Sapaatip akunnerata naanera alianartoq: Nuna tamakkerlugu ikiortissaqarlunilu pinaveersaartitsinerit ingerlanneqarput

Kalaallit Nunaani politiit nalunaarput sapaatip akunnerata naanerani tassalu 19. december aamma 22. december 2025 akornanni inuit arfinillit nunatsinni inoqarfinni assiginngitsuni alianaraluaqisumik imminut toqussimasut. 

Meeqqaanut, Inuusuttunut, Ilaqutariinnut Nunamilu Namminermi Naalakkersuisoqarfimmit qimataasut misiginneqatigaagut  ikiorneqarnissamullu aammalu pinaveersaartitsinissamik suliat ingerlareersut innersuussutigissallugit - tassaasut Tusaannga, Inulerivik, Qamani App, Politiit Peqqinnissaqarfillu.

Meeqqaanut, Inuusuttunut, Ilaqutariinnut Nunamilu Namminermi Naalakkersuisoqarfimmit pisumi alianaqisumi qimataasut eqqugaasullu annertuumik misiginneqatigaagut. Ilutigalugu inuit ajornartorsiutillit ikiorneqarneqarnissamik ikorfartorneqarnissamillu periarfissaqareernerat ilungersunartunillu eqqarsaateqaraanni avitseqateqartarnissap pisariaqassusaa erseqqissaatigissavarput.

”Alianarluinnarpoq. Ilaqutaasunut, ikinngutaasunut najugaqataasunullu qamannga pisumik misiginneqataavugut. Annaasaqarnerat oqimaaqaaq, annaasaqartut maanna tupaqqasut toqqissisimanngitsullu eqqarsaatitsinniipput. Meeqqanut inuusuttunullu oqaasissaqarpunga: naak maanna taarsioraluaqaluta, suli neriuutissaqarpugut. Neriuut taanna tamatsinniippoq – tapersersoqatigiinnikkut ataatsimooqatigiinnikkullu, aamma annernaraluaqisoq nipituumik oqaluuserinissaa iluaqutaavoq. Oqaasimininnguit annertuumik sunniuteqarsinnaapput. Oqilisaataasinnaapput eqqarsarluarnissamullu piffissaliisinnaallutik.  Tassanngaannaq pisoqartillugu kiisalu siunnersorneqarnissamik katsorsarneqarnissamilluunniit pisariaqartitsisoqartillugu ikiortissaqartuarnerata eqqaamaneqarnissaa pingaaruteqarpoq” taamak oqarpoq Naalakkersuisut Siulittaasuat, Jens-Frederik Nielsen 

Imminut toqussimasunut angajoqqaajusunut, aanaakkuusunut aataakkuusunullu qanigisaasunullumi tamanut misigisat qanoq oqimaassimatisimanissaat eqqarsaatigissalluguluunniit annernarpoq – pingaartumiik meerartavut inuusuttortavullu pineqartillugit. Meeqqamik annaasaqartut kisimiittutut misigisimassanngillat. Taamaattumik najugaqarfinni ataasiakkaani nunalu tamakkerlugu ikiorneqarnissamik pisariaqartitsisut ikiorneqarnissamut neqeroorutinik atuisarnissaanik aammalu inuttut ataatsiakkaatut inunnik ajornartorsiutilinnik naapitsigaangatta assammik isaassilluta ikiuisarnissarput kaammattuutigissavara. Angajoqqaat oqimaatsunik eqqarsaateqartartunik meerartallit inuusuttortallillu inuunerup ingerlaqqinnissaanut pisariaqartumik pineqartunik oqaloqateqartarnissaat kaammattuutigissavarattaaq. Aamma massakkoqqissaaq juullip nalaani tipaatsualaarnissatsinnut tunissutissarsiorlutalu ulapileruttorfitsinni. Susoqaraluarpalluunniit eqqaamasariaqarparput inuunitsinni pingaarnerpaasut tassaammata inoqativut – ullullu ataatsimoorfigisinnaasavut.”
Peqqissutsimut Inunnullu Innarluutilinnut Naalakkersuisoq, Anna Wangenheim oqarpoq.

Ikiorsiissutitut pinaveersaarutitullu neqeroorutit:

Tusaannga – kinaassuseq isertuullugu akeqanngitsumillu siunnersuineq

Tusaannga oqarasuaatikkut kinaassuseq isertuullugu akeqanngitsumillu attavigineqarsinnaavoq 80 11 80. SMS-ertoqarsinnaavortaaq uunga 1899 imaluunniit Tusaanngap nittartagaa aqqutigalugu siunnersorti ulloq unnuarlu chatseqatigineqarsinnaavoq. Nittartagaq: https://tusaannga.gl/

Inulerivik – siunnersuineq katsorsaanerlu

Inulerivik meeqqanut, inuusuttunut inersimasunullu ikiortariaqartunut siunnersuinermik katsorsaanermillu neqerooruteqarpoq, matumani ilanngullugit ajornartoornerit, sakkortuumik misigisaqarnerit tarnikkullu atugarliornerit.  Neqeroorut sumiiffillu apeqqutaatillugit ornigulluni internetsikkulluunniit attaveqarnissaq periarfissaavoq. Oqarasuaat: (+299) 34 67 10. Nittartagaq: https://inulerivik.gl/

Qamani App – ulluinnarni ikiuutissaq

Qamani App tassaavoq sakkussaq digitaliusoq saqqummerlaaq sungiusaatinik ilisimasanillu imalik, eqqarsaatit misigissutsillu atornartut suliarinissaannut iluaqutissiaq.  App’i oqaloqatigiinnerit siunnersorneqarnerillu saniisigut atorneqarsinnaavoq saaffissallu eqqortut tassani nanineqarsinnaallutik.

App Store (iPhone/iPad): 
https://apps.apple.com/dk/app/qamani-app/id6756285852?l=da App Store
Google Play (Android):
https://play.google.com/store/apps/details?id=gl.socialstyrelsen.qamaniapp play.google.com

Imminnut toqunnissamik eqqarsaateqaruit taamatulluunniit atugaqartumik nalunngisaqaruit
Imminnut toqunnissamik eqqarsaateqaruit taamatulluunniit atugaqartumik nalunngisaqaruit ikiortissarsiorit. Politiit peqqinnissaqarfilluunniit attavigisinnaajuaannarpatit. Tusaannga attavigisinnaavattaaq uunga 80 11 80 (akeqanngitsumik kinaassutsillu isertuullugu), SMS uunga 1899 imaluunniit siunnersorti chatseqatigalugu.

Najukkanni peqqissaavik nakorsarluunniit attavigiuk nalilersortikkusukkuit tarnikkullu ikiorneqarusukkuit. Tassanngaannaq pisoqartillugu ernumassuteqaruit politiit peqqinnissaqarfilluunniit attavigisinnaavatit. 

Attavissat
Sukumiisumik paasisaqarusukkuit naalakkersuisup allattaa  Andreas Poulsen e-mailikkut andp@nanoq.gl  imaluunniit oqarasuaatikkut: +299 34 5280 attavigiuk. +299 34 5280. Imaluunniit Peqqissutsimut inunnullu Innarluutilinnut Naalakkersuisoqarfimmi pisortaaneq Aka Olesen, oq: +299 49 26 08 Email: akos@nanoq.gl