AtuartigukQeqertarsuarmi Qasigiannguanilu innuttaasunik ataatsimiititsinissaraluit kinguartinneqarput
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Peqqissutsimut inunnullu Innarluutilinnut Naalakkersuisup, Anna Wangenheimip, Qeqertarsuup Tunuani massakkorpiaq angalasup, innuttaasunik Qeqertarsuarmi
3. marsimi Qasigiannguanilu 4. marsimi ataatsimiititsinissaraluani timmisartuussinermi ajornartoornerit pissutigalugit upernaamut kinguartittariaqalerpai. Borgmesteri Simigaq Heilmann ullumikkut aamma tikissinnaasimanngilaq.
Anna Wangenheim angalanermini Qeqertarsuarmi Peqqissaavimmi sulisut ataatsimeeqatigisussaagaluarpai, borgmesterilu Peqqinnissaqarfiup Qeqertaqarsuarmilu Utoqqaat Illuata anguniaqaqatigiinnermik nalunaaruteqarnissaat pillugu eqqartueqatigisussaagaluarlugu. Innuttaasunik ataatsimiititsinissat kinguartinneqaraluartut, suleqatigiinnissamik isumaqatigiissusiornissaq sulissutigineqaannassaaq.
Naalakkersuisoq Anna Wangenheim ima oqarpoq:
“Qeqertarsuarmut Qasigiannguanullu ulluni makkunani tikinngitsoortussanngornera uggorisorujussuuara. Illoqarfinni taakkunani innuttaasunik ataatsimiititsinissannut borgmesterillu Simigaq Heilmannip Peqqinnissaqarfiup Qeqertarsuarmi Utoqqaat Illuata suleqatigiinnerunissamik isumaqatigiissusiornissaat pillugu eqqartueqatigeqqinnissaanut qilanaarsimagaluarpunga. Borgmesterip najuunnissaa pingaartippara, taamaammallu kikkulluunniit aamma peqataasinnaaqqullugit innuttaasunik ataatsimiititsinissaraluakka kinguartittariaqarpavut.
Innuttaasut sulisullu oqariartuutigisimasaat tusaavagut aaqqiissutissanillu siunnerfeqarluta. Peqqissaavimmi siorna allannguutaasimasut, pitsaanerusumik attanneqarsinnaasumillu aaqqiissuteqarsinnaasugut, innuttaasut sullinneqarnerannut sulisunullu iluaqutaasussaq, saqqummiutissallugu qilanaarivara. Kingumut aaqqiinata, pitsaanerusumik alloriaqqilluta.”
Innuttaasunik ataatsimiititsinissat qaqugorpiaq pissanersut paasinarseriarpat, sukumiinerusumik paasissutisseeqqittoqarumaarpoq.
Paasisaqarnerorusukkaanni allalluni attavigineqarsinnaapput, naalakkersuisup allattaa Helene Geisler Kristiansen, hgkr@nanoq.gl, imaluunniit Peqqissutsimut inunnullu Innarluutilinnut Naalakkersuisoqarfik, pn@nanoq.gl, oqarasuaat +299 34 50 00.