Qinnuteqartut amerlassusai naatsorsuutigineqaqqaartuniit amerlanerusut – suliassanik suliarinninnermut piffissaq sivitsorneqarpoq

Arnat ulloq 1. januar 1992 peqqinnissamut suliassaqarfiup akisussaaffigilerlugu tiguneqarnerata kingorna arnat akuersitinneqaratik imaluunniit ilisimanngisaminnik naartunaveersaaserneqarsimasut, aningaasaqarnikkut ajunngitsorsiassanik qinnuteqarsinnaanerannut periarfissaq ulloq 31. december 2025 naavoq.

Qinnuteqartut Naalakkersuisut naatsorsuutigisaanniit amerlanerupput, tamatumalu ajoraluartumik kingunerisaanik qinnuteqaatinik suliarinninneq naatsorsuutigineqaqqaartunit paasissutissiissutigineqaqqaartunillu sivisunerusumik ingerlanneqarsimalluni.

Taamaalilluni qinnuteqartut tamaasa ulloq 1. februar 2026 tikitsinnagu qinnuteqaatiminni aalajangiiffigineqarnissaat Naalakkersuisut qulakkeersinnaanngilaat. Qinnuteqaatit tamarmik sukumiisumik, eqqortumik aammalu assigiissaartumik tunngavilimmik suliarineqarnissaat Naalakkersuisut qulakkeertariaqarpaat. Taamaattumik aamma Naalakkersuisut suliassanik suliarinninnermut piffissaq sivitsortariaqalerpaat.

Naligiissitaanermut Naalakkersuisoq, Naaja H. Nathanielsen oqarpoq:

”Arnat naatsorsuutigineqartunit amerlanerusut ajunngitsorsiassanik qinnuteqarsimammata qujanarpoq, aammalu qinnuteqaatit pisariaqartumik sukumiissusilimmik assigiissaartumillu pisariaqartumik suliarineqarnissaatNaalakkersuisut tunngaviatigut pingaartippaat. Taamaattumik neriuutigaara suliassanik suliarinninnerup sivisunerunissaa paasineqassasoq, tassami naatsorsuutigineqartunit suliassat amerlanerusut suliarineqartussaammata. Ilissinnut qinnuteqaammik nassiussisimasunut oqaannassaanga, nalunngilarput ajornaatsuinnaasimanngitsoq, aammalu sapinngisamik piaarnerpaamik naammassinninnissaq qulakkiissavarput.”

Paasissutissanik annertunerusunik piniarnermi: Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik. E-mail: asn@nanoq.gl, oqarasuaat +299 34 50 00.