AtuartigukNaalakkersuisup aamma Inuussutissarsiortut aqutsisuisa akornanni ataatsimeeqatigiinneq
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen tallimanngornermi ulloq 23. januar, nunatsinni inuussutissarsiornermi aqutsisunik, ilaatigut Sulisitsisut aallartitaannik, ilisimatitsilluni ataatsimeeqateqarpoq.
Ataatsimiinnerni oqaloqatigiilluarneq malunnarpoq aammalu nunatsinni inuussutissarsiortut nukinginnartumik siooranartorsiornerat takuneqarsinnaanngitsoq ersarissumik nalunaarutigineqarluni. Suliffeqarfiit ataasiakkaat sullitaminnik ernumasunik naapitaqarsimapput, kisianni ernumaneq taanna iliuuseqarfigineqarpoq aammalu ataatsimut isigalugu annertuumillu ajornartorsiutaanngitsoq tassani pineqarpoq.
Naalakkersuisut inuussutissarsiortullu akornanni attaveqaqatigiinneq aalajangiusimaneqassasoq aammalu immikkut eqqumaffigineqarnerup taassuma malitsigisaanik inuussutissarsiornerup nunattalu ineriartortinneranni periarfissaalersut atorluarneqassasut.
Avatangiisitsinniit ukkatarineqarpugut. Maannakkorpiaq annertuumik sunniinerlunnerit takuneqarsinnaanngillat. Soorunami ungasissumut sunniutaasussat suli ilisimanngilagut, taamaattumillu nunatta nuannersumik nittarsaattarnissaata siunnerfilimmik sulissutiginissaa suli pingaaruteqarpoq.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:
”Periarfissaq iluatsillugu nunatsinni inuussutissarsiortut qutsavigerusuppakka. Tamarmik imminnut oqaloqatigiinnissartik immikkut sulissutigisimavaat aammalu piffissami nalorninartorsiorfiusumi sulisuminnik tapersersuiniarlutik immikkut ittumik suliniuteqarsimasut malugaara. Ataatsimooqatigiinneq takutinneqartoq nuannaarutigaara. Nunanit tamalaanit ukkatarineqarnerulernerput atorluassavarput, tamannalu ataasiakkaatigut periarfissanut atussallutigu. Nunarput patajaassuseqarnerpullu aammalu periarfissagut sakkortuumik upperaagut.”
Inuussutissarsiortut aammalu Naalakkersuisup aningaasaliinernut aammalu Kalaallit Nunaanni inuussutissarsiortuni aningaasaqarnikkut ingerlatanut tunngatillugu toqqissisimanngitsoqarneranut takussutissaqannginnera toqqissisimanartutut isigaat.
“Aningaasaliinerit paasiuminartumik akisussaassusilimmillu atugassaqartitsilluni, nunatsinni inatsisit najukkanilu innuttaasut ataqqillugit ingerlanneqarpata, taakkua ammaffigaagut.”
Christian Keldsen, Sulisitsisut pisortaat, oqarpoq:
”Kalaallit Nunaanni inuussutissarsiortut allanngoriartortitsinissaq piareersimaffigaat, aammalu oqartussat inuussutissarsiortullu akornanni oqaloqatigiinnermi piffissaagallartillugu peqqissaartumik ingerlanermi sapaatit akunnerini kingullerni oqariartuutigineqartartut pineranni aqutsisoqarsinnaasimavoq. Tamanna pisut sapinngisamik pitsaanerpaamik atorluarnissaannut tunngavissaqalersitsivoq sulisutsinnilu eqqissisimatitsilluni”
Paasissutissanik annertunerusunik piniarnermi: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik. Email: isiin@nanoq.gl, oqarasuaat +299 34 50 00.