Qaanaami Tunumilu angallatinut tapiissuteqarnissamut Namminersorlutik Oqartussat nalunaarutaat pillugu tusarniaaneq

Qaanaami Tunumilu angallatinut tapiissuteqarnissamut Namminersorlutik Oqartussat nalunaarutissaanut siunnersuut tusarniaassutigineqarluni nassiunneqarpoq.
Nunaqarfiit ineriartortinneqarnissaat, tapersersorneqarnissaat aalisarnermilu atugassarititat pitsaanerulernissaat siunnersuummi siunertaavoq – pingaartumik Tunumi.

Aalisarnermut aningaasaliissutinujt immiikkoortitat pilljugit Inatsisartut inatsisaat siunnersuummi tunngavigineqarpoq, Tunumilu aalisarnerup ineriartortitsinissaanut pilersaarut 2024–2030 tunngavigalugu suliaavoq. Qaanaami Tunumilu najugaqartunut, angallatinik 6 meterimit anginerusunik nutaanik atornikunilluunniit pisinissamut tapiissuteqarnissamut maleruagassat nalunaarummi immikkut aalajangersarneqassapput.

Tapiissuteqarnissamut atugassarititat pitsaanerusut
Maleruagassanut inatsimmut sanilliullugu allannguutissatut siunnersuut ilaatigut imaqarpoq:

• Angallatinut 6 meterimit 9,5 meterimut l.o.a. angullugit takissusilinnut, raajanngitsunik aalisarnermut atugassianut tapiissutit angallatip pisiarinerani akiata 85 %-ia
  Tikillugu annertussuseqassaaq (inatsisitigut nalinginnaasumik 40 %-iusoq).
• Angallatinut 9,5 meterimit anginerusunut l.o.a. sinnerlugit takissusilinnut tajaanngitsunik aalisarnermut atugassianut tapiissutit, angallatip pissarsiarinerani akiata 60 %-ia tikillugu tapiisoqarsinnaavoq (inatsisitigut nalinginnaasumik 40 %-imiittoq).
• Qinnuteqartup nammineq akiliutigineqartussatut piumasaqaat annikillineqarpoq:
  • 2 % – 6 meterimit 9,5 meterimut l.o.a. umiarsuit
  • 5 % – 9,5 meterimit anginerusut
    (nalinginnaasumik 10 %).

Tamatuma saniatigut nalunaarummi qinnuteqaatip imarisaa kiisalu uppernarsaatit pillugit piumasaqaatit erseqqissarneqarput.

Tusarniaanermut piffissaliussaq
Siunnersuummut oqaaseqaataasinnaasut marsip qulingiluaanni 2026 nalunaaqutaq sisamat sioqqullugu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut nassiunneqassapput.
Oqaaseqaataasinnaasut e-mailikkut APN@nanoq.gl-imut, kopi katkn@nanoq.gl-imut nassiunneqarsinnaapput, imaluunniit allakkatigut uunga:

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut
Imaneq 1A, 701
Postboks 269
3900 Nuuk

Nalunaarutissamut siunnersuut tusarniaanermut ilanngullugu nassiunneqarpoq: Qaanaami Tunumilu angallatinut tapiissuteqarnissamut Namminersorlutik Oqartussat nalunaarutaat pillugu tusarniaaneq

Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl