AtuartigukNeqeroortitsisarfiugallartussamik 2026-mi februaarip aappaani saqqummiussineq
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Pisortat pisiortortarnerini neqeroortitsisarnernut atoruminartumik, ullutsinnullu naleqquttumik digitalikkut aaqqiissuteqarnissaq qulakkeerumallugu, neqeroortitsisarfik massakkut piusoq taarserneqartariaqartoq paasineqarpoq.
Neqeroortitsisarfik Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup 2026-mi februaarip aallaqqaataani Aningaasaqarnermut Sulisoqarnermullu Aqutsisoqarfimmit (ASA-mit) tiguaa. Massakkut neqeroortitsisarfik annertuunik kukkuneqarami, amigaateqarami, isumannaallisaanikkullu unammillernartoqarami ingerlatiinnassallugu illersorneqarsinnaajunnaarpoq.
Tamanna tunuliaqutaralugu massakkut neqeroortitsisarfiusoq 2026-mi februaarip aallaqqaataani atorunnaassaaq. Neqeroortitsisarfissamik nutaamik, ullutsinnullu naleqqunnerusumik suliaqarneq aallartinneqareerpoq, ataavartumillu aaqqiissutissap saqqummiunneqarnissaata tungaanut neqeroortitsisarfiugallartussaq 2026-mi februaarip aappaanit atorneqarsinnaalissalluni.
Neqeroortitsinerit ingerlasut, neqeroortitsinerit naammassereersut, ajugaasullu pillugit paasissutissat 2026-mi februaarip aappaanit nittartakkami Govgen.gl-imi takuneqarallarsinnaalissapput. Inuussutissarsiutinut isaavissaq saqqummiunneqarpat, paasissutissat taakkua tassunga nuunneqassapput.
Neqeroortitsinissamik pilersitsiniarnerit, neqeroorutinillu nassitsiniarnerit ikaarsaarfiup nalaani Sullissivik.gl-ikkoortinneqassapput.
Eqaatsumik ikaarsaarnissaq qulakkeerumallugu Naalakkersuisoqarfiup Digitalinngortitsinermut Aqutsisoqarfik suleqatigalugu neqeroortitsisarfimmik atuisunik ataatsimeeqateqassaaq. Apeqqutit akineqarnissaat kiisalu ikaarsaarnermi, neqeroortitsisarfissallu nutaap pilersinneqarnissaata tungaanut suleriaatsit eqqartorneqarnissaat siunertaavoq.
Neqeroortitsisarfimmi allannguutit akornusiinerat Naalakkersuisoqarfiup ajuusaarutigai. Naleqqussaanerit ulluinnarni ingerlatsinermut unammillernarsinnaammata paasinnilluarpugut.
Neqeroortitsisarfiugallartussamut apeqqutissaqaanni imaluunniit oqaaseqaatissaqaraanni Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik
isiin@nanoq.gl-imut attavigineqarsinnaavoq.