AtuartigukSavalimmiut 2026-mut aalisarneq pillugu isumaqatigiissuteqarfigineqarpoq
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Pisassanik paarlaaqatigiittarnissaq pillugu Kalaallit Nunaat Savalimmiullu aalisarneq pillugu isumaqatigiissuteqarput. Savalimmiut imartaanni kalaallit aalisarsinnaanissaat paarlattuanillu savalimmiormiut kalaallit imartaanni aalisarsinnaanissaat isumaqatigiissuteqarnikkut tunngavilerneqarpoq.
Saarullernanut tunngatillugu ilisimatuussutsikkut siunnersuutigineqarsimasut 41%-inik ikilineqarmata kalaallit saarullernartassaat 3.500 tonsinik Savalimmiunit ikilisinneqarsimapput. Paarlattuanik savalimmiormiut Tunumi aalisagartassaat assigiinngitsut Kalaallit Nunaanit ilanngarneqarput. Qaleralittassat 50 tonsinik,saarullittassat 150 tonsinik najorpiligartassat 200 tonsinik nataarnartassallu 25 tonsinik ilanngarneqarlutik (pisassat pillugit takussutissiaq tullinnguuttumiittoq takuguk).
Atorfilittatigut isumaqatiginninniarnerit Nuummi ulluni 2.-3. december ingerlanneqarput. Kalaallit aallartitaat Aningaasaqarnermut Akileraartarnermullu Naalakkersuisoqarfimmeersut, Kalaallit Nunaanni Aalisarsinnaanissamut Piniarsinnaanissamullu Akuersissuteqartarnernut Nakkutilliisoqarfimmeersut, Pinngortitaleriffimmeersut aalisarnermillu inuussutissarsiuteqartut aallartitaanit peqataaffigineqartut Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit siuttuuffigineqarput.
Aalisarneq pillugu ilassutitut isumaqatigiissut nutaaq kalaallisuunngortinneqareerniartorlu apn.gl aqqutigalugu saqqummiunneqassaaq.
Pisassat Kalaallit Nunaata Savalimmiullu akornanni 2026-mi isumaqatigiissutigineqarsimasut ukiullu siuliini isumaqatigiissutigineqartarsimasut tullinnguuttumi tonsinngorlugit takuneqarsinnaapput.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl