Nutarterineq akuersissutigineqarpoq: Kalaallit Nunaata kitaani avataasiorluni qaleralinniarluni aalisarnermi aqutsinissamut pilersaarut

Kalaallit Nunaata kitaani avataasiorluni qaleralinniarluni aalisarnermi aqutsinissamut pilersaarut Naalakkersuisut ulloq 18. december 2025 akuersissutigaat. Taanna 1. januar 2026-mit atuutilissaaq.

Kalaallit Nunaata kitaani qaleralinniarluni aalisarneq pillugu aqutsinissamut pilersaarut 2025-p naanerani atorunnaassaaq, taamaattumillu nutarterneqarluni. Aqutsinissamik pilersaarut nutaaq, nutaanngitsumut sanilliullugu allannguutinik arlalinnik imaqarpoq. Ilisimatuussutsikkut siunnersuineq pillugu immikkoortumi ilanngussisoqarnikuuvoq, tassani siunnersuinermi periuseq taassumalu sanilliussinermi immikkoortui nassuiarneqarput. Tamatuma saniatigut pisarineqarsinnaasut tamarmiusut aalajangersarneqartarnerat pillugu immikkoortumi allannguinerit pisimapput, taakkunani pisarineqarsinnaasunut tamarmiusunut sunniuteqarsinnaasut pissutsit suunersut nassuiaateqarfigineqarlutik. 
Kalaallit Nunaata kitaani qaleralinniarluni aalisarneq, piujuartitsinermut uppernarsaammik Marine Stewardship Council-imit (MSC) tunineqarnikuuvoq, aalisarnermullu aqutsinissamut pilersaarut uppernarsaatip pigiinnarnissaanut tapersiisarpoq.

Aqutsinissamut pilersaarut Aalisarnermut siunnersuisoqatigiinnit ilaasortaqartumit suleqatigiissitamit suliarineqarnikuuvoq, matumunnga ilaapput, Sulisitsisut, KNAPK, SIK, Sustainable Fisheries Greenland, Royal Greenland A/S, Sigguk A/S, Polar Seafood Greenland A/S, Kommuneqarfik Sermersooq, Oceans North Kalaallit Nunaat, Aningaasaqarnermut Akileraartarnermullu Naalakkersuisoqarfik, Pinngortitamut Avatangiisinullu Naalakkersuisoqarfik, KANUAPNA aamma Pinngortitaleriffik. Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik immikkoortortaavoq ataqatigiissaarisuunikuusoq. Taakku saniatigut aqutsinissamut pilersaarut tusarniaanermut nittartakkami piffissami 6. oktober-3. november 2025-mi tamanut tusarniutigineqarnikuuvoq. 

Aqutsinissamut pilersaarut takuneqarsinnaavoq uani Aqutsinissamut pilersaarutit (naalakkersuisut.gl)

Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl