AtuartigukQeqertarsuarmi Peqqissaaviup Utoqqaat Illuatalu suleqatigiinnissamik isumaqatigiissuteqarnissaat sulissutigineqalertoq
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Peqqissutsimut inunnullu Innarluutilinnut Naalakkersuisup Anna Wangenheimip Kommune Qeqertallillu borgmesteriata Simigaq Heilmannip Qeqertarsuarmi Peqqissaaviup Utoqqaat Illuatalu pisortatigoortumik suleqatigiinnissamik isumaqatigiissusiornissaasa sulissutigineqalernera erseqqissarniarlugu tamatumunnga tunngatillugu qanoq pilersaarnermik nalunaarut ullumi atsiorpaat.
Patajaannerusumik ataqatigiissaarinissaq Qeqertarsuarmilu innuttaasunut neqeroorutinik suli pitsaanerusumik ataqatigiissaarinissamik qulakkeerinninnissaq suleqatigiinnissamik isumaqatigiissuteqalersaarnermi siunertaavoq. Atsioqatigiit suliatigut piginnaanngorsaanermik, toqqissisimatitsinissamik aalajaatsuunissamillu paaqqutarinniffinni peqqissaavimmilu suliniutinut tapersiisussamik najoqqutassioqatigiikkusunnertik qanoq pilersaarnermik nalunaaruteqarnikkut ersersippaat.
Qanoq pilersaarnermik nalunaarutaat anguniagaqaqatigiinnermik Qeqertarsuarmilu innuttaasunut iluaqutaasussamik patajaannerusumik ileqqussanngortitassamillu suleqatigiinnerunissamik anguniaqarnermik ersersitsivoq.
"Illoqarfinni minnerni immikkoortortaqarfiit suleqatigiinnerulernissaannut patajaallisaanerusariaqarlutalu immikkoortortaqarfinnik allanik suleqateqanngippallaarnermiit ilorraap tungaanut ingerlasariaqarpugut. Peqqinnissaqarfimmi kommunimilu sulisut suliatigut piginnaasaasa eqqumaffiginerunerisigut, neqeroorutinik innuttaasunut iluaqutaasussamik kinguneqarluartussamillu ataqatigiissaarilluarnerulersinnaavugut", Peqqissutsimut inunnullu Innarluutilinnut Naalakkersuisoq oqarpoq.
Kommune Qeqertalimmi borgmesteria, Simigaq Heilmann imatut nagippoq; ”Nuannaarutigaara Peqqissutsimut Inunnullu Innarluutilinnut Naalakkersuisoq peqatigalugu akisussaaffimmik tiguseqatigiikkatta, utoqqartatta isumassorneqarneranni atugassarititatta illoqarfinnilu minnerusuni atugassarititat tamanut toqqissisimanartuunissaannut pitsaanerulersinnissaannullu suleqatigiissalluta. Siunissaq ornitarput ersarippoq, isumassuisinnaasut amerliartunngillat, inuiaqatigiinni ikittunnguani akisussaasut suleqatigiinnermik aallaaveqarunik nukittunerussapput.
Paasisaqarnerorusukkaanni allalluni attavigineqarsinnaapput, naalakkersuisup allattaa Helene G. Kristiansen, hgkr@nanoq.gl imaluunniit Peqqissutsimut inunnullu Innarluutilinnut Naalakkersuisoqarfik, pn@nanoq.gl, oqarasuaat +299 34 50 00.