2026-mi misileraalluni aalisarneq

Aalisakkanik arlalinnik misileraalluni 2026-imi Naalakkersuisut aalajangerput. Nunatta imartarujussuani aalisarfigineqarsinnaasunik periarfissarsiornissaq siunertaralugu misileraanissaq aalajangiunneqarpoq.

Aalisakkat ilisimaneqariinngitsut sumiiffinnilu aalisarfigineqarsimanngisaannartuni aalisartoqarnissaa peqqutigalugu, misileraalluni aalisartoqarnissaa aalajangiunneqarpoq.

Misileraalluni aalisarneq siunniunneqarpoq uku siunertaralugit:

• Aalisagaqatigiinnik ilisimasaqarfigineqanngitsunik misissuineq
• Aalisarfinni ilisimasaqarfigineqanngitsunik misileraaneq
• Aalisariaatsit atortullu nutaat atorlugit aalisarnermik misileraaneq

Misileraalluni aalisarnissamut akuersissutinik kingusinnerpaamik ulloq 02/03/2026 nallertinnagu qinnuteqartoqarsinnaavoq.

Misileraalluni aalisarnermi, aalisarneqarsinnaasut uani takuneqarsinnaapput.

Immersuiffissaq atorlugu misileraalluni aalisarnissamut qinnuteqartoqassaaq. Qinnuteqarfissaq misileraallunilu paasissutissat uaniipput.

Misileraalluni aalisarnissamut qinnuteqareernermi akuersissutit tunniunneqassapput. Pinngortitaleriffiup aamma Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup innersuussutai tunngavigalugit misileraalluni aalisartoqassaaq. Misileraalluni aalisartoqareerpat aalisarneq pillugu nalunaarusiortoqassaaq.

Qinnuteqartunut pisassiisoqareerpat Naalakkersuisullu pisasseereerpata qinnuteqarsimasunut pisassinneqarsimasunullu aalisarsinnaanermut akuersissutinik tunniussisoqassaaq, aalisarsinnaanermullu akuersissummik tunineqanngitsut akuersissummik tunineqannginnerinut tunngavilersuummik ilisimatinneqassallutik.
Aalisakkanik taaneqanngitsunik misileraassalluni kissaateqartoqarpat, taakku pillugit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl

Attavigineqarsinnaavoq Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik. E-mail: apn@nanoq.gl