NASCO-p ataani Kalaallit Nunaata Kitaani Ataatsimiititaliarsuup Nuummi ataatsimiinnerat

Kalaallit nunaata kitaani ataatsimiititaliarsuaq NASCO-mi nunap immikkoortuini aalisakkanik aqutsinerit pillugit suliaqartoq Nuummi soqutigisaqaqatigiinneq pillugu ataatsimiippoq, ulluni 3 - 4. marts (Atlantikup avannaani kapisillip piujuartinneqarnissaa pillugu kattuffik).

Kalaallit Nunaata Kitaani Ataatsimiititaliarsuup ilassutitut isumaqatigiissut pillugu ataatsimiinnerisa siullersaraat, tassani ilanngunneqarluni Kalaallit Nunaata kitaani atlantikup kapisiliinik aalisarnermi TAC. Ilassutitut isumaqatigiissut siulleq siorna atorunnaarpoq aammalu ukiumi 2026-mi aalisarneq aallartinnginnerani juunimi NASCO-mi ukiumoortumik ataatsimiinnermi nutaamik isumaqatigiissusiornissaq isumaqatigiinniutigineqartussaalluni.

NASCO-p ataani Atlantikup kapisilinnik aalisarnermi tunngavigineqartarpoq, kapisillit aalisagaammata annertuumik nikerartut, taamaattumillu imartanik atuisinnaanermut isumaqatigiissut tunngavigalugu aqutsineq pillugu suleqatigiittoqartariaqarluni. Tamatuma saniatigut kapisilinnik Amerika avannarlermiit aamma Europamiit tikittoqartarpoq Kalallit Nunaanni aalisarneqartunik, taakkualu ilaqarlutik aalisagaqatigiinnik nungutaangajalersunik imaluunniit nungunneqarnissamut aarlerinartunik. Ataatsimut isigalugu atlantikup avannaani kapisillit aalisagaqatigiiupput nungutaanissamut ulorianartorsiortut.

Taamaattumik Kalaallit Nunaat pisussaaffeqarpoq nunanik allanik ataatsimiititaliarsuarmi ilaasortaasunik akuleriinnik aalisarnermi suleqateqarnissamik (Mixed-stock fishery). Taamaattumik aamma immikkut pingaaruteqarpoq Kalaallit Nunaanni aalisarnermut piniarnermullu nakkutilliisoqarfimmut pisat nalunaarutiginissaasa eqqaamaneqarnissaat.

Kalaallit Nunaat kapisilinnit misiliutissanik tigooraanermi peqataavoq, tassani Kalaallit Nunaanni aalisarnerup nalaani nunarsuaq tamakkerlugu ilisimatusartut misiliutissanik tigooraasarlutik. Tamatuma saniatigut Kalaallit Nunaata nammineerluni innuttaasunut pilersaarutiteqarpoq, tassani innuttaasut, kapisillip tattaanik tigooraanikkut peqataasinnaallutik pinngortitaleriffimmullu nassiullugit 2025-mi aalisarnermi misiliutit maanna misissorneqarput, taamaattumillu akissutissat suli pigineqaratik

Ataani takuneqarsinnaavoq kapisillit Europamit aamma Amerikap avannaanit pisut kaalaallit nunaani pisarineqarsimasut %-inngorlugu agguataarnerinut takussutissiaq: CNL2506_ICES-Advice.pdf




Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl