Kalaallit Nunaata aamma Frankrig-ip aatsitassanut suliassaqarfimmi teknikkikkut suleqatigiinnissamut isumaqatigiissut atsiorpaat

Canadami, Toronto-mi, nunarsuarmi aatsitassanut tunngassutilinnik takutitsinerit aaqqissuussat annersaanni PDAC-imik taaguutiliup ingerlanneqarnerata nalaani Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup aamma Franskit Nunap sannaanik misissuisarfiata (BRGM) akornanni teknikkikkut suleqatigiinnissamut isumaqatigiissut marlunngornermi ulloq 3. marts 2026 atsioqatigiissutigineqarpoq.

Isumaqatigiissummi aatsitassanut suliassaqarfimmi kalaallit-franskit annertunerusumik suleqatigiinnissaat tunngavissinneqassaaq. Suleqatigiinnissamut isumaqatigiissutip ataani suliniutissaq siulleq toqqarneqareerpoq. Kalaallit Nunaanni nunap sannaanik qaammataasatigoortumik uuttortaanissaq pillugu suliniut piffissami aggersumi aallartinneqassaaq. Suliniut taanna nunatta sannaa pillugu nutaanik itinerusunillu ilisimasaqalersitsissaaq aammalu franskit ikiuunneranni taamaallaat pisinnaalluni. Kingusinnerusukkut suliniutit allat malittaatinneqassapput, taakkunani aamma Kalaallit Nunaat pillugu nunap sannaanut paasissutissat katersorneqarnissaat ukkatarineqassalluni. Paasissutissat katersorneqartut siunissami aatsitassarsiorluni misissuinernik ingerlatassanut aqqutissiuussissapput.
Suleqatigiinnissamut isumaqatigiissutip atsiorneqarnerani najuupput Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen aamma Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg, aammalu franskit Ministeriat Delegate for International Trade and Attractiveness, Mr. Nicolas Forissier.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen taanna iluatsillugu oqarpoq:
”Isumaqatigiissut Kalaallit Nunaata aamma Frankrig-ip akornanni suleqatigiinnerulernerup, 2025-mi aasaanerani franskit præsidentiata Emmanuel Macron-ip tikeraarnerata kingorna aallartinneqartup, toqqaannartumik malitsigaa. Uuttortaanissani pilersaarutigineqartuni franskit nunarsuarmi pitsaanerpaamik misilittagaqarnerat pisinnaasaqarnerallu atorneqassapput aammalu nunatta sannaa pillugu ilisimasatsinni amigaateqarfiusut immersorneqassallutik. Siunnerfigineqarpoq pitsaassutsit annikillisinnagit aatsitassarsiorluni misissuinermi paasissutissanik pingaarutilinnik sukkasuumik sunniuteqarluartumillu katersinissaq. siunissami Kalaallit Nunaanni aatsitassarsiorluni misissuinissamut kajungilersitsisinnaassagutta, ilisimasat taakkua pisariaqartinneqarput. Franskit ikiuunnerat aammalu franskit suleqataarusussuseqarnerat annertooq suliap ingerlanera tamaat takusimasarput Naalakkersuisut qujamasuutigaat, aammalu Naalakkersuisut aamma franskit naalakkersuisuisa akornanni aatsitassanut suliassaqarfimmi MoU-imik suliaqarnissaq qilanaaralugu.”

Pissusiviusut
Pingaarnertigut anguniagarineqarpoq ataatsimoorluni Kalaallit Nunaanni sumiiffiit sikusanngitsut tamaasa nunap assiliornissaat. Suliassaq siulleq tassaavoq sumiiffinni marlunni, suli eqqoqqissaartumik aalajangiussimanngisatsinni, qaammataasiatigoortumik misissuilluni misileraanissaq. Nunap immikkoortuini marlunni eqqarsaatigineqartuni taakkunani ilaatinneqarput km² hunnoruju tuusintilikkaat arlallit, tassani oqaloqatigiinnertigut ullut aggersut iluanni angissusissaa killilersorneqarneralu eqqortut aalajangersarneqassallutik. Ukkatarineqarpoq atortussiassanik suliarineqanngitsunik pisariaqartinneqartunik (CRM) aatsitassarsiornissamut pilersaarusiornissaq, tassani Kalaallit Nunaat pinngortitami pisuussutini atorlugit nunarsuarmi niuerfinni pingaarutilimmik inissisimalersinnaalluni. Misileraanissamut suliniut taanna ukioq 2026-mi naammassineqassaaq. Isumaqatigiissut aallaqqaammut ukiunut pingasunut isumaqatigiissutigineqarpoq, kisianni illuatungeriinnit allaganngorlugu kissaateqarneq malillugu sivitsorneqarsinnaalluni.

Paasissutissanik annertunerusunik piniarnermi saaffigineqarsinnaavoq Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfimmi pisortaq Jørgen T. Hammeken. E-mail: joeh@nanoq.gl