AtuartigukInnuttaasut inatsisitigut ataataqanngitsut ikiorneqarsinnaaleqqipput
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
2026-miit Nunatsinni Danmarkimilu innuttaasut inatsisitigut ataataqanngitsut akeqanngitsumik inatsisitigut ilitsersorneqarsinnaalissapput, ataatassarsiuussinissamut taperserneqarlutik, katsorsarneqarnissamik neqeroorfigineqarlutik kiisalu nuna tamakkerlugu sumiiffinni paasissutissiilluni ilitsersuillunilu ataatsimiinnerni peqataanissaminnut periarfissaqalissallutik.
Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfiup,
Nunatsinni Naalagaaffiup Sinniisoqarfiata Danmarkimilu Social- og Boligministeeriaqarfiup suleqatigiinnerisigut piffissaq suliniuteqarfiusoq nutaaq aallartinneqarpoq, tassani Nunatsinni Danmarkimilu innuttaasunut inatsisitigut ataataqanngitsunut ikiuisarnerup pissarsiassaaleqqinnissaa qulakkeerneqassalluni. Suliniut 2026-miit 2029 ilanngullugu ingerlanneqassaaq.
"Inatsisitigut ataataqanngitsut amerlavallaarujussuartut, kinaassutsimut sumullu attuumassuteqarnermut apeqqut kisimi pigalugu, aqqutaat takillunilu qajannarsimavoq. Kinaluunniit tapersersorteqarani taamatut ilungersuuteqarluni aqqusaagaqannginniassammat, maanna pisortani oqartussat aqqutigalugit ikiuinermik neqeroorsinnaalernerput taamaammat isumaqartorujussuuvoq. Suliniut pineqartoq toqqissisimanerulersitsisinnaassallunilu namminneq oqaluttuaminni eqqissinermik sammivimmillu nassaarnissaminnut periarfissaqalersitsisinnaanerulissasoq neriuutigaara” taama oqarpoq Ilinniartitaanermut, Kultureqarnermut, Timersornermut, Ilageeqarnermut, Meeqqanut, Inuusuttunut, Ilaqutariinnut Nunamullu Namminermut Naalakkersuisoq, Nivi Olsen.
Ilitsersuineq pissarsiariuminarnerulersinniarlugu Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfik Nunatsinnilu Naalagaaffiup Sinniisoqarfia Nunatsinni illoqarfinni toqqakkani arlalinnik ilitsersuilluni paasissutissiillunilu ataatsimiisitsissapput. Innuttaasut inatsisitigut ataataqanngitsut taakkunngalu qanigisaasut ataatsimiinnerit peqataaffigisinnaavaat. Piffissaq suliniuteqarfiusoq tamakkerlugu ataatsimiinnerit ingerlanneqartassapput.
2026-mi ataatsimiinnissanut pilersaarut:
Tasiilaq: 07/03 2026
Ilulissat: 16/03 2026
Qaanaaq: 28/03 2026
Attavissaq
Sukumiisumik paasisaqarusukkuit naalakkersuisup allattaa Kresten Lennart e-mailikkut krlt@nanoq.gl imaluunniit oqarasuaatikkut: +299 34 56 75 attavigiuk.