Erfalasulertarnermut malittarisassat Namminersorlutik Oqartussat oqartussaaffigilerpaat

Naalakkersuisunut Siulittaasoq Jens-Frederik Nielsen aamma inatsisinik atuutsitsinermut ministeri Peter Hummelgaard isumaqatigiissut atsiorpaat ataatsimullu oqariartuuteqarlutik, tassanilu Kalaallit Nunaanni erfalatsertarnermut malittarisassat oqartussaaffigilernissaannut Namminersorlutik Oqartussanut isumaqatiginninniarnerit naammassillugit.

Naalakkersuisut Siulittaasuat Jens-Frederik Nielsen aamma inatsisit atuutsinnerannut ministeri Peter Hummelgaard Kalaallit Nunaanni erfalatsertarnermut malittarisassat Namminersorlutik Oqartussanit akisussaaffigilerneqarnissaat isumaqatigiissutigaat.

Akisussaaffimmik tigusinerup malitsigissavaa Namminersorlutik Oqartussat siunissami kalaallit erfalasuata Erfalasutta ilusilersornissaanik kiisalu Kalaallit Nunaanni nunat allat erfalasuinik atuinissamut malittarisassiorsinnaalissapput. Taamaattoq Dannebrog-mut tunnganngilaq, tassa taanna Inatsisit atuutsinnerannut Ministereqarfiup naalagaaffittut suliassaaniimmat, soorluttaaq Savalimmiut erfalasuat Merkið Kalaallit Nunaanni atornissaa immikkut akuersissuteqanngikkaluarluni atorneqarsinnaassasoq.

Naalakkersuisut Siulittaasuat Jens-Frederik Nielsen ima oqarpoq:

– Oqartussaaffiit amerlanerit oqartussaaffigilissagivut pissusissamisuuginnarpoq. Oqartussaaffimmik taassuminnga tigusineq inatsiseqartitsinikkut annertuumik suliassaqarfiunngilaq, isumaqartorujussuullunili, tassami Erfalasorput pineqarmat. Siunissaq isigalugu suliassaqarfitsinnik aaqqissugaanerusumik, pingaarnersiuinikkut siunertanullu tulluunnerusumik tigusisarnissarput pilersaarusiussavarput.

Inatsiseqartitsinermut ministeri Peter Hummelgaard ima oqarpoq:

– Iluarisimaarluarpara ataatsimoorluta aaqqiissuteqarsinnaagatta, taamaaliorluta Kalaallit Nunaata Kalaallit Nunaanni erfalatsertarnerup akisussaaffigilersinnaanera angullutigu. Kalaallit erfalasuat kinaassutsimut namminersornermullu oqartussaanermut ilisarnaataavoq sakkortooq, taamaammallu Namminersorlutik Oqartussanit akisussaaffigilerneqarnera pissusissamisoortuulluni. Aamma Dannebrog-ip Savalimmiullu erfalasuata Merkið-ip Kalaallit Nunaanni atorneqartarnerat eqqarsaatigalugu naalagaaffeqatigiinnik ataqqinnittumik aaqqiissuteqarpugut. Naalakkersuisut suleqatigiinnarnissaat qilanaaraarput.”

Inatsisinik atuutsitsinermut Ministerieqarfik Naalakkersuisullu isumaqatigiissutigaat erfalatsertarneq pillugu suleqatigiinnertik ingerlatseqqinniarlugu, aamma akisussaaffiup tigoreerneranit.

Isumaqatigiissut uani atuaruk Namminersorlutillu Oqartussat erfalatsertarnermut oqartussaaffimmik tigusinerat pillugu ataatsimut oqariartuut uani. 

Tunuliaqut

Namminersorlutik Oqartussat Kalaallit Nunaanni umiarsuarnilu Kalaallit Nunaanni angerlarsimaffeqartutut nalunaarsoqqasuni kalaallit erfalasuannik atuinissamut malittariassiorsinnaapput. Namminersorlutik Oqartussat erfalatsertarnermut malittarisassanik tigusinerata kingorna kalaallit erfalasuata, Erfalasutta, ilusilersornissaanut malittarisassanik aamma tigusineruvoq, kiisalu Kalaallit Nunaanni nunat allat erfalasuinik, Dannebrogiunngitsunik erfalatsertarnernut tunngasunut malittarisassat ilanngullugit. Nunanit allanit erfalasut Kalaallit Nunaanni atorneqartarnerannut tunngatillugu Naalakkersuisut Siulittaasuat Inatsisinillu atuutsitsinermut ministerip, ataatsimut oqariartuut malillugu, isumaqatigaat naalagaaffeqatigiinnermut mianerinninniarluni kiisalu Kunngip peqqussutaa nr. 373 27. august 1948-meersoq malillugu pingaartumik savalimmiormiut erfalasuata akuerineqarnera malillugu Savalimmiormiut erfalasuat Merkið Kalaallit Nunaanni atorneqarsinnaanera immikkut akuersissuteqaqqaarani pisinnaassaaq. Naalakkersuisut Siulittaasuat aamma Inatsisinik atuutsitsinermut Ministerip isumaqatigiissutigaat inatsimmik nr. 222, 6. juni 1985-meersumi § 4-mik ingerlatitseqqinniarlutik, kalaallit erfalasuat immikkut pillugu, immikkut akuersissuteqaqqaarani naalagaaffiup sinnerani kalaallit erfalasuanik atuisoqarsinnaanera pisinnaalersillugu. Kiisalu Naalakkersuisut Siulittaasuata Inatsisinillu atuutsitsinermut ministerip isumaqatigiissutigaat erfalasulertarnermut oqartussaaffimmik tigusineq "Umiarsuarnik nalunaarsuisarnermut imarsiornermilu inatsisitigut malittarisassat" pillugit suliassaqarfimmik ilaqanngitsoq.

Tunuliaqutaasut sukumiinerusut piniarukkit – isumaqatigiissutip ataatsimullu oqariartuutip saniatigut – Inatsisinik atuutsitsinermut ministerip allakkiaa 10. august 2025 -meersoq Kalaallit Nunaanni erfalasulertarnermut malittarisassat pillugit allakkiaq innersuunneqarpoq, ataatsimut oqariartuutip saniatigut isumaqatigiissummut ilanngussaasoq. Allakkiaq atuarneqarsinnaavoq uani.