USA-p Immikkut aallartitaa Jeff Landry pillugu nutaarsiassamut Nunanut Allanut Ilisimatusarnermullu Naalakkersuisup Vivian Motfeldtip oqaaseqaataa

 USA Nunatsinnut immikkut aallartitaqalernissaanik pilersaaruteqarneq pillugu Naalakkersuisut ilisimatinneqarnikuunngillat. Qanittumi USA-p Kunngeqarfimmut aallartitaat Kenneth Howery naapipparput ilisimatinngilaatigullu taamatut pilersaarusiortoqartoq. Tamanna tatiginninnermik takutitsinerunngilaq.

Nunatsinnili allanngortoqanngilaq. Nunatta siunissaa inuiannit kalaallinit aalajangerneqassaaq. Danskiunngilagut. Amerikkarmiuunngilagut, tamannalu kissaatiginagu. Inuiaat Kalaaliuvugut. Nunarput pigaarput allat aqulernavianngilaat pigilernavianngilaallu. 

Issittumi sillimaniarneq illersornissarlu eqqarsaatigalugit Nunatta USA-lu suleqatigiinnissaq pisariaqartippaat. Suleqatigiinneq pissaaq politikkikkut immitsinnut kiinnerluta ataqqeqatigiillutalu nunallu tamalaat akornanni inatsisit tamallu oqartussaaqataanerat ataqqillugit. Tusagassiutitigut suleqatigiinnissamut ajoqutaasunik oqariartuuteqaqattaarneq tatigeqatigiilluni nunatta akornanni suleqatigiinnerulernissamik kissaammut innarliivoq. 

Uagut politikkikkut naapissinnaavugut naatsorsuutigaarpulli USA-p demokratiskimik ingerlatsineq ilisimaarilluaraa ilisimassagaalu nunatta politikkikkut inissisimaffia suullu pingaartitarinerivut. Naatsorsuutigaarput angusaqarfiusussamik  ataqqinnittumillu oqaloqatigiinnittoqarumaartoq. Naatsorsuutigaarpullu piffissami aggersumi amerikarmiut akunnerminni ataqatigiissaakkamik oqariartuuteqartassasut.

Tamassi juullimi pilluarnissassinnik kissaateqarlunga.

Annertunerusumik paasisaqarusunnermi attavissaq: Naalakkersuisup allattaa Rosa Thorsen, rsth@nanoq.gl , +299 553303