Naalakkersuisut Greenland Graphite A/S-imut piiaanissamut akuersissummik tunniussipput

Assi: Emil Nørgaard Stach, Justin Case Productions

Piiaaffik Amitsumi ukiunut 30-nut grafit-inut piiaanissamut akuersissut Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup Naaja H. Nathanielsen-ip, Greenland Graphite A/S-imi CEO, Stefan Bernstein, peqatigalugu ulloq 8. december 2025 atsiorpaa.

Akuersissummi Greenland Graphite A/S grafit-inik, ilaatigut mingutsitsinngitsumut allanngoriartortitsinermi batteriiliornermut atorneqartartunik, piiaanissamut periarfissinneqarpoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq:

”Greenland Graphite-mut piiaanissamut akuersissut ukioq manna Naalakkersuisut piiaanissamut akuersissutinik tunniussinerisa pingajussaraat. Tamanna neriulluarnartorujussuarmik rekortiliineruvoq aammalu qinnuteqaatip nassiunneqarneraniit piiaanissamut akuersissummik tunniussinermut suliap ingerlanera taamaallaat ukiumik ataatsimik qaammatinillu pingasunik sivisussuseqarsimanera immikkut maluginiarneqassaaq. Tamanna nunani allarpassuarni pisartunit malunnaatilimmik sivikinneruvoq aammalu aatsitassanut inatsisip iluarsisap siunertat malillugit atorneqarneranut ersarissumik uppernarsaatissaalluni. Siunnerfigineqarsimavoq avatangiisinut malitassat, isumannaallisaaneq aamma inuiaqatigiinni akisussaassuseqarneq annikillisinnagit suliassanik ingerlatsisarnerup eqaannerulersinneqarnissaa. Ullumi piiaanissamut akuersissut Kalaallit Nunaata akisussaassusilimmik aningaasaliinissanut orniginarnerulersinnissaanut siunnerfilimmik politikkikkut suliaqarnerup inerneraa, peqatigisaanillu inuit avatangiisillu eqqarsaatigineqarnissaat pimoorullutigu”

Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisoq, Peter Borg, nalliuttorsiorpalaartumik oqarpoq:

”Atuisinnaanermut akuersissutip tunniunneqarnera sivisuumik sukumiisumillu ingerlasussamik
suliaqarnermi alloriarneq siulliuvoq. Kalaallit Nunaata Kujataani Nanortalimmi
nunaqarfiinilu inuuniarnermi pinngortitaq avatangiiserlu tunngaviupput, taamaattumillu
aatsitassarsiornissamut suliniutinut qaffasissunik piumasaqaateqarpugut, pinngortitamik
mianerinnilluni ingerlatsisoqarnissaa angujumallugu. Avatangiisinut Sunniutaasussanik Nalilersuinermut tusarniaanissami aggersumi innuttaasut apeqquteqarnissamut, ernummatinik avitseqateqarnissamut aammalu sumiiffimmi ilisimasaminnik avitseqateqarnissamut periarfissaavoq pingaarutilik. Taamaattumillu sumiiffimmiittut kaammattorusuppakka tusarniaanermi peqataalluaqqullugit.”

Greenland Graphite A/S-imi CEO, Stefan Bernstein, nalliuttorsiorpalaartumik atsioqatigiinnermi oqarpoq:

”Amitsumi grafit-inut piiaanissamut akuersissummik tunniussinermut ullumi tigusisinnaagama nuannaarutigisorujussuuara. Amitsumi aatsitassarsiorfiup matuneraniit ukiut 100-t qaangiutereersullu, Greenroc-imut Kalaallit Nunaanni grafit-inik tunisassiornerup piviusunngorteqqinnissaanut aqqutitsinni angusaq pingaaruteqarpoq.

Amitsumi aatsitassarsiorfik nuannersumik oqaluttuanngussasoq annertuumik Greenroc-imi kissaatigaarput. Grafit nukissiornermi allanngoriartortitsinermut aatsitassatut pingaaruteqarpoq aammalu Europami grafit-inik qularnaatsumik pissarsisinnaaneq amigaatigineqarpoq. Amitsumi ukiut qulikkaat arlalissuit ingerlatsinissamut grafit-inik saffiugassaqartoq uppernarsivarput.

Peqatigisaanik Amitsumiit piiaaneq Kalaallit Nunaannut, pingaartumillu Kalaallit Nunaata kujataani sanilinut, iluaqutaassasoq, eqqumaffigisorujussuarput, aammalu Kalaallit Nunaata kujataani innuttaasut tusaanissai piffissallu ingerlanerani suleqatiginissai qilanaaraara.

Naalakkersuisut Kalaallit Nunaat aatsitassani aningaasaliiffigissallugu orniginartunngortinnissaanut tapersiinerat nuannerpoq, assersuutigalugu qanittumi inatsimmik allanngortitsillutik, siusinnerusukkut piiaanissamut akuersissummik tunniussinissamut periarfissiisumik.

Nunarsuarmi aatsitassarsiorfissamut politikkikkut akuersissuteqarnissaq ukiuni qulikkaani sivisussuseqarsinnaasoq, Kalaallit Nunaat allaanerulluinnartumik periaaseqarpoq, malugalugu avatangiisinut inuiaqatigiinnilu piumasaqaatit annikillisinnagit, mannalu akuersissut tamatumunnga takussutissaalluarpoq.”

Paasissutissat
Piiaanissamut akuersissummi ingerlatseqatigiiffik sumiiffimmi aatsitassanik peqarfimmut kisermaassisussaatitaalersinneqartarpoq. Piiaanissamut akuersissut ukiunik 30-nik piffissalerneqarajuppoq, sivitsorneqarnissaa periarfissaqartinneqartarluni. Taamaattoq piiaanissamut akuersissut aatsitassarsiorluni ingerlatassat aallartinnissaannut killeqanngitsumik periarfissaqalersitsinngilaq. Akuersissuteqarnerit arlallit inissitsinneqaqqaartussaapput.

Piiaanissamut akuersissut Kalaallit Nunaata kujataani Nanortallip avannaani inissisimavoq. Arlallit sumiiffik ”Amitsumik” taaguuteqartoq ilisarissavaat. Ingerlatseqatigiiffiup sumiiffimmi tassani siusinnerusukkut grafit-isiorfiusimasoq, ukiuni 1914-imiit 1922-mut ingerlanneqarsimasoq, ammaqqissamaarpaa. Akuersissummut maannakkut tunniunneqartumut atatillugu Nunat Aqqinik Aalajangiisartut sumiiffik taaguuserpaat Piiaaffik Amitsoq. Piiaanissamut akuersissummi aatsitassaq grafit pineqartunut ilaatinneqarpoq.

GreenRoc Graphite Ldt-ip suliassaanut suliakkiussanut najoqqutassaq tamanut ammasumik tusarniaassutigineqareerpoq. Suliassamut suliakkiussanut najoqqutassaq aamma tusarniaaneq pillugu nalunaarusiaq tassunga atasoq Naalakkersuisut ulloq 4. december akueraat.

Greenland Graphite A/S-ip alloriarnissaa tulleq tassaavoq VVM-imut nassuiaammut aamma VSB-imut nassuiaammut suliassamut nassuiaatit ulluni 35-ni tamanut ammasumik tusarniaassutigalugit nassiunnissaat.

Tamanna VVM-imut aamma VSB-imut nassuiaatinut inaarutaasunut, inoqarfinni attuumassutilinni tusarniaalluni ataatsimiititsinertaqartunik sapaatit akunnerini 8-ni tamanut ammasumik tusarniaassutigineqartussanut tunngavissaliisussaavoq.

VVM-imut aamma VSB-imut nassuiaatit Naalakkersuisunit akuerineqareerpata, ingerlatseqatigiiffiup aatsitassarsiorfimmut matusinissamullu pilersaarutit suliarissavai. Greenland Graphite A/S aatsitassarsiorfimmut matusinissamullu pilersaarutinik nassiussinissamut 2028-mi decembarip 31-ata tungaanut piffissalerneqarpoq. Aatsitassarsiorfimmi ingerlatassat, allatut akuersissuteqartoqanngippat, kingusinnerpaamik ulloq 31. december 2030 aallartinneqartussaapput.

Piiaanermi ingerlatassat aallartinnginneranni inuiaqatigiinni piujuartussamik sunniuteqartitsinissaq pillugu isumaqatigiissut (amerlanertigut taagorneqartoq Impact Benefit Agreement) isumaqatigiissutigineqassaaq. Isumaqatigiissut ingerlatseqatigiiffiup, Kommune Kujalliup aamma Naalakkersuisut akornanni isumaqatigiissutigineqassaaq.


Attaveqarfissaq
Tusagassiortunit saaffiginnissutit: Jørgen T. Hammeken-Holm, tlf. 346800 imaluunniit asn@nanoq.gl
Saaffiginnissutit allat: Akuersissuteqartarnermut immikkoortortaqarfik, tlf. 346800 imaluunniit mlsa@nanoq.gl