Qaqortumi innuttaasunik ataatsimiititsineq: Innuttaasut inuuniarnikkut peqqissutsikkullu ajornartorsiutit iliuuseqarfigineqarnissaannik ujartuisut

Qaqortumi innuttaasunik pingasunngornermi unnukkut ataatsimiititsinermi peqataasut 70-it missiliorpaat, tassanilu apeqqutigineqartut Peqqissutsimut inunnullu Innarluutilinnut Naalakkersuisumit Anna Wangenheimimit aamma Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisumit Aqqaluaq B. Egedemit akineqarput.

Naalakkersuisut nunat tamalaat akornanni kingullertigut pisut pillugit ilisimatitsissuteqarlutik aallarniutigimmassuk politikkikkut inuiaqatigiittullu ataatsimoornissarput pingaartuusoq erseqqissaatigaat. Innuttaasut ilaatigut meeqqat inoqatinut attaveqaatini illersornissaannut qanorlu upalungaarsimatiginissamut tunngasunik apeqqutilliipput.

Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede ima oqarpoq:
"Innuttaasut ernummataat Naalakkersuisut imaannaanngitsutut isigaat. Ataatsimiititsinermi isummersuutigineqartut upalungaarsimanermut, isumaginninnermut suliffeqarnermullu tunngasuni pitsanngorsaanissamik politikkikkut sulinitsinnut attuumassuteqarluinnarmata pingaaruteqarput. Aggiasoqarluarneranut isummersuuterpassuarnullu pitsaasunut politikkikkut suliatta nanginnissaanut ilanngutassatsinnut qujavugut”

Peqqissutsimut inunnullu Innarluutilinnut Naalakkersuisoq Anna Wangenheim ima aamma oqarpoq:
"Peqqinnissaqarfik ataatsimiititsinermi aamma oqallisaaqaaq. Innuttaasut sukumiinerusumik misissorneqarsinnaanissamik, piginnaanngorsarnissamut periarfissat amerlineqarnissaannik imminullu kiffartuussivinnik pitsaanerusunik pilersitsisoqarnissaanik ujartuipput. Naalagaaffiup nunattalu Peqqinnissaqarfik pillugu tunngaviusumik isumaqatigiissutitaavat nunatsinni peqqissaavinni tamani sullissinermik pitsanngorsaanissamut tamatumalu malitsigisaanik Naalagaaffeqatigiinnermi naligiinnerunissamut tunngavissiissaaq. Partiinik oqaloqateqarnivut politikkikkut siunissami salliunneqartussanik eqqartueqatigiinnissamik siunnerfeqarluta nangittussaassavagut"

Angerlarsimaffeqanngitsut, aningaasaqarniarnikkut assigiinngisitsinerujussuaq, utoqqaat najugaqarfiinik amigaateqarneq kujataanilu suliffeqarfiit sulisussaaleqinerat innuttaasunik akunnerni pingasuni ataatsimiititsinermi peqataasut aamma isumakuluutiginerarpaat. Meeqqat angerlarsimaffiup avataanut inissitanut imigassarlu pillugu nutaamik inatsisiliortoqartariaqarneranut tunngasut innuttaasut ukkatarisaannut aamma ilaapput, aatsitassarsiornissamillu suliniutinik pilertornerusumik ineriartortitsinissaq arlalinnit aamma ujartorneqarluni.

Paasisaqarnerorusunnermi ukua attavigineqassapput:

Ineqarnermut, Attaveqaasersuutinut Isorliunerusunullu Naalakkersuisoqarfik, box909@nanoq.gl

imaluunniit

Peqqissutsimut inunnullu Innarluutilinnut Naalakkersuisoqarfik, pn@nanoq.gl