Joint Committeep Permanent Committee-llu Nuummi ukiumoortumik 2025-imi ataatsimiinneranni Kalaallit Nunaat qaaqqusisuussaaq

Kalaallit Nunaat Joint Committee aamma Permanent Committee Nuummi ukiumoortumik ataatsimiinnissaanni decembarip 8-ani 9-anilu qaaqqusisuussaaq.

Joint Committee Kalaalit Nunaata USA-llu akornanni naalakkersuisutigoortumik suleqatigiinnermi aaqqissussamik oqaloqatigiittarfiuvoq. Ukiumoortumik atorfilittatigoortumik ataatsimiinnermi Naalakkersuisut USA-llu naalakkersuisuisa akornanni killiffik, Kalaallit Nunaata USA-llu akornanni susassaqarfiit pingaarutillit arlallit akimorlugit suleqatigiinnerup siuariartortinnissaa eqqartorneqassapput. Ataatsimiinnermi danskit naalakkersuisuisa atorfilittaat aamma ilaatinneqarput

Taamattaaq Kalaallit Nunaat ukiumoortumik Permanent Committeemi ataatsimiinnermut qaaqqusisuuvoq, tassani Naalakkersuisut, danskit naalakkersuisui Amerikamiullu naalakkersuisui sinniisuutitaqarput. Permanent Committee 13. Marts 1991-mi isumaqatigiissut malillugu pilersitaavoq, taannalu USA-p sakkutooqarnikkut Kalaallit Nunaanniinneranut tunngasumik siunersiueqatigiinnerit paasissutissanillu avitseqatigiinnerit oqilisaaviginiarlugit pilersinneqarpoq.

Komitép ataatsimiittarneranut qaaqqusisarnerit Kalaallit Nunaata USA-llu akornanni paarlakaattumik ingerlanneqartarput. Siorna ataatsimiinnerit USA-mi ingerlanneqarput, Kalaallit Nunaallu taamaalilluni peqataasunik Nuummut tikilluaqqusinissaminut qilanaarpoq. 

Nunanut allanut ilisimatusarnermullu Naalakkersuisoq Vivian Motzfeldt ima oqaaseqarpoq:
"Joint Committeemi Permanent Committeemilu Kalaallit Nunaanni ukiumoortumik ataatsimiinnerni qaaqqusisuunerput nuannaarutigaarput. Komitémi ataatsimiinnerit toqqanartumik oqaloqatigiinnerit siuarsarnissaat, USA-millu susassaqarfinnik arlaqartunik suleqateqarnerup ilaatigut inuiaqatigiinnut toqqaannartumik tunngassuteqartuni aamma sakkutooqarnermut tunngasuni.  Ataatsimiinnikkut oqaloqatigiiffiit pioreersut taakku aqqutigalugit illuatungeriinnut tamanut iluaqutaasumik kalaallit Amerikamiullu soqutigisaasa ataqqineqarnerat siuarsarneqarneri qulakkeertarpagut. Suleqatigiinnerni suniluunniit tatigeqatigiinneq ataqqeqatigiinnerlu toqqammaviupput, taamaammallu ukiut qaangiuttut ilungersunartuusimanerat isertuunneqassanngilaq. Taamaammallu killiffissiuinissaq qanorlu qanittumik iligiittut immikkoortuni ataatsimut soqutigisatsinni suleqatigiinnermik ineriartortitsisinnaanitta oqaloqatigiissutiginissaa Naalakkersuisut qilanaaraat.”

Paasissutissat erseqqinnerusut pillugit attavigiuk: Specialkonsulent Sophie Rud, soru@nanoq.gl