Aatsitassanut nukissiuutinullu suliassaqarfimmi Canadap suleqatigineqarnerulernera

Canadami, Toronto-mi, nunarsuarmi aatsitassanut tunngassutilinnik takutitsinerit aaqqissuussat annersaata ingerlanneqarnerani canadami Minister of Energy and Natural Resources, Tim Hodgson-imut, suleqatigiinnissamut isumaqatigiissut (Joint Declaration of Interest), Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup, Naaja H. Nathanielsenip, atsiorpaa.

Aatsitassanut suliassaqarfimmi Kalaallit Nunaata aamma Canadap akornanni suleqatigiinnissamut isumaqatigiissut illuatungeriinnut tamanut periusissatigut aningaasaqarnermullu pingaaruteqarpoq. Nunani taakkunani marlunni nunap sannaa imminnut assingupput. Canada aatsitassarsiorfimmik ingerlatsinerup pisuussutinillu ineriartortitsinerup iluanni ukiorpassuarni paasisimasaqarpoq aammalu Canadami aningaasanik niuerfik nunarsuarmi aatsitassarsiornermik inuussutissarsiornermi qitiulluni. Taamaattumik teknologiikkut ilisimasanik pingaarutilinnik, aningaasaliinissamut periarfissanik aammalu suliffissuit attaveqarfigisartagaannik inerisarluagaasunik asseqanngitsunik, Kalaallit Nunaanni aatsitassarsiorfinnik ingerlatsinissamik anguniagaqarnermik siuarsaasinnaasunik, Canadap Kalaallit Nunaat neqeroorfigisinnaavaa. Sumiiffinni avinngarusimasumiittuni, nukissiuutinut attaveqaatinut atassuteqanngitsuni, kisianni tamatumunnga taarsiullugu sumiiffimmi ataasiinnarmik innaallagissiorfilerneqarsimasuni, nukissiuutinik inerisaaneq pillugu ilisimasanik Kalaallit Nunaat tapersiisinnaavoq. Kalaallit Nunaanni misilittakkat Canadamut avitseqatigiissutigineqassapput, tassami ministeri Tim Hodgson, aamma Canadami nukissiuutinut ministeriummat.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq:
”Suleqatigiinnissamut isumaqatigiissummi Canadami sanilerilluakkattalu akornatsinni qaninnerusumik suleqatigiinnissarput erseqqissarneqarpoq. Isumaqatigiissut aatsitassat pisariaqartinneqartut nukissiuutillu pillugit suleqatigiinnissamut siunnerfeqartinneqarpoq, tamannalu pinngortitami pisuussutitta paasisimalluarnerulernissaanik, aningaasaqarnikkut ingerlataqarnerulernissamik, kinguneqassaaq. Kalaallit Nunaata piffissami kingullertigut nunanit tamalaanit eqqumaffigineqarnerulernermini ukkatarineqarnini nuannaarutigaa. Isumaqatigiissummi tassani nukittuumik iligiinnissap suleqateqarnissallu pingaaruteqarnerat aalajaallisarneqarpoq.”

Suleqatigiinnissamut isumaqatigiissut atsiorneqartoq, Joint Declaration of Intent, ataasiakkaatigut ataatsimoorluni siunnerfeqarluni suliniuteqarlunilu pituttuisumik isumaqatigiissuteqarnissamut, aammalu siunissap qaninnerusup iluani isumaqatiginninniutigineqartussamut atsiorneqartussamullu, aallarniutaavoq.

Annertunerusumik paasisaqarusunnermi saaffigineqarsinnaavoq Naalakkersuisoqarfimmi pisortaq Jørgen T. Hammeken-Holm joeh@nanoq.gl