Aningaasatigut ajunngitsorsiassanik qinnuteqaatit pillugit killiffik – Naartunaveersaaserneqarsimasut pillugit suliaq

Suliamut soqutiginninnerujussuaq patsisaalluni, aningaasatigut ajunngitsorsiassanik suliaqarneq pillugu Naalakkersuisut matumuuna killiffmmik paasissutissiipput.

Peqqinnissamut suliassaqarfiup 1. januar 1992-imi akisussaaffigilerlugu tiguneqarnerata kingorna arnanit akuersitinneqaratik imaluunniit ilisimanngisaminnik naartunaveersaaserneqarsimasunit, aningaasatigut ajunngitsorsiassanik qinnuteqaatinik 209-nik Naalakkersuisut tigusaqarput.

Taakkunannga qinnuteqaatinit tigusanit 209-usunit 111-t paasissutissanik piniarfigalugit suliarineqarput. Imaappoq, katillugit arnat 111-t peqqinnissaqarfimmi journalii pillugit paasissutissanik piniarfigineqassasut.

Qinnuteqartut 92-t qinnuteqaataanni pisimasut Kalaallit Nunaata peqqinnissamut suliassaqarfimmik 1. januar 1992-imi tigusinerata siorna pisimasuummata, taakkua itigartinneqarput. Arnat taakku danskit naalagaaffiat aqqutigalugu aningaasanik ajunngitsorsiassanik qinnuteqarsinnaassapput.

Taamaalilluni naatsorsuutigineqaqqaartumit qinnuteqaatit amerlanerungaatsiartut tiguneqarput, pisimasunillu nalunaaruteqartut nunap annersaani siammarsimallutik. Imaappoq, journalit amerlanerusut pissarsiarineqartussaasut, tassungalu piffissaq atorneqartoq ilimagineqaqqaartumik sivisunerulluni.

Qinnuteqaaterpassuit patsisaallutik aningaasatigut ajunngitsorsiassanik tunniussinissamut kiisalu suliat suliarineqarnerinut atatillugu allaffissornikkut aningaasartuutinut atugassanik aningaasaliissutaareersut qaavatigut aningaasaliissutinik Naalakkersuisut qulakkeerisariaqarsimapput.

Naligiissitaanermut Naalakkersuisoq, Naaja H. Nathanielsen imak oqaaseqarpoq:

”Qinnuteqaaterpassuit takutippaat, arnat ilisimanngisaannik imaluunniit akuersitinnagit naartunaveersaasersuisarsimanerit peqqinnissamut suliassaqarfimmik tigusinerup kingorna aamma pisarsimasut. Maanna qinnuteqaatit suliarineqassapput, suliarlu taanna naammassippat pisimasut qanga pisimanersut, sumilu pisimanersut annertunerusumik ilisimasaqalissaagut. Suliamik tamakkiisumik paasinninniarnitsinni paasisassat taakkua pingaaruteqarput. Qinnuteqaatinik suliaqarneq naatsorsuutigineqaqqaartumit sivisunerummat ajuusaarutigeqqippara, aammali isumaqarpunga suliat peqqissaarullugit suliarineqarnissaanni suliat sivisuumik suliarissallugit pisariaqartoq.”

Paasissutissat

• Peqqinnissamut suliassaqarfiup 1. januar 1992-imi akisussaaffigilerlugu tiguneqarnerata kingorna arnat akuersitinneqaratik imaluunniit ilisimanngisaminnik naartunaveersaaserneqarsimasut aningaasatigut ajunngitsorsiassanik qinnuteqarsinnaatillugit, Naalakkersuisut immikkut aaqqiissut 17. oktober 2025-mi ammarpaat. Qinnuteqarnissamut periarfissaq 31. december 2025-mi matuvoq.
• Inatsisilerinermi, peqqissutsimullu immikkut ilisimasallit qinnuteqaatinik nalilersuipput. Naleqqutsillugu, pisariaqartutullu nalilerneqartillugu kingunerlutsitsinernik ilisimasalik akuutinneqartarpoq. Qinnuteqaatinik nalilersuineq kiisalu immikkut aaqqiissummik isumaginninneq Frederiksen Law-imit isumagineqarpoq, taassumallu suliani aamma inaarutaamik aalajangiisussaq Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik qaninnertut attavissaralugu.
• Naatsorsuutigineqaqqaarsimasumit qinnuteqaatit amerlanerungaaatsiartut tiguneqarsimanerat paasissutissiissutigalugu, februaarip 3-ani Naalakkersuisut tusagassiorfinnut nalunaaruteqarput. Qinnuteqaatit tamarmik peqqissaarullugit, eqqortumik, assigiimmillu tunngavilimmik suliarineqarnissaat qulakkeerumallugu, qinnuteqaatit tiguneqartut suliarineqarnissaanut piffissamik sivitsuinermik kinguneqarpoq.
• Qinnuteqarnissamut periarfissap 17. oktober 2025-mi ammarneqarneranit, decembarip 31-ani matunissaata tungaanut qinnuteqaatit tiguneqartut amerlassusaannut il.il. killiffik, tulliuttumi takussutissiami takutinneqarput.

Paasissutissanik annertunerusunik pissarsiniarnermi attavissaq: Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik. E-mail: asn@nanoq.gl oqarasuaat +299 34 50 00.