AtuartigukKommunit inunnik innarluutilinnik isumaginnittoqarfiineersunik piginnaanngorsaaneq
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Kommunit isumaginnittoqarfiineersut Inatsisartut inuit innarluutillit tapersersorneqarnissaat pillugu inatsisaannut tunngasutigut piginnaanngorsarneqarnerat,
inuit innarluutillit pisariaqartitaat tassa Naalagaaffiit Peqatigiit (FN) tapersersorneqarnissamut pisinnaatitaaffiit pillugit isumaqatigiissutaannik malinninnissamut alloriarneruvoq pingaarutilik.
Kommunit inunnik innarluutilinnik isumaginninnermik sullissinermut tunngasutigut imaannaanngitsorsiortupilussuupput. Kommunit isumaginninnermik suliani Inatsisartut inuit innarluutillit tapersersorneqarnissaat pillugu inatsisaannik taavalu suliassat suliarineqartarnerat pillugu inatsisaannik unioqqutitsisimasutut nakkutilliinermit nalunaarusiani isornartorsiorneqarnikuupput. Inuit innarluutillit kommunerisaminnut ingerlatsivinnullu allanut isumaginninnermi suliani amerlasuuni suleqataasussaatitaasunut saaffiginnitsillutik aporfeqartaqisut, Tiliumit, Nunatsinni Inuit Innarluutillit Kattuffiannit (NIIK) inuillu innarluutillit peqatigiiffiinit erseqqissaatigineqarnikuuvoq.
Kommunit tamatumani suliassaminnik sullissisutigut naammassinnissinnaaqqullugit, eqqortunik tunngavissinneqarlutillu najoqqutassinneqarnissaat pingaartuuvoq.
Aningaasanut inatsimmit aningaasanik kommunit inunnik innarluutilinnik isumaginnittoqarfiineersunik piginnaanngorsaanernut ulluni makkunani ingerlanneqaleruttortunut atugassanik immikkoortitsisoqarnikuuvoq. Piginnaanngorsartut qanimut ilitsersuunneqarnissamik aamma neqeroorfigineqarput.
”Sullissisunut inunnullu innarluutilinnut iluaqutaasussamik kommunit inunnik innarluutilinnik isumaginnittoqarfiineersut sullisseriaasiannik pitsanngorsaaqataassaagut. Taamaammat najuunnikkut nittartakkakkulluunniit attaveqaatitigut malinnaanikkut peqataaffigineqarsinnaasumik kommunit tamarmik immikkut isumaginnittoqarfiineersunik piginnaanngorsaatitsiniarluta aalajangerpugut. Illoqarfinni nunaqarfinnilu isumaginnittoqarfinneersut tamatumani pineqarput. Piginnaanngorsartut qanimut ilitsersuunneqarnissamik aamma neqeroorfigaavut.” Peqqissutsimut inunnullu Innarluutilinnut Naalakkersuisoq Anna Wangenheim taama oqarpoq.
Kommune Qeqertallip Avannaata Kommuniatalu isumaginnittoqarfiineersut novembarimi piginnaanngorsarput. Kommunit sinnerisa isumaginnittoqarfiineersut 2026-p aallartinnerani aamma piginnaanngorsassapput.
”Kingullertigullu pisut eqqartortariaqakkat oqaloqatigiissutigisinnaajumallugit, inunnik innarluutilinnik isumaginnittoqarfinneersut piginnaanngorsarnerannut tapertatut, nittartakkakkut attaveqaatitigut qaammatit tamaasa aamma ataatsimeeqatigisassavagut. Inunnik isumaginnittoqarfinneersuttaaq suliatigut misilittakkat naammassiuminaatsitallu pillugit aamma eqqartueqatiserineqartassapput. Tassa kommunit inunnik innarluutilinnik isumaginnittoqarfiineersut pikkorissaanikkut nittartakkakkullu attaveqaatitigut qaammatit tamaasa ataatsimiinnikkut suliatigut piginnaanngorsassavagut." Peqqissutsimut inunnullu Innarluutilinnut Naalakkersuisoq Anna Wangenheim taama oqarpoq.
Attavissaavoq: Peqqissutsimut inunnullu Innarluutilinnut Naalakkersuisoqarfik. E-mail: pn@nanoq.gl , Oqarasuaat +299 34 50 00