Ukioq manna Sillimaniarneq pillugu Münchenimi ataatsimeersuarnermi Vivian Motzfeldt peqataavoq

Sapaatip akunnerata naanerani 13. aamma 14. februar 2026-mi sillimaniarneq pillugu Münchenimi ataatsimeersuarnermi Nunanut Allanut Ilisimatusarnermullu Naalakkersuisoq Vivian Motzfeldt peqataavoq. Ataatsimeersuarnerup saniatigut aaqqissuussani peqataaffigineqarluartuni Vivian Motzfeldt peqataavoq. Kalaallit Nunaanni pisoq pillugu Kalaallit Nunaanni innuttaasut misigisaat oqaluttuarissallugit, USA-mut attaveqarnerup killiffia paasissutissiissutigissallugu, NATO-llu Issittumiinnerulerneranut tapersersuineq oqaatigissallugu Vivianip tassani periarfissaqarsimavoq.

Polenimi, Tysklandimi, Tuluit Nunaannilu nunanut allanut naalakkersuisut ataatsimeersuarnermi naapinnissaannut, qaammatinilu kingullerni nunat taakkua Kalaallit Nunaannut tapersersuisimanerinut qutsavigissallugit Vivian periarfissaqarsimavoq. Tysklandi Issittumut suli pimoorussisoq, Tysklandimi illersornissamut ministerip tullersortaata ukioq kingulleq Nuummiittuup aamma uppernarsarpaa.

Naalakkersuisut Siulittaasuat Jens-Frederik Nielsen, statsministeri Mette Frederiksen, nunanut allanut ministeri Lars Løkke Rasmussen aamma illersornissamut ministeri Troels Lund Poulsen peqatigalugit Vivian Motzfeldtip Amerikami senatorinik aamma naapitsivoq. Tassani pisimasut pillugit isummanik avitseqatigiipput, USA-mullu tunngatillugu pisumut senatorit amerlanerusut Kalalaallit Nunaannut aamma Kunngeqarfimmut tapersersuinertik oqaatigalugu.

Nunanik tamalaanik suleqateqarneq pillugu EU-p kommissæria Jozef Síkela Vivianip aamma naapippaa, Kalaallit Nunaatalu EU-mut, EU-p aningaasanut inatsisissamik suliaqarnissaanut atatillugu ukiuni makkunani ineriartortussamut, nutartertussamullu attaveqarnera eqqartussallugu periarfissaqarsimalluni.

Qaffasissumik inissisimasoq Tysklandimeersoq Europa-Parlamentarikeri Manfred Weber-ip EPP-meersup Vivian Motzfeldt aamma naapikkumavaa, Europa-Parlamentimilu partiini annersaasoq sinnerlugu Kalaallit Nunaannut annertuumik tapersersuinertik naapinnerminni oqaatigalugu.

Issittoq aamma Atlantikup avannarpasissua ilanngullugit illersornissaq pillugu suleqatigiinnerunissaq pillugu ataatsimeersuarnermi Canada, Danmark, Savalimmiut aamma Kalaallit Nunaat anguniagaqaqatigiinnissamik isumaqatigiissummik atsioqatigiipput.

Kiisalu Norgep statsministerisimasaata, NATO-llu ukiuni qulini generalsekretærisimasaata maanna aningaasaqarnermut naalakkersuisuusoq Jens Stoltenbergip naapinnissaanut tulluusimaarutigalugu Vivian periarfissaqarsimavoq. Jens Stoltenbergip ukiorpassuarni misilittakkani malillugit isummani annippai. Piffissami unammillernartumi matumani Kalaallit Nunaannut misiginneqataangaarnini, tapersersuininilu oqaatigaa.

” Assigiinngitsunit tapersersorneqarluarneq Kalaallit Nunaat sinnerlugu maanna misigisarput nukissanitsitsivoq. Nunatsinnut tapersersuineq, qujamasunnerpullu pillugit sinniisunik sapinngisamik amerlanerpaanik oqaloqateqarnissarput, nunarsuarmi pisoqangaatsiarfiusumi pingaaruteqarpoq. Matumani nunat sinniisui Issittumi sillimaniarnermut sakkutooqarnikkut taperseerusuttut ilanngullugit. Naalagaaffiit innuttanut pisussaaffii, tamat oqartussaanerat,nunamik innarligassaannginneralu pillugit inuiatta Nunarpullu illersuingaartutut isigineqartut ersarippoq. Tamatumunnga Kalaallit Nunaanni inuiaat qutsavissaqarfigingaarpagut.” Nunanut Allanut Ilisimatusarnermullu Naalakkersuisoq Vivian Motzfeldt oqarpoq.

Vivian Motzfeldtip Münchenimiinnini sioqqullugu Bruxellesimiippoq

Sillimaniarneq pillugu Münchenimi ataatsimeersuarnermi peqataanissani sioqqullugu Vivian Motzfeldt 11. Aamma 12. februarimi Bruxellesimiippoq, tassanilu illersornissamut ministeri Troels Lund Poulsen peqatigalugu EU-mut atatillugu Frankrigimi, Tysklandimilu illersornissamut ministerii ataatsimiinnerinut atatillugu naapillugit. Tassani illersornissamut ministerit suli Kalaallit Nunaannut illersuillutik, nunatillu NATO-p suliniutaanut Arctic Sentry-mut sakkutooqarnikkut tapersersuiniartut oqaatigalugu.

NATO-mut atatillugu aamma Troels Lund Poulsen peqatigalugu Vivianip nunani avannarlerni illersornissamut ministerit kiisalu Canadap illersornissamut ministeria aamma amerikap illersornissamut ministeriata sinniisua naapippai. Taakkununnga atatillugu Arctic Sentry nutaajusoq tamanit tapersersorneqarpoq.

Sungiusarnernut nunat amerlanerusut peqataasartussanngorlugit, Issittumilu sillimaniarnermut tapersersuisussanngorlugit Arctic Sentry-p akuerineqarneranut, pilersinneqarneranullu Kalaallit Nunaata naammagisimaarinninnera Vivian-ip annguppaa. Arctic Sentry-tigut Issittumi sillimaniarnermik NATO-p ataqatigiissaakkamik ukkataqarnera annertunerulissaaq.
Kiisalu NATO-mi sakkutooqarnermi qulliunerusunik SACT-imik, Supreme Allied Commander Transformation, aamma SACEUR-imillu, Supreme Allied Commander Europe, naapitsinissaminut Nunanut Allanut Ilisimatusarnermullu Naalakkersuisoq Vivian Motzfeldt periarfissaqarsimavoq Troels Lund Poulsen peqatigalugu.

”Issittumi illersornissaq, sillimaniarnerlu nukittorsarniarlugit piffissami kingullermi NATO aalajangiigasuarnikuuvoq, NATO-milu iligisat Issittumi killeqarfiata illersornissaanut nunat arlaqartut tapersersuerusullutik. Misigalugu toqqissisimanarpoq, NATO-milu sakkutooqarnikkut qulliunerusut Naalakkersuisunut sinniisumik siullermeerlutik naapitsisinnaanerat, taamaalillunilu Kalaallit Nunaannit oqariartuutit toqqaannartumik tusarsinnaammatigit nuannaarutigaara. Issittoq oqaluttuarisaanermi saqitsaaffiunngilaq. Tamanna ataqqissavarput. Kisianni aamma nunarsuarmut allanngorartumut naleqqussartariaqarpugut, tassanilu NATO-p nunatsinnut, nunallu immikkoortortatsinnut toqqaannarnerusumik pimoorussinera Kalaallit Nunaata tapersersorpaa.” Vivian Motzfeldt oqarpoq.

Attavissaq: Naalakkersuisup allattaa Suinni L. Johansen, Mail: sljo@nanoq.gl, mobil +299 58 02 83

Mobil: 580283