Upalungaarsimanermut suliaqarfimmi suleqatigiinneq Kalaallit Nunaata Danmarkillu nukittorsarpaat

Upalungaarsimanermi suliaqarfik nukittorsarniarlugu Danmarkimi oqartussat atortunik siunnersuisussanillu Kalaallit Nunaannut tapersersuipput. Tamannalu Naalakkersuisut kissaateqarnerisigut pissaaq.

Danmarkimi Kalaallit Nunaannilu oqartussat akornanni upalungaarsimanermut suliaqarfimmi suleqatigiinneq tapersersuinerup ikiuinerullu annertusaqqinnerisigut nukittorsarneqarpoq.

Danmarkimi inuiaqatigiit isumannaatsuunissaannut upalungaarsimanermullu ministerip, Torsten Schack Pedersenip, aamma Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisup, Peter Borgip, ataatsimiinnerisa kingorna Kalaallit Nunaannit noqqaassuteqartoqarnerata kingorna tamanna pivoq.

Siunnersuisarneq, ilinniartitaaneq, upalungaarsimaneq ajornartoornermilu aqutsinermik sungiusarnerit pillugit Kalaallit Nunaanni Danmarkimilu oqartussat akornanni suleqatigiinnerup pioreersup qanittullu annertusaqqinneratigut iliuusissat ingerlanneqassapput.

Danmarkip tungaanit tapersersuinerit ikiuinerillu pineqartut tassaapput:

• Kalaallit Nunaanni kommunit ingerlatsinikkut upalungaarsimanerannut ikiuineq
• Kalaallit Nunaanni oqartussat tapersersornissaannut upalungaarsimanermik immikkut ilisimasallit
• Isumannaatsumik attaveqaqatigiinneq allallu pillugit siunnersuineq
• Attaveqaasersuutit pingaarutillit isumannaarnissaat pillugu siunnersuineq
• Ajornartoornermi attaveqaqatigiinneq pillugu immikkut ilisimasat
• Ajornartoornermi aqutsinermi immikkut ilisimasat
• Mobilit tunngavigalugit kalerrisaarinermut systemip S!RENEN-ip atulersinneqarnissaa
  
  

Peter Borg oqarpoq:
”Kalaallit Nunaanni upalungaarsimaneq ingerlalluartoq pigaarput, aamma Danmarkimi oqartussanit tapersorneqarluta upalungaarsimanermi pisinnaasat nukittorsaqqissinnaanerat pitsaalluinnartuuvoq. Danmarkimik suleqateqarnitsigut suliatigut ilisimasat piginnaasallu, siunnersuinerit atortussallu ilaqqissinnaavagut – upalungaarsimanermi suliaqarfimmi nammineq akisussaaffeqarnerput oqartussaaffeqarnerpullu qasukkanngikkaluarlugit. Naalakkersuisut sinnerlugit naqissuserusuppara Nunatsinni upalungaarsimanerup nukittorsarnissaanut Danmarkimit tapersersorneqarnerput iluarisimaarluarisimaaratsigu.”

Torsten Schack Pedersen oqarpoq:
”Kalaallit Nunaat upalungaarsimanermut tapersersorneqarnissaminik noqqaassuteqartillugu soorunami piareersimavugut. Kunngeqarfik tamakkerlugu upalungaarsimaneq nukittooq pigisussaavarput, Kalaallit Nunaannilu inuiaqatigiit isumannaatsuunissaannik upalungaarsimanermillu Danmarkimilu oqartussat akimorlugit tapersersuisinnaanerput nukittorsaasinnaanerpullu nuannaarutigaara.”

Attaveqarfissat
Inuiaqatigiit Isumannaatsuunissaannut Upalungaarsimanermullu Ministereqarfimmi tusagassiortunut piareersimasuutitaq oqarasuaatikkut 24 42 09 99-imut attavigineqarsinnaavoq (Sianerluni - sms-ikkuunngitsoq).

Pinngortitamut Avatangiisinullu Naalakkersuisoqarfik attaveqarfigineqarsinnaavoq pan@nanoq.gl-ikkut.