Nunalerinerup killiffia ineriartortinnissaalu Narsarsuarmi eqqartorneqarsimasut

Nunalerinermut Siunnersuisoqatigiit 12. februar Narsarsuarmi ataatsimiipput, tassanilu nunalerinermik inuussutissarsiuteqartut ullutsinni atugaat eqqartorneqarlutik. Ataatsimiinnermi inuussutissarsiuteqartut, pisortat ilisimatusarfiillu aallartitaat peqataapput tassanilu massakkut unammilligassaasut kiisalu inuussutissarsiutip siunissaq ungasinnerusoq isigalugu ineriartortinnissaa pingaartillugit eqqartorneqarlutik.

Inuussutissarsiuteqartunut ukioq manna tapiissutit agguarnissaat siunertalimmillu qulakkiikkamik atorneqartarnissaat oqaluuserisassat pingaarnerit ilagisimavaat. Aningaasat siunertalimmik akisussaassusilimmillu atorneqarnissaat qulakkeerniarlugu taperiaatsit tamakkiisumillu sinaakkutissat siunnersuisoqatigiinni eqqartorneqarput.
Tamatuma saniatigut tuttut sarcocyster-imik qaariallit oqallisigineqarput. Inuussutissat isumannaatsuunissaasa pingaaruteqassusaat, aqutsineq ajornartorsiutillu pingaartillugu sulissutigiuarnissaa eqqartorneqarput.

Nersutaateqarneq ilanngullugu tikinneqarpoq tassanilu massakkut unammilligassaasut nersussuaateqarnerullu ineriartorteqqinnissaanut periarfissat eqqartorneqarlutik.

Ilisimatusarnerit pinaveersaartitsinerillu isiginiarnissaat
Ataatsimiinnermi savat Neqi A/S-imi toqorarneqartartut akornanni savat "qernertumik tingullit" misissorneqarsimanerinit paasissutissat ilisimatuunit saqqummiunneqarput. Misissuinerit takutippaat tinguit qernertut inuussutissat isumannaatsuunissaat eqqarsaatigalugu aarlerinartoqanngitsoq savaaqqallu qernertumik tingullit tunisassiariinnarneqarsinnaasut. Saqqummiussaq oqallisigineqangaatsiarpoq oqallittunillu patsisaasut paasineqarnissaat pineqartumullu tunngatillugu annertunerusumik paasisaqarnissaq kissaatigineqarpoq.

Naasupiluit nunatsinneersuunngitsut nunaateqarfiit eqqaanni inuillu ataasiakkaat naatsiiviini siaruartulersimaneri pillugit Nunalerinermut Siunnersuisoqatigiit ilisimatinneqarputtaaq. Naasoq pineqartoq tassaavoq spergel, inerittussartanittarnissaat siammapallattarnissaallu pinaveersaarniarlugit siusissukkut pimoorullugillu iliuuseqarfigisariakkat.

Nunaateqartut inuillu naatsiiveqartut naasupalaap spergelip naasupalaallu allat nunatsinneersuunngitsut naasarneri pillugit malinnaaqqissaarnissaanik taakkulu nungusarneqarnissaanut suleqataaqqullugit Nunalerinermik Siunnersuisoqatigiinnit kaammattorneqarput.


Inussiarnersumik inuulluaqqusillunga


Lars Nielsen
Siulittaasoq Nunalerinermut Siunnersuisoqatigiit

Allanik paasisaqarniaruit: Nunalerinermut Siunnersuisoqatigiit, e-mail: nuna.siu@nanoq.gl
imalluunniit
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik, e-mail: apn@nanoq.gl