Peqqissutsimut inunnullu Innarluutilinnut Naalakkersuisup Nunarsuaq Tamakkerlugu Kræftimut Akiuiniarnermut Ullorititaq Kalaallit Peqqissartut Illuannut pulaarnermigut malunnartippaa

Peqqissutsimut inunnullu Innarluutilinnut Naalakkersuisoq, Anna Wangenheim, Kalaallit Peqqissartut Illuannut Københavnimiittumut Nunarsuaq Tamakkerlugu Kræftimut Akiuiniarnermut Ullorititap ullumi pingasunngornermi malunnartinneqarnerani pulaarpoq. Nunatta inuisa peqqissusaannut nunattalu peqqinnissaqarfianut tunngasuni pissutsit maanna atuuttut, ilaatiguttaaq nunatsinni innuttaasut kræftimik nappaatillit Danmarkimilu peqqissartortaat atukkatigut ajornartorsiutaat periarfissaallu, pulaarnerani ukkatarineqarput.

Peqqissartuttaaq qanigisaallu uummammiorisaminnik Naalakkersuisup pulaarnerani qanimut eqqartueqatiginissaanut periarfissaqarput. Eqqartueqatigiinnerit taakku peqqissartittut qanoq misigisaqarnerannik sunillu pisariaqartitsinerannik pingaarutilinnik paasisaqarfiulluarput, taakkualu isummersuutaat pingaaruteqarmata politikkikkut sulinermi ingerlateqqinneqartussatut erseqqissarneqarput.

Katerinnerannittaaq peqataasut nuannaarutigeqisaannik aliannaarutigeqisaannillu aamma ilungersualeruttornermi piorsarsimassutsikkut ataatsimuualaaqatigiinnissap qanoq pingaaruteqartigineranik ersersitsilluinnartuusumik kalaaliminertoqatigiipput.

Kalaallit kræftimik nappaatillit ilaqutaallu ikiorserneqarnerusalernissaasa sulissutigiuarsinnarnissaa pingaartuusoq, Anna Wangenheimip aamma erseqqissaatigaa:

“Kræftimik akiuiniarnermut tunngasuni pitsanngorsaaniarnermi suleqatigiinnissarput pingaaruteqaqisoq Nunarsuaq Tamakkerlugu Kræftimut Akiuiniarnermut Ullorititaq malunnartinneqaraangat eqqaasinneqartarpugut. Kalaallit napparsimasut – nunatsinni Danmarkimilu – sapinngisamik pitsaanerpaamik katsorsarneqartarnissaat tapersersorneqartarnissaallu qulakkiissavarput. Danmarkimi peqqissutsimut oqartussat suleqateqateqarnerput pingaartuuvoq, suleqatiginerulernissaallu suleqatigilluarnerulernissaannullu siunnerfeqarluta sulivugut.”

Naalakkersuisoq Rigshospitalip peqqissartunut akunnittarfianut ullumi pisussatut pilersaarutit malillugit aamma pulaarpoq. Akunnittarfik taanna nunarpullu tassani init 15-it kalaallinut Danmarkimut peqqissariartunut ilaqutaannullu atukkiunneqartarnissaat pillugit suleqatigiinnissamik isumaqatigiissuteqarput. Tamanna angerlarsimaffimminniit ungaseqalutik imaannaanngeqisumik pisarialimmilli peqqissariartut toqqissillutik aalajangersimasumik inisimaffeqarsinnaanissaannut pingaaruteqarluinnartuusoq erseqqissarneqarpoq.