Inuiattut ataatsimoorpugut

Kalaallit Nunaani partiini siulittaasuusugut aammaartumik Nunatta USA-miit tatineqannginnissaa naqissuserusupparput.

Ameerikkamiuunianngilagut, qallunaajunianngilagut, Kalaaliuniarpugut.

Kalaallit Nunaat tassaavoq nuna Namminersorneq pillugu Inatsit malillugu tamat oqartussaaqataanerat aqqutigalugu aqunneqartoq. Naalakkersuisut Inatsisartullu Nunatsinni innuttaasut qinigaattut sulipput tassanilu USA nunallu killiit nunatta qanimut suleqatigalugillu suleqatigiuagassarai.

Nunatta siunissaa Inuiaat Kalaallit namminneq aalajangigassaraat. Nunat tamalaanit inatsisit naapertorlugit aammalu Namminersorneq pillugu inatsit aallaavigalugu aqqut tamanna suliaraarput innuttaasullu peqatigalugit tunngavissiortussaallugu. Nunat kikkuugaluartulluunniit tamanna akuleruffissarinngilaat. Nammineerluta nunatta siunissaa qanoq iluseqassanersoq allaniit nukingisaarneqarata, kinguarsarneqarata akuleruffigineqaratalu aalajangissavarput.

Nunarsuarmi pisunut akisussaaqataanerput akuunerpullu ukiuni kingullerni annertusarsimavarput. Tamanna pisortatigoortumik nunallu tamalaat akunnerminni periusaat atorlugit ataqqeqatigiinnermik tunngaveqartumik ingerlappagut tamannalu ingerlatiinnassallutigu.

Aammaartumik kajumissaarutigissavarput ataqqeqatigiinnermik tunngavilimmik, pisortatigoortumik nunallu tamalaat akunnerminni periusaat atorlugit oqaloqatigiinnerit ingerlanneqarnissaat. Iligiittut ikinngutigiittullu tamanna aqqutissaavoq.

Taamaattumik ataatsimoorfigaavut:

• Nunat iligisavut suleqativullu qanimut sakkortusisamillu oqaloqatigineqarlutillu paaseqatigineqarnissaat suliarineqassasoq.
• Inatsisartut ataatsimiinnissaat siuartinneqajallassasoq. Nunatta politikkikkut torersumik ataatsimoorfissarsiorfiusumillu oqallittoqarnissaa tunngavissikkumallugu.
• Pisuni imaannaanngitsuni Inuiaat Kalaallit ajugaasussanngortinnissarput qulakkeerneqassasoq.
• Sineriapput tamakkerlugu nunatta iluaqutigisaanik toqqissisimanissaannillu anguniagaqartuassasugut
  
  

Ataatsimoorpugut Nunatta qaqugumut Inuiaat Kalaallinit nunagineqartuarlunilu nammineq aalajangiiffigineqartuarnissaanut.

Kalaallit Nunaat Kalaallit Pigaat.


Jens Frederik Nielsen, Demokraatit
Pele Broberg, Naleraq
Múte B. Egede, Inuit Ataqatigiit
Aleqa Hammond, Siumut
Aqqalu C. Jerimiassen, Atassut