Isumannaallisaanerup ukkatarineqarnera: Biilinik teknikkikkut misissuisarneq Kalaallit Nunaanni aqqusinertigut angallannermi toqqissisimanerulersitsissaaq

Kalaallit Nunaat tamakkerlugu aqqusinerni nunamilu isumannaallisaanerup nukittorsarneqarnissaa Naalakkersuisut ersarissumik siunnerfigaat. Suliaqarnermut tassunga ilaatillugu Færdselsstyrelsen-ip Kalaallit Nunaanni Politiit suleqatigalugit qamutinik motoorilinnik teknikkikkut misissuineq ingerlatissavaa. Misissuinermi siunertaavoq aquttut, ilaasut angallattullu allat toqqissisimanerulersinnissaat.

Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq, Aqqaluaq B. Egede, oqarpoq:

”Tunngaviatigut isumannaallisaaneq pineqarpoq. Biilit isumannaatsumik teknikkikkut pitsaassuseqarpata, aqqusinitsinni ajutoorsinnaaneq aarlerinaateqannginnerulersissavarput pissutsillu angalasunut tamanut, toqqissisimanarnerulissapput. Tamanna ataatsimoorluta akisussaaffigaarput, inuiaqatigiittut pimooruttariaqagarput.”

Misissuinerit ileqquusumik biilinik misissuinerunngillat, kisianni politiit biilinik unitsitsinissaannut inatsimmi tunngavissaqartillugu killissat atuuttut iluanni ingerlanneqassallutik. Peqatigisaanik misissuinerit Kalaallit Nunaanni aqqusernup sinaanut unitsitsilluni misissuisarneq pillugu maleruagassanut atuutilertussanut, Naalakkersuisut Angallannermut ministereqarfik aamma Færdselsstyrelsen suleqatigalugit sulissutigisaannut, pingaaruteqartumik ilaatillugu ingerlanneqarput.

Assartuussinermut ministeri Thomas Danielsen oqarpoq:

”Biilinik misissuisarnerup atuutsinneqalernissaa Kalaallit Nunaanni annertuumik kissaatigineqarsimavoq, aammalu kingullermik suleqatima Aqqaluaq B. Egedep ataatsimeeqatiginerani ilusiliaq tusarniaassutigineqaqqammersoq, tulliullugulu politikkikkut suliarineqartussaq, isumaqatigiissutigaarput. Peqatigisaanik biilinik teknikkikkut misissuisarnerup maannangaaq ingerlanneqalereersinnaanera, oqartussat akornanni qanimut suleqatigiinnermi qulakkeerneqarpoq. Tamanna aamma misilittagaqartitsilissaaq, Kalaallit Nunaanni ataavartumik misissuisarnermut aaqqissuussinermik pilersitsinissamut tunngavissaliisinnaasunik."

Innuttaasut Færdselsstyrelsimi sulisut ilisarisinnaasassavaat kavaajaanni sungaartuni, atiat kalaallisut allassimammat Aqqusinertigut Angallannermut Aqutsisoqarfik. Misissuinerit oqaloqatigiinnissaq, ilitsersuinissaq isumannaallisaanerlu ukkataralugit ingerlanneqassapput.

Naalakkersuisunut siunnerfik ersarippoq: Kikkut tamarmik toqqissisimallutik isumannaatsumillu aqqusinertigut angalaarsinnaassapput.


Paasissutissanik annertunerusunik piniarnermi attaveqarfigineqassaaq Ineqarnermut, Attaveqaasersuutinut Isorliunerusunullu Naalakkersuisoqarfik uani box909@nanoq.gl