Imarisassat tusarnaarlugit atuarlugit§ 21-Isumalioqatigiissitaq inissititerpoq sulilerlunilu
Nassiussisuuvoq: Naalakkersuisut Siulittaasuata Naalakkersuisoqarfia
§ 21-Isumalioqatigiissitaq saamerlerniit: Ole Spiermann, eqqartuussissuserisoq ilisimatuutullu sulisimasoq, Gudmundur Alfredsson, ilisimatooq soraarneq, Hans Peder Kirkegaard, ph.d.-tut ilisimatusartoq aamma Stefan Krehbiel, inatsisileriffimmi pisortaq, Namminersorlutik Oqartussat. (Asseq: Inatsit Tunngaviusussamut immikkoortortaqarfik)
§ 21-Isumalioqatigiissitaq marlunnik ilaasortaqartoq marlunnillu taaseqataasinnaanngitsunik ilaasortaqartoq ullumi 2026-mi marsip 18-iani inissititerluni ataatsimiippoq. Isumalioqatigiissitami ilaasortat ukiumi ataatsimi sulereernerup kingorna nunatta namminersortunngoriartornerani suut aqqusaarneqarnissaannik kalaallillu inuiattut qanoq piumaffigineqarnissaannik inatsisitigut tunngavilimmik nalunaajaasiartik tunniutissavaat.
§ 21-Isumalioqatigiissitami eqqartuussissuserisoq ilisimatuutullu atorfeqarsimasoq Ole Spiermann aamma ilisimatooq soraarneq Gudmundur Alfredsson naligiissutut ilaasortaalerput. Marluullutik Kalaallit Nunaanni Namminersorneq pillugu Inatsisip ilusilersorneqarnerani Kalaallit-Qallunaallu Namminersorneq pillugu Isumalioqatigiissitaanni kalaallit tungaanni suleqataasimapput, marluullutillu Namminersorneq pillugu inatsimmi § 21 pillugu immikkut ilisimasalittut suleqatigiissitami missingiummik suliaqartumi suleqataasimapput.
§ 21-Isumalioqatigiissitaq pingaarnertut Namminersorneq pillugu inatsimmi § 21-mik – Kalaallit Nunaata namminiilivinnissamut periarfissaanik - qulaajaasussaq taasisinnaatitaanngitsunik marlunnik aamma ilaasortaqarpoq; ph.d-inngorniarluni ilisimatusartoq Hans Peder Kirkegaard aamma Namminersorlutik Oqartussani inatsisileriffimmi pisortaq Stefan Krehbiel.
- Isumalioqatigiissitaq imaannaanngitsunik suliakkerneqarpoq, suliaqarfigilernissaannullu qilanaarpugut. Kalaallit Nunaata siunissaanut pingaaruteqartussanik inatsisilerinermik suliaqaqqinnissarput tanngassimaarutigaarput, aammalu Inatsisartut Naalakkersuisullu aalajangigaat aallaavigalugit qulaajaalernissarput qilanaaraarput, Ole Spiermann inissititerluni ataatsimiinnermi aqutsisuusoq oqarpoq.
Suliassat aalajangersimasut
Isumalioqatigiissitap ukiup ataatsip ingerlanerani sulinerani inatsisitigut tunngaveqartumik Namminersorneq pillugu inatsimmi § 21-p - Kalaallit Nunaata namminiilivinnissaanut tunngasup - atuutilersinneqarnissaa pillugu nalunaajaasiussapput. Isumalioqatigiissitamilu aalajangersimasutut suliarineqassapput:
1) Namminersorneq pillugu Inatsimmi § 21-mi aalajangersakkap atuutsilersinneqarnerata qanoq ingerlanissaanik qulaajaaneq, aamma aalajangersakkap qanoq naleqqunnerpaamik atuutsilernissaanut, piginnaatitsissutip atorluarsinnaassusissaanut tunngasut eqqarsaatigalugit
2) Namminersortunngornissaq pillugu isumasiuiffiusumik inuiannik taasititsinermi kiisalu naalagaaffinngornermi suut inatsisitigut toqqammavigineqarnissaannik naliliineq
3) Inatsimmut tunngaviusumut missingiusiap piusup inatsisilerinikkut aaqqissugaanikkullu naliliiffigineqarnera, aamma naalagaaffinngornissamut sulianut tunngatillugu
4) Naleqqussaanissamut aalajangersagaq, suliap ingerlanerani misissortariaqartunik allanik takkuttoqassagaluarpat aammalu inatsisinut tunngassuteqartunik pisariaqartunik akissutissaqartariaqassappat, apeqqutinik sulinermut iluaqutaasussatut nalilerneqartuni attuumassuteqartunik allanik ilanngussinissamut atorneqarsinnaasoq.
Politikki tunuliaqutarinagu isumalioqatigiissitaq
§ 21-Isumalioqatigiissitaq taakkununngalu suliakkiissut 2 millioner koruuninik atorneqartussanik akuersissuteqarfiusoq Naalakkersuisut 2025-mi oktobarip 31-ani ataatsimiinnerminni akuersissutigaat.
§ 21-Isumalioqatigiissitaq Inatsisartut kissaateqarnerat naapertorlugu pilersinneqarpoq, Isumalioqatigiissitarlu piginnaasat aallaavigalugit politikkilu tunuliaqutarinagu isumalioqatigiissitassasoq Inatsisartut inersuarmi oqallinnerminni kissaatigaat.
§ 21-Isumalioqatigiissitami ilaasortat inatsiseqarnikkut ikiortissamik imaluunniit immikkut ilisimasalimmik avataaneersumik isumalioqatigiissitamit ikiortissarsiortoqassanersoq namminneq aalajangissavaat.
Inatsit tunngaviusussamut immikkoortortaqarfik § 21-Isumalioqatigiissitamut allatseqarfiussaaq.
Annertunerusunik paasisaqarusuttut § 21-Isumalioqatigiissitap oqarasuaataanut 34 28 54-imut sianerlutik paasiniaasinnaapput.