Upalungaarsimanerup annertusarnissaanut 180 millionit koruuninik aningaasaliissutaasoq

Danskit naalakkersuisui 2026-mi Kalaallit Nunaanni upalungaarsimanermut suliniutinut annertusaaniarlutik 180 millionit koruuninik immikkoortitsipput. Tamanna Naalakkersuisut qanimut suleqatiginerisigut pivoq. Upalungaarsimanermut annertusaanissamut aningaasaliissutit suleqatigiinnerup nukittunerulernissaanik siunertaqartumik januarimi pisumi Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisup Peter Borgip aamma Inuiaqatigiinni Isumannaallisaanermut Upalungaarsimanermullu Ministerip Torsten Schack Pedersen-illu isumaqatigiinnerannik tunngavilerneqartumik suleriaqqinnertut  isigineqassaaq. 

Kalaallit Nunaanni upalungaarsimanerup aningaasaliiffigineqarnissaanut pinartunut tunngasut, danskit naalakkersuisuisa tallimanngormat 20. februaari 2026-mi saqqum-miussaanni 180 millionit koruunit atorlugit nukittorsaassapput. Aningaasat ilaatigut kalerrisaarutinut oqarasuaatinut angallattakkatigoortunut, ajornartoornermi innaallagissiuutinut kommuuninilu sullissinernut upalungaarsimanerannut ikiuunnissamut atorneqassapput. Pinartunut aningaasaliissutit kalaallit danskillu oqartussaasuisa akornanni qanimut oqaloqatigiinne-risigut tunniunneqassapput. 

Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisoq Peter Borg oqarpoq: 

”Nunatsinni pitsaasumik upalungaarsimanermik, ingerlatsivugut sulilu pitsaanerulersitsiniarluta ataavartumik sulivugut. Ungasinngitsukkut ajornar-toortoqassappat ulluni tallimani aniguisinnaanermut inassuteqaatinik saqqum-miussaqarnikuuvugut, maannalu upalungaarsimanitsinnut atortut ilanerisigut malitseqartitsivugut. Qujamasuutigaara suli nukittunerusumik inissisimalernissarput piareersimanerunissarpullu angussagatsigu, assersuutigalugu sarfaaruttoqassappat, imaluunniit pinartumik pisoqassagaluarpat suliniutit nutaat danskit inuiaqatigiinni isumannaatsuunissamut upalungaarsimanermullu ministeriannik oqaloqateqarternerni pitsaasumit tunngavissinneqarpoq.’’ 

Inuiaqatigiinni Isumannaallisaanermut Upalungaarsimanermullu Ministeri Torsten Schack Pedersen oqarpoq: 

”Naalagaaffeqatigiinnerup iluani upalungaarsimaneq nukittuujussaaq. Taamaattumik Naalakkersuisullu qanimut oqaloqatigiinnerput Kalaallit Nunaanni upalungaarsimanerup suli annertunerulernissaanut iluaqutaasinnaammat nuannaarutigaara.”

”Isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisoq Aqqaluaq B. Egede oqarpoq: 

”Imarsiornermi silaannakkullu angallannermi isumannaallisaanerup annertunerulernera inuiaqatigiinni amerlasuunut iluaqutaassaaq. Taamaattumik imaatigut angallannermi isumannaallisaanerup annertu-nerulernissaanut aamma Nuup qulaani timmisartunik aqutsivimmik pilersitsinissamut aningaasaliisoqarnera nuannerpoq.”

”Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut, Naligiissitaanermullu Naalakkersuisoq Naaja H. Nathanielsen oqarpoq: 

”Nukissiornermut tapiisoqarnera iluarisimaarpara. Nuna tamakkerlugu pilersuinermi sillimmateqareerpugut, danskilli oqartussaasuisa aningaa-saliissutissatut immikkoortitaat isumannaassutsitsinnik annertusaassapput maannalu sullisseriaatsit atorneqartut pitsanngortinneqassallutik.”

Pinartunut aningaasaliissutit suliniutinut ukununnga tunngassapput:

• Suleqatigiinneq nukittunerusoq, atortunillu tunissuteqarnerit il.il. 
  Kalaallit Nunaata Danmarkillu akornanni upalungaarsimanermi suleqa-tigiinnerup annertusarnissaanut 45 mio. koruunit missaat immikkoor-tinneqarput. Ajornartoornermi attaveqaqatigiinnikkut periusissiornermut immikkut ilisimasaqarneq, aamma upalungaarsimanermilu immikkut ilisimasallit Naalakkersuisunut ikiuunnissaat, nunatsinnilu oqartussanut, kommuninilu upalungaarsimanikkut sullissisut ikiorneqarnissaat aamma naalakkersuisoqarfiup qitiusumik allaffiinut kommunillu sullissiviinut ajornartoornermi sarfalersuinermut aaqqiissutissat, kiisalu isumannaatsumik attaveqaqatigiinneq il.il. eqqarsaatigalugit aalajangersimasunut tapersiissu-teqarnissaq ikiuinissarlu pineqarput.
• Kalerrisaarut angallattagaq S!RENEN atulersinneqarnissaa
  Kalerrisaarut angallattagaq S!RENEN Kalaallit Nunaanni atorneqalernissaanut 10 mio. koruunit immikkoortinneqarput, tassungalu atuutsitsinerit aallartinneqa-reersut hardware atorlugu sukkatsisarneqarnissaat siunertaralugu il.il. pisinissaq ilaatinneqarput.
• Kalaallit Nunaanni imaatigut angallannermi isumannaallisaaneq
  Kalaallit Nunaanni nutaanik naaralaartitsivinnik ilaatigut ikkussuinissamut aamma naaralaartitsivinnik aserfallassimasunik nutarterinissamut, kiisalu imarsiortunut isumannaallisaanermi kalaallisut paasissutissanik aallakaati-tsisarnermut 15 mio. koruunit missaat immikkoortinneqarput. 
• Nuummi timmisartuussinermik aqutsinermik pilersitsinissaq 
  Nuummi silaannakkut angallannermik aqutsinissamik pilersitsinissamut 60 mio. koruunit missaat immikkoortinneqarput.
• Ajornartoornermi innaallagissiuutinik pisinissaq nukissiornermilu peqqumaatinik amerlisaanissaq 
  
  Innuttaasut nukissiummik pilersuineranni patajaatsunik sillimmateqarnissaq qulakkeerniarlugu ajornartoornermi innaallagissiuutinik pisinissamut 50 mio. koruunit missaat immikkoortinneqarput. 

Attaveqarfissaq
Annertunerusumik paasisaqarusunnermi Pinngortitamut Avatangiisinullu Naalakkersuisoqarfik pan@nanoq.gl aqqutigalugu attaveqarfigineqassaaq