Nunarsuarmi aatsitassanut tunngassutilinnik saqqummersitsinerit aaqqissuussat annersaanni kalaallit aallartitaqarluartut

Nunatsinni inuussutissarsiortut, Inatsisartut Inuussutissarsiornermut Aatsitassanullu Ataatsimiititaliaata aallartitai, kommuninit aallartitat borgmesterillu peqatigalugit Naalakkersuisut Canadami Toronto-mi nunarsuarmi aatsitassanut tunngassuteqartunik saqqummersitsiviit annersaanni peqataapput.

PDAC Convention (Prospectors & Developers Association of Canada-mit aaqqissuunneqartoq) aatsitassarsiorluni misissuinermut aatsitassarsiorfinnillu ingerlatsinermut nunarsuarmi ingerlanneqartartut annersaat ukiut tamaasa martsip qaammataata aallartinnerani ingerlanneqartarpoq. Saqqummersitsitvik nunarsuarmi katersuuffiusarpoq, tassani attaveqarfigisartakkatigut, teknikkikkut saqqummiussinertigut niuernermilu isumaqatigiissutitigut suliffissuit siunissaat ilusilerneqartarlutik.

Kalaallit Nunaanni aatsitassanut oqartussat ukiut 25-t sinnerlugit saqqummersitsivimmi peqataasarput. Ukioq manna oqartussat Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisumit, Naaja H. Nathanielsenimit aamma Aalisarnermut, Piniarnermut, Nunalerinermut Imminullu Pilersornermut Naalakkersuisumit, Peter Borgimit atorfilittaniillu siulersorneqarput. Tamatuma saniatigut aallartitat amerlasuujullutik peqataapput, tassaallutik Sulisitsisunit, Dansk Industri-mit aammalu Toronto-mi danskit Generalkonsulat-iannit ataqatigiissaarneqartumik najukkani sullissinermut suliffeqarfinniit aatsitassarsiorfiutileqatigiiffinniillu aallartitat.

Suleqatigiinnermi tassani Kalaallit Nunaata ataatsimoortutut saqqummernissaa qulakkeerneqarpoq, tassani nunap sannaanut paasissutissat nalunaarsukkat (oqartussat) aammalu suliaqarnermi sullissinissamut periarfissat (inuussutissarsiortut) ataatsikkut saqqummiunneqarlutik, tassani pingaartumik Kalaallit Nunaata Ulluanik taagorneqartoq kiinnanit nutaarpassuarnit ornigarneqarluni.
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:

”Aatsitassanut tunngassuteqartunik saqqummersitsivimmi pisarnertut aatsitassanut attuumassutilinnut niuerfimmut tunngasut sammineqarput, kisianni ukioq manna nunami sumiiffinnut politikkikkut inissisimaneq ukkatarineqartoq aamma ersarippoq. Tamanna ataatsimiinnerni ingerlatatsinni pimoorussineq immikkut malunnarpoq. Sumi tamani tapersersuisut naapippagut, taakkunanilu qujamasunnerput oqaatigisarlutigu. Ullut pissarsiaqarfiulluarput, tassani Canada-mut aammalu Frankrig-imut nutaanik illugiilluta isumaqatigiissuteqarluta. Niuernermut tunngasuni Kalaallit Nunaanni aatsitassarsiornermi suliassat soqutigineqarnerulersimapput, tamannalu maannakkut piffissami nalaatatsinni pingaaruteqartorujussuuvoq. Aatsitassarsiornermut suliassaqarfik avataaniit suli tatigineqarpoq tapersersorneqarlunilu, tamatumalu ilisimaarinera angerlamut aallarnermi pingaaruteqarpoq”.

Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg oqarpoq:

”Nunatsinni nunap ilua periarfissarpassuarnik imaqarpoq, kisianni ineriartornerup pinngortitaq, avatangiisit naleqartitagullu ataqqillugit pinissaa aalajangiisuulluinnartumik pingaaruteqarpoq. Taamaattumik Pinngortitamut Avatangiisinullu Naalakkersuisoq maannakkut siullermeertumik aatsitassanik saqqummersitsivimmi peqataasinnaammat, aammalu avatangiisinut suliassaqarfimmi politikerinik aamma siunissami peqataasoqartarnissaa, neriulluarnarpoq. Tassami ungasissumut aatsitassarsiornermi inerisaanerup inuiaqatigiinnut nukittorsaanissaa aammalu ineriartornerup ersarissunik akisussaassusilinnik sinaakkutissiinerit iluanni pinissaa, qulakkeertussaavarput. Avatangiisit mianerinissaat pingaartittorujussuussavarput, suliap ingerlanissaa ammaffigineqassaaq aammalu innuttaasut nipaat tusarnaartussaavagut. Oqariartuutit taakkua aningaasaliisartunut ingerlateqqippakka, aammalu ilaatigut pisinnaatitsissummik pigisaqartunik, EU-kommissionimi aallartitanik Canadamilu Nukissiuutinut Aatsitassanullu ministerimik nuannersumik pilersitsiviulluartumillu oqaloqateqarpugut.”

Paasissutissanik annertunerusunik piniarnermi attaveqarfigineqassaaq Naalakkersuisoqarfimmut pisortaaneq Jørgen Hammeken-Holm uunga joeh@nanoq.gl imaluunniit oqarasuaammut 346846