Præsident Trumpip NATO-llu generalsekretæriata Mark Rutte ataatsimiinnerata kingorna Nunanut Allanut Ilisimatusarnermullu Naalakkersuisup Vivian Motzfeldt oqaaseqarnera

Danskit illersornissamut ministeriat Troels Lund Poulsen ilagalugu NATO-p generalsekretær-ia Mark Rutte Bruxelles-imi ataasinngormat ataatsimeeqatigaara. Ataatsimiinnermi Kalaallit Nunaata Danmarkillu killeqarfii, Kunngeqarfiup nunataanik, nunat illersorneqarnerinik aamma inuiaat kalaallit namminneq aalajangiisinnaanerinik imalik oqariartuutigaavut.

NATO-p Issittumi najuunnerunissaanik pisariaqartitsineq aamma eqqartorparput, aamma nunat killiit iligiinnut akeraasut Kalaallit Nunaannut sunniuteqannginnissaat qulakkeerniarlugu suleqatigiinnerup qulakkeerneqarnissaa kissaatigalugu oqariartorluta.

NATO-p generalsekretær-ia Mark Rutte Davos-imi Nunarsuaq tamakkerlugu Aningaasaqarneq pillugu isumasioqatigiinni (World Economic Forum-imi) Præsident Trump-imik naapitsereernerata kingorna oqarasuaatikkut ippassaq oqaloqatigivara.

Erseqqissassavara NATO Kalaallit Nunaat sinnerlugu isumaqatiginninniarnikuunngimmat. Naalakkersuisut peqataatinnagit Kalaallit Nunaat pillugu pisortatigoortumik isumaqatigiissusiortoqarnikuunngilaq. Danskit naalakkersuisui ataatsimiinnermi aamma sinniisuutitaqarnikuunngillat.

Naalakkersuisut NATO-p generalsekretær-ia Kalaallit Nunaat sinnerlugu isumaqatiginninniaqqunikuunngilaat, taamaattorli generalsekretær-ip Præsident Trump-imut toqqaannartumik inissisimaffitsinnik killeqarfiillu ataqqineqarnissaannik paasissutissiisimavoq.

Uanga isiginnittariaatsinnit Davos-imit nutaarsiassat pitsaasuupput. Taamatut oqareerlunga suli sillimasariaqarpugut, aamma isumannaatsumut pinissatta tungaanut suli suliassaqarnerput qularnanngilaq.

Suleqatigiissitaq pilersinneqartoq ataatsimiilluni aallartereernikuusoq uppernarsarsinnaavara.