Suliniutit nutaat Kalaallit Nunaanni piffiit akuutinneqarnerat annertuumik nukittorsarpaat

Danskit naalakkersuisui Naalakkersuisullu qanimut suleqatigiillutik Issittumi tunngaviusumik ilinniartitaanermi tiguneqartartut 2026-p aasaaneranit ilinniartunit 30-nit ilinniartunut 50-nut amerlillugit nukittorsarneqarnissaa aalajangerpaat. Tamanna kalaallit inuusuttortaasa akornanni illersornissamik upalungaarsimanermillu piginnaasaqalernissamik annertuumik soqutiginninneq iliuuseqarfiginiarlugu pivoq. Tamatuma saniatigut Forsvarsministeriets Materiel- og Indkøbsstyrelsiata Air Greenlandillu akornanni nunarsuup immikkoortuani alapernaarsuinerup pitsaanerusumik aaqqiissuteqarfiginissaanut timmisartumik attartornissaq pillugu isumaqatiginninniarnerit ingerlanneqarput.

Kalaallit inuusuttortaasa illersornissamut upalungaarsimanermullu piginnaasanik ilinniarusunnerat ikorfartorniarlugu, 2026-mi aasaaneranit Kangerlussuarmi Issittumi tunngaviusumik ilinniartitaanermi ilinniartussatut tiguneqartartut amerlinissaat aalajangerneqarpoq.

Kalaallit inuusuttut amerlanerit Illersornissaqarfimmik ilisimasaqalernissaat, Kalaallillu Nunaanni inuiaqatigiit isumannaatsuunerannik upalungaarsimanermillu nukittorsaanermut iluaqutaasumik piginnaasaqalernissaat, ilinnialertartut amerlinerisa kingunerissavaa.

”Kalaallit inuusuttut taama amerlatigisut Issittumi tunngaviusumik ilinniartitaanermi tiguneqarnissamut qinnuteqarumanerat sapiaassuseqarnerallu pitsaasorujussuuvoq. Taamaammat qanittumi kalaallit inuusuttut suli amerlanerusut ilinniarsinnaanermut iluatsilluarsimasumut periarfissinnissaat nuannaarutigaara,” illersornissamut ministeri Troels Lund Poulsen oqarpoq

”Inuusuttut amerlanerugaluttuinnartut Issittumi tunngaviusumik ilinniarnermik ingerlatsinissamik toqqaasarnerat tulluusimaarutigaara. Tamanna ilinniartitaanerup pitsaasuuneranik, inuusuttattalu nunatta inuiaqatigiillu isumannaatsuunerannut akisussaaffimmik nukittuumik tigusinissamik kissaateqarnerannik takutitsivoq, Naalakkersuisoq Vivian Motzfeldt oqarpoq.

Issittumi tunngaviusumik ilinniarfik 2024-mi Kangerlussuarmi inini iluarsaanneqaqqammisuni 22-nik ilinniartoqarluni aallartippoq. Issittoq Atlantikullu Avannaa pillugu isumaqatigiissutip immikkoortuani siullermi januar 2025-meersumi, ilinniartitaanermi atuaqatigiit aappaannit ilinniartut tiguneqartartut 22-nit 30-nut amerlineqarnissaat aalajangiunneqarpoq.

Ilinniartitaaneq inuusuttunut Kalaallit Nunaanni najugaqartunut atuutsinneqarpoq, taakkulu Kalaallillu Nunaanni illersornissami upalungaarsimanermilu suliassanik isumaginninnissaannut piginnaasaqalersitsisuuvoq. Ilinniartitaaneq Illersornissaqarfimmi ilinniaqqinnissamut periarfissiisuuvoq.

Alapernaarsuinermik suliassat tiguneqarnissaat pillugit Air Greenlandimik isumaqatiginninniarneq
Isumaqatigiissuteqartut Naalakkersuisullu Issittoq Atlantikullu Avannaa pillugu isumaqatigiisutip immikkoortuani siullermi timmisartut Challengerit atorunnaarsikkiartuaarnissaat, taarsiullugulu Issittumi alapernaarsuinermik annaassiniartarnermillu suliaqarneq inuinnaat ingerlatsisut peqatigaglugit aaqqiivigineqarnissaa aalajangerneqarpoq. Kalaallit Nunaanni pissutsinik immikkuullarissunik timmisartornermik misilittagaqartunik suleqateqarnissap pinissaa pingaartinneqarpoq.

Tamanna tunuliaqutaralugu Forsvarsministeriets Materiel- og Indkøbsstyrelsep Air Greenlandillu akornanni isumaqatiginninniarnerit maanna ingerlanneqarput.

”Issittumi Atlantikullu Avannaani isumaqatigiissutip immikkoortuani siullermut ilagitillugu Kalaallit Nunaanni piffinni ingerlatsisunik suleqatigiinnissamik isumaqatigiissutinik pilersitsinissaq isumaqatigiissuteqartunit taperserneqarpoq. Taamaammat Issittumi Atlantikullu avannaanni taassumalu eqqaani alapernaarsuinermik suliassap pingaarutillip Illersornissaqarfiup suliarineqarsinnaanera pillugu Illersornissaqarfiup Air Greenlandimik attartornissamik isumaqatigiissuteqarsinnaanera, iluarisimaartupilussuuara,” illersornissamut ministeri Troels Lund Poulsen oqarpoq.

“Air Greenlandip Issittumi alapernaarsuinermik annaassiniartarnermillu sulianut peqataaqataasinnaanera, Illersornissaqarfik suleqatigalugu civil dual-usemik naammassinnissinnaassutsimik suleqatigiinnermut atorneqarsinnaasumik takutitsisuuvoq. Tamatuma aamma Kalaallit Nunaata illersornissamik isumaqatiginninniarnernut peqataasinnaanerata pingaarutaa aamma takutippaa, taamaaliornermilu aamma tusarneqarnissamut siunnersuutittalu Illersornissaqarfiup ataatsimut Kalaallit Nunaanni suliassanik isumaginninneranut atatillugu ilanngunneqarsinnaanerannut periarfissiivoq”, Naalakkersuisoq Vivian Motzfeldt oqarpoq.

Timmisartut 2027-p naannginnerani atorneqalersinnaanerat ilimagineqarpoq. Isumaqatigiissummut tunngavissiap sioqqutsisumik Folketingimi Finansudvalgimit akuerineqarnissaa tunngavissaatinneqarpoq.