarnissamik pisariaqartitsisut amerligaluttuinnarnerat eqqarsaatigalugu. Tamatumunnga 2026-mi atugassatut 10 mio. kr.-t immikkoortinneqarput.
• Nunatsinni portørit aalaakkaasumik tutsuiginartumillu imminnut attaveqaqatigeeriaannaaginnarsinnaaqqullugit radionik digitaliusunik nutaanik pisiortortoqassaaq.
  
  

Missingersuutini oqimaaqatigiissitsineq pilersaarusiorluarnerunerlu
Peqqinnissaqarfiup missingersuutaani oqimaaqatigiissitsinissamik qulakkeerinninnissamut 2026-mi atugassatut 60 mio. kr.-t paarlatsinik sulisoqarnermut aningaasartuuteqarneruleraluttuinnarnermik, nakorsaatinut aningaasartuuteqarnerunermik taavalu sulisussarsiornikkut ajornartorsiuteqarnermik ingammik pissuteqartumik sippuiffiussangatinneqartut matussusernissaannut immikkoortinneqarput. Tamatumunnga atatillugu sulisunik isumalluutinillu aalakkaanerusumik naatsorsuutigineqarsinnaasumillu atorluaanissamik qulakkeerinninnissaq anguniarlugu, Peqqinnissaqarfimmi pilersaarusiorluarnerunissamut, ingerlatsinermut aningaasaqarnermillu aqutsinermut atugassatut 8 mio. kr.-t immikkoortinneqarput.

Peqqissutsimut tunngatillugu 2026-mi isumaqatigiissutissamut sillimmatitut aningaasaliissutit
Peqqissutsimut tunngatillugu 2026-mi nutaamik annertusisamillu isumaqatiginninniarnissanut tamatumalu aningaasartuuteqarfiunerorataannaanissaanut atugassatut 20 mio. kr.-t sillimmatitut immikkoortinneqarput. Sillimmatitut aningaasaliissutaasut peqqissutsimut tunngatillugu isumaqatigiissummi 2023-meersumi sammisanik anguniakkanillu aallaavilimmik peqqissutsimut tunngatillugu 2026-mi nutaamik annertusisamillu isumaqatiginninniarnissani aningaasaqarnermut tunngasutigut tunngaviullutillu peqqinnissamut tunngasutigut sullissinermi anguniakkat aningaasaqarnikkullu pingaarnersiukkat ataqatigiissarneqarnissaannut qularnaveeqqutaassapput.

Danmarkimi nakorsanit immikkut ilisimasalinnit katsorsarneqarnissamut periarfissanik pitsanngorsaaniarneq
Immikkut ilisimasalinnit katsorsarneqarnissamut periarfissanik pitsanngorsaaniarnermut, tarnikkut napparsimasunut amerlanerusunik inissaqartitsinissamut, katsorsartikkiartornissamut utaqqisutut allattorsimasut ikilinissaannut kiisalu napparsimasunik angallassinernut unitsitsisarnernullu saniatigut aningaasartuutinut matussusiinissanut 2026-mi atugassatut 37 mio. kr.-t immikkoortinneqarput. Tassa Kalaallit Nunaanni Danmarkimilu innuttaasut peqqinnissakkut sullinneqarnissamut neqeroorutinut tunngasutigut naligiissitaanerulernissaat anguniagaavoq. Killigeqqusatut inaarutaasumik aalajangiussat Danmarkimi peqqissutsimut ministerilersussaq peqatigalugu politikkikkut oqallisiginerisigut naleqqussarneqarsinnaapput.

Danmarkimi nunap immikkoortuinik nikittaannermik aaqqissuussinermik nutaanik isumaqatigiissuteqarneq
Naalakkersuisup Anna Wangenheimip Danmarkimilu nunamut namminermut peqqissutsimullu ministeriusimasup Sophie Løhdep peqqissutsimut tunngatillugu 23. oktobari 2025-mi isumaqatigiissutaannut uiggiutigalugu peqqissutsimut tunngatillugu isumaqatigiissutip immikkoortuanik taallugu 9. februaari 2026-mi isumaqatigiissuteqarnikkut Kalaallit Nunaanni Peqqinnissaqarfik Danmarkimilu napparsimmaviit akornanni nikittaannermik aaqqissuussinermik nutaanik isumaqatigiissuteqarnissanut atugassatut danskit aningaasaqarnermut inatsisaanni immikkoortinneqarput. Tamatumani aaqqissuussineq Danmarkimi nunap immikkoortuini peqqinnissamut tunngasutigut sulisut Kalaallit Nunaannukarlutik sivikitsumik sivisuumilluunniit sulisarnissaannut tunngavoq. Tamatumunnga 2026-mi atugassatut 10 mio. kr.-t 15 mio. kr.-nillu 2027-imiit 2029-mut ukiut tamaasa atugassatut nutaanik isumaqatigiissuteqarnikkut immikkoortinneqarput.



Paasisaqarnerorusukkaanni Peqqissutsimut inunnullu Innarluutilinnut Naalakkersuisoqarfik attavigineqarsinnaavoq. E-maili: pn@nanoq.gl, oqarasuaat +299 34 50 00.