Innaallagissamut imermullu akigititanik 1. januar 2026-miit atuutilersussamik naligiissaarinissaq

Naalakkersuisunit akuerineqarpoq innaallagissamut imermullu akigititat 1. januar 2026-imiit atuutilersussamik 7 pct.-imik qaffannissaat.

Tamatuma saniatigut Naalakkersuisut aamma akueraat innaallagissap erngullu akii 7 pct.-imik qaffaqqissasut 1. januar 2027-miit kiisalu 1. januar 2028-miit.

Akigititanik qaffaanermut pissutaapput ingerlatsinermik isumannaallisaanissaq, iluarsartuussinissaq kiisalu attaveqaatinik pingaarutilinnik aserfallatsaaliuinissaq. Imaappoq akigititanik qaffaanissamut pissutissaqavippoq.

Nukissiorfiit aningaasaqarniarnerat ukiuni arlaqartuni oqimaaqatigiissumik ingerlasimanngilaq, innaallagiaq imerlu atuisunut pilersuutaasoq tunisassiarineraniit akikinnerusumik tunniunneqartarsimammat. Tamatuma kinguneranik Nukissiorfiit attassinnaasimanngilaat aningaasaqarnerup imminut ”akilersorneranik” tunngavissaqarniarnissartik, tamatumalu kinguneraa maskinat, illuutit kiisalu innaallagissamik, imermik, kiassarnermillu pilersuinermi aqqutinik aserfallatsaaliuiniarnerup naammaginarunnaarsimanera. Taamaammat aningaasaliissutitigut kinguleruttooruteqarujussuarneq atuuppoq, sulilu ukiumiit ukiumut annertusiartuinnalersimalluni.

Innaallagissamik imermillu pilersuineq aalaakkaasoq tamatta pisariaqartitarput isumannaallisarniarlugu piffissami sivisunerusumi akigititanik qaffaasoqartariaqalerpoq. Taamaaliornikkut Nukissiorfiit aningaasaliiffigisassanut kinguleruttoorutaat iluarsiiffiginiarneqassapput aammalu attaveqaatinik pitsanngorsaanermut aningaasalersuinissaq Nukissiorfinnit qulakkeerniarneqarluni, ukiuni tulliuttuni suliariumannittussarsiuussinissat pilersaarusiorneqassallutik iluarsartuussinermilu suliassanut isumaqatigiissusiortoqassalluni.

2026-mi 1. januaari aallarnerfigalugu 7 pct. - imik akinik qaffaanissap naatsorsuutigineqartup pilersissavaa Nukissiorfiit aningaasaanik kaaviaartitsinerulernissaat 37 mio. kr.- t nalinganut taakkulu atorneqarumaarput aserfallaatsiuinissamut kiisalu sanaartukkat pisoqaavallaalersimasut taarsersornissaannut. Ungasinnerusoq isigalugu tamatuma nuna tamakkerlugu pilersuinerup isumannaatsuunissaa pitsanngorsartussaavaa.

Kalaallit Nunaanni inoqutigiit nalinginnaasut ukiumut innaallagissamik 3.500 kWh-imik atuisartut ukiumullu imermik 150 kubik-imik atuisartut 2026-mi 2025-mut sanilliullugu 700 kr. – nik akiliinerusussaapput. Tamatuma assigaa qaammammut 60 kr. imaluunniit ullormut 2 kr.


Akit ukiuni tulliuttuni atuuttussat

	1. januar 2026-imit akit	1. januar 2027-imit akit	1. januar 2028-akit
Innaallagiaq	2,00 kr. /kWh	2,14 kr /kWh	2,29 kr. /kWh
Imeq	24,30 /m3	26,00 /m3	27,83 /m3

Akinut iluarsiissutissat akiligassiissummi atuisut februuarip qaammataani pissarsiassaanni allaqqassapput, tassani januaarip qaammataani atuisimanermik nalunaarsuisimaneq takuneqarsinnaassammat

Innuttaasut akigititanik qaffaanermi aningaasatigut ilungersunartorsiortut najukkaminni kommunimut saaffiginnissinnaapput innuttaasullu kommunit aggulussimanerisa avataanni najugaqartut Isumaginninnermut, Suliffeqarnermut Nunamullu Namminermut Naalakkersuisoqarfimmut saaffiginnissallutik. Kommunimi najugaqarfigisanni attavissat pillugit paasissutissat kinguliini nassaarisinnaavatit.

Paasissutissanik sukumiinerusunik pisariaqartitsiguit naalakkersuisumut allatsi Jeanette L. Petersen attavigisinnaavat, jalp@nanoq.gl -mut allaffigalugu, sianerfigaluguluunniit.: 34 52 06-imut.

Attavissat pillugit paasissutissat
Kommuneqarfik Sermersooq
Kuussuaq 2
3900 Nuuk
Kalaallit Nunaat
+299 36 70 00
kommuneqarfik@sermersooq.gl

Kommune Kujalleq
Postboks 514
3920 Qaqortoq
+299 70 41 00
kommune@kujalleq.gl

Kommune Qeqertalik
Niels Egedes Plads 1
3950 Aasiaat
+299 70 19 00
qeqertalik@qeqertalik.gl

Qeqqata Kommunia Maniitsoq
Kuuttartoq B1077
Postboks 100
+299 70 21 00
qeqqata@qeqqata.gl

Avannaata Kommunia
Noah Mølgårdip Aqq. 9
Postboks 1023
3952 Ilulissat
+299 70 18 00
avannaata@avannaata.gl

Qeqqata Kommunia Sisimiut
Makkorsip Aqq. 2
Postboks 1014
3911 Sisimiut
+299 70 21 00
qeqqata@qeqqata.gl

Isumaginninnermut, Suliffeqarnermut Nunamullu Namminermut Naalakkersuisoqarfik
Imaneq 1 A
Postbox 970
3900 Nuuk
+299 34 50 00
isn@nanoq.gl


Inoqutigiinni akikinnerusumik atuilernissamut siunnersuutit uani nassaarikkit: Appasinnerusumik akiligassaqarnissamut siunnersuutit - Nukissiorfiit