Qaqortup mittarfia ammarnerata kingorna Kujataani ilaasunik angallassinissaq pillugu tusagassiorfinnut nalunaarut

Qaqortup mittarfia apriilip 16-iani 2026-mi ammarneqarnissaa pilersaarutaasoq Kujataani ilaasut angallanneqarnerannut allannguutinik annertuumik pilersitsissaaq, tamanna aamma kiffartuussinermut isumaqatigissutit takkuttussanut allannguutinik kinguneqassaaq.

Isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisoq, Aqqaluaq B. Egede, imak oqaaseqarpoq:

”Kujataani ilaasunik angallassineq pillugu annertunerusumik paasisaqalersitsiumallunga suliassaq kiisalu Kujataani 2030 tikillugu pingaarnertut ilaasunik angallassinermut suliniutit sunniuteqartussat ersarissarusuppakka.

Qaqortup mittarfia 2026-mi ammarnerata kingorna Kujataani angallasseriaatsip aaqqissuussaanera allannguuteqassaaq. Suliassami tassani najukkami isummat, soqutigisallu akuutinneqarnissaat pingaartittorujussuugakku ersarissassallugu uanni pingaaruteqarpoq. Tamanna pillugu siunissami angallasseriaatsip aaqqissuussaanissaanut najukkami soqutigisallit, inuussutissarsiutillillu isummaminnik, kissaatiminnillu avitsinissaannut periarfissillugit Qaqortumi attaveqaasersuutit pillugit isumasioqatigiisitsinissaq aaqqissuunneqassaaq.”

Qulimiguulimmik angallassineq
Kujataani qulimiguulimmik angallassineq pillugu massakkut isumaqatigiissutaasoq Air Greenland A/S-ip isumagisaraa (angallassinissami suliassaq 7H), tamannalu Qaqortup mittarfia 2026-mi ammarneratigut atorunnaassalluni. Tamanna peqqutaavoq mittarfittaassamik ammaaneq angallasseriaatsimut tamarmiusumut annertuumik allannguuteqarnissaanik naatsorsuutaammat.

Tamatuma kingorna angallassinissami suliassamut kiffartuussinissamik isumaqatigiissutissaq mittarfiup 2026-mi ammarneranit ukiumi ataatsimi atuuttussaq isumaqatigiissutigissallugu Ineqarnermut, Attaveqaasersuutinut, Isorliunerusunullu Naalakkersuisoqarfiup Air Greenland A/S peqatigalugu sulissutigaa. Naalakkersuisoqarfik neqeroorummik Air Greenlandimiit pissarseqqammerpoq, aammalu Air Greenland A/S suleqatigalugu isumaqatigiissumi ukiumi ataatsimi atuuttussami pissutsit inaarutaasussat sularileruttorlugit.

Tamatuma saniatigut pilersaarutaavoq 2026-ip ingerlanerani tamanut ammasumik neqerooruteqartitsisoqassasoq, Kujataani qulimiguulinnik angallassinissamut suliassaq pillugu, piffissami naatsorsuutigineqartumi atuutissaaq 2027-mi ukioq ataaseq isumaqatigiissutip atorunnaarneranit 2030-ip naaneranut.

Kujataani Attaveqaasersuutit pillugit isumasioqatigiisitsinissaq
Najukkameersut peqataatinneqarnissaat qulakkeerumallugu ukiup ingerlanerani Qaqortumi attaveqaasersuutit pillugit isumasioqatigiisitsisoqassaaq. Kujataani qulimiguulimmik angallassinermut suliassap tamanut ammasumik neqeroortitsissutigineqarnissaani atortussat suliarineqarnerini, isumasioqatigiissitsinermit isummat ilaatinneqassasut siunertaavoq.

Imaatigut angallassineq
Malugalugu Kujataani imaatigut angallassineq (angallassinermi suliassaq 7S) pillugu kiffartuussinissamik isumaqatigiissutip 2030-p naanerani atorunnaarnissaata tungaanut Disko Line A/S-imit suli isumagineqassammat. Qaqortup mittarfissaa ammarneratigut angallasseriaatsip allanngornissaa Disko Line A/S-imik kiffartuussinissamik isumaqatigiissummi, angallassinissamik pilersaarummik nutarterinikkut eqqarsaatigineqarnikuuvoq.

Taamaalilluni imaatigut aamma qulimiguulimmik angallassineq marlunnik periutsimik tunngavilimmik ilaasunik angallassisarnissaq Naalakkersuisut suli sulissutigaat. Tamanna pillugu angallasseriaatsit taakkua marluk Kujataani 2030 ilanngullugu atorneqarsinnaassapput, mittarfiullu ammarneratigut naleqqussarneqassallutik.


Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl