Kangersunerup Kangerluani erngup nukinga atorlugu innaal-lagissiorfissamik pilersitsinissaq ASN-imit akuersissutigineqar-роq

Qasigiannguit Aasiaallu erngup nukinga atorlugu nukissiorfissaannut ASN-imut akuersissutissat Naalakkersuisunit 8. december akuersissutigineqarput. Akuersissutit sanaartortitsisumut NunaGreen A/S-imut tunniunneqarput. ASN-imut akuersissut ASN-imut nalunaarusiaq kiisalu piffissami 8. majimit 3. juli 2025-imut tamanut tusarniaasimaneq aallaavigalugit tamanut nalunaarutigineqarput.

"Qasigiannguanut Aasiannullu innaallagissamik pilersuisussamik Kangersunerup Kangerluani erngup nukinga atorlugu innaallagissiorfissaq Kommune Qeqertaliup attanneqarsinnaasumik, mingutsitsinngitsumik isumannaatsumillu innaallagissamik pilersorneqalernissanut alloriarneruvoq pingaarutilik. ASN-imut akuersissuteqarnitsigut avatangiisit mianeralugit ataqqillugillu innaallagissiorfiliortoqartussanngorpoq", taamak oqarpoq Aalisarnermut, Piniarnermut, Nunalerinermut, Imminut Pilersornermut Avatangiisinillu Naalakkersuisoq Peter Borg.

ASN sunaava?
ASN tassaavoq Avatangiisinut Sunniutaasinnaasunik Nalilersuineq. ASN pillugu nassuiaat suliniutip avatangiisitigut sunniutaanik aaqqissugaasumik misissuinernik imaqassaaq. ASN pillugu nassuiaat avatangiisinut pitsaanngitsumik sunniutissat iliuuseqarfiginissaannut suliniutissatut siunnersuutinik aamma imaqassaaq.

ASN akuersissut sunaava?
ASN-imut nalunaarusiaq aallaavigalugu sanaartornermi avatangiisitigut sunniutissat akuersaarneqarsinnaaneri aammalu VVM akuersissummi piumasaqaatissat Naalakkersuisunit isummerfigineqartarput. Inatsisitigut tunngavissat ASN-imut tunngasut makkunatigut maleruagassiuunneqarsimapput:

• Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq.
• Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq (kapitali 8).
  
  

Naammagittaalliorsinnaatitaaneq
Aalajangikkat pillugit naammagiittaalliutaajunnartut Avatangiisinut Pinngortitamullu Naalakkersuisoqarfimmit, Postboks 1614, 3900 Nuuk, imaluunniit pan@nanoq.gl kingusinnerpaamik 29. januar 2024 tiguneqareersimassapput. ASN akuersissutit uani atuarsinnaavatit.

Attavissaq
Paasisaqarnerorusukkuit Pinngortitamut Avatangiisinullu Naalakkersuisoqarfik pan@nanoq.gl-imut attavigiuk