Isumaqatigiissitsiniarnermut suliami Greenland Minerals-imit suliakkiissutigineqartumi suliamut aningaasartuutit Naalakkersuisunut tunniunneqartussanngorput

Suliami Naalakkersuisut suliakkiissutigalugit Greenland Minerals A/S-imit suliakkiissutigineqartumi suliassamut aningaasartuutinik tunniussinissaq pillugu isumaqatigiissitsiniarnermut eqqartuussivik ulloq 9. marts 2026 aalajangiivoq. 

Isumaqatigiissitsiniarnermut eqqartuussivik suliassap suliarinissaanut piginnaatitaanngitsoq pillugu isumaqatigiissitsiniarnermut eqqartuussiviup 2025-mi oktobarimi aalajangiineranut nangissutigalugu aalajangiineq pivoq.

Naalakkersuisut suliassamut aningaasartuutaasa annertunerpaartai Greenland Minerals A/S-ip matussusissagai pillugu Naalakkersuisut piumasarisaannut naapertuuttumik isumaqatigiissitsiniarnermut eqqartuussivik aalajangiivoq.

Isumaqatigiissitsiniarnermut eqqartuussiviup aalajangiinera naapertorlugu, isumaqatigiissitsiniarnermut eqqartuussiviup piginnaatitaanera pillugu apeqqummut Naalakkersuisut aningaasartuutigisimasaasa 90 %-ii (14.354.937,07 koruunit) ullut 30-it iluanni Greenland Minerals A/S-ip akilissavai. Aningaasartai naliliinikkut aalajangersarneqarput. 

Eqqartuussissuserisumut aningaasartuutit, suliassap ingerlanneqarneranut aningaasartuutit (eqqartuussisut sulisullu allat akissarsiassai, ininik attartorneq, nerisaqarneq il.il.), kiisalu ilaatigut pappialanut nuutitsinermut, assartuussinermut nutserinernullu aningaasartuutit, aningaasartuutini matussuserneqarput.

Taarsiinissaq pillugu apeqqummut atatillugu Naalakkersuisut aningaasartuutaannut tunngatillugu, isumaqatigiissitsiniarnermut eqqartuussiviup apeqqut taanna suliarissaneraa aalajangerneqarpat, suliassamut aningaasartuutit agguarneqarnissaat pillugu aalajangiisoqassaaq.

Suliassamut aningaasartuutit pillugit aalajangiinermi isumaqatigiissitsiniarnermut suliaq 2022-mi martsimiilli ingerlasimasoq, maannamuugallartoq naggaserneqarpoq. Taamaattoq eqqartuussiviit taarsiisoqassappat tamatuma annertussusilerneqarnissaa pillugu apeqqut isumaqatigiissitsiniarnermut eqqartuussivimmut innersuutissapassuk, isumaqatigiissitsiniarnermut eqqartuussivimmi suli kinguneqartitsisoqarsinnaavoq. Taamaattoq taarsiisoqassanersoq pillugu apeqqut eqqartuussivinni aalajangerneqassasoq naatsorsuutigineqarpoq, taamaattumillu suliamut aningaasartuutit sinneri pillugit apeqqutip saniatigut, isumaqatigiissitsiniarnermi suliami annertunerusunik pisoqaqqinnissaa Naalakkersuisut naatsorsuutiginngilaat. 

Isumaqatigiissitsiniarnermi eqqartuussivimmi suliamut aningaasartuutit pillugit aalajangiisoqarnera isumaqanngilaq aamma Greenland Minerals A/S-ip akornanni suliassaq naammassisoq. Suliassaq Nunatta Eqqartuussiviani ingerlaannarpoq, tassani suliassami apeqqutip pingaarnerup suliarineqarnissaa qaqugu aallartissanersoq suli ulluliisoqarani. 

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq: 

"Aalajangiineq, ukiarmi isumaqatigiissitsiniarnermut eqqartuussiviup piginnaatitaanera pillugu apeqqummi taperserneqarnitta pissusissamisoortumik malitsigisaa, Naalakkersuisut naammagisimaartorujussuuaat. Isumaqarpunga eqqortumik aalajangiinissaq, Naalakkersuisut suliap ingerlanera tamaat aalajangiusimasimasaat, taannatuaasoq, tassalu suliassaq eqqartuussivinni ingerlanneqartussaasoq aammalu isumaqatigiissitsiniarnermut eqqartuussivimmi ingerlanneqarsinnaanngitsoq. Aammalu suliakkiisumit suliassamik siunissaqanngitsumik suliakkiissuteqartumit aningaasartuuteqarnissamik pinngitsaalineqarsinnaaneq eqqortuusinnaanngilaq. Suliassap illuatungiusumut, aningaasat Naalakkersuisunut aalajangiinermi tunniunneqartussatut aalajangiiffigineqartut akilereerunigit, 100 millioner koruunit tungaannut akeqarsimanera eqqarsaatigigaanni, annikinnerusunik aningaasartuuteqarnissarput kisinngoruttoq akuerisinnaavarput.

Maannakkut suliassaq eqqartuussivimmi ingerlaqqissaaq. Kisianni maannakkorpiaq ajugaasimanerput nuannaarutigisinnaalerparput, aammalu eqqartuussivimmi suliassami isumalluutigut ukkatarisinnaanngoratsigu oqiliallaataavoq." 


Paasissutissanik annertunerusunik piniarnermi attaveqarfigineqassaaq Naalakkersuisoqarfimmut pisortaaneq Jørgen T. Hammeken-Holm uunga joeh@nanoq.gl