Imaani eqqakkat ingerlaartarnerat ilisimasaqarfiginerulerniarlugu Issittumi Siunnersuisoqatigiit suliniutaannut atatillugu Kalaallit Nunaat imaanut puiaasanik avalatsitsivoq

Issittumi Siunnersuisoqatigiit "Plastic in a bottle"-mut pilersitseqataasut peqatigalu-git puiaasat marluk GPS-itaqartut tallimanngornermi novembarip ulluisa 28-anni aallartinneqarput. Eqqakkat plastikkiusut issittup imartaani ingerlaartarnerannut atatillugu nutaanik ilisimasaqalernissamut - tamatumanilu imaani eqqakkanik ataatsimoorussamik suliamut nukittorsaanissamut Kalaallit Nunaat siullermeerluni suliniummut peqataavoq.    

"Paasisinnaanngisagut illersorsinnaanngilagut".

Oqariartuut taanna Aalisarnermut, Piniarnermut, Nunalerinermut, Imminut Pilersorner-mut Avatangiisinullu Naalakkersuisoq, Peter Borg, puiaasanik avalatsitsinermut, eqqak-kat plastikkiusut ingerlaarnerannut uatsinnut ilisimasaqarnerulersitsisussaasumut oqalogiaatimini oqariartuutigaa. Puiaasat Royal Greenlandip kilisaataannit Avatamit aamma Kaassas-summit avalatsinneqassapput - inuiaqatigiit kalaallit: najukkami atuartut, ilinniartut, ilisimasassarsiortut, oqartussat, NGO-t aamma inuussutissarsiortut suleqatigalugit.   

”Immamit inuussuteqarpugut. Immap nerisassaqartittarpaatigut. Aalisarnermi avammut tunisat 98%-it aalisakkanit qalerualinniillu pisuupput. Immap atassu-seqartippaatigut kinaassutsitsinnullu ilusilersuilluni. Taamaattorli imartaq eqqakkanik plastikkiusunik aarlerinartorsiortinneqarpoq, uagut pilersitatsinnit.  Eqqakkat plastikkit ungasissumiit sineriatsinnut pisarput, kisiannili uagut nam-mineq imartatta mingoqannginnissaanik akisussaaffeqarpugut. Aarlerinartup paasinissaa akisussaaffigaarput, paasisaqarfiginngisagummi illersorsinnaan-ngilagut. Puiaasat taakkua, aallartitagut, eqqakkat sumunnartarnerannik sumullu katersuuttarnerannik ilisimasaqarnerulersissavaatigut. Ilisimasarilikkagut, politikkikkut sakkortunerusumik isumaqatiginninniarnikkut, nunami namminermi kiisalu nunat tamalaat akornanni atussavarput. Kisianni ilisimasaq kisimi naammanngilaq. Oqartussat, ilisimasassarsiortut, inuussutis-sarsiortut inuiaqatigiillu ataatsimut akisussaaffeqartariaqarput, kinguaariit tulliuttut immamit peqqissumit uumasoqarfiulluartumiillu inuussuteqarsinnaaniassammata", Aalisarnermut, Piniarnermut, Nunalerinermut, Imminut Piler-sornermut Avatangiisinullu Naalakkersuisoq Peter Borg oqarpoq.    

Suliniutip "Plastic in a bottle"-ip ilisimasassarsiortut, oqartussallu puiaasat Issittumi malinnaaviginissaannut - piffissami toqqaannartumi - periarfissaqalerput.  GPS-i ullut tamaasa kalerrisaarisarpoq, immap sarfarnerani plastikkit eqqakkallu allat immamiittut sumiiffimmi annertuumi aamma sumut pisarnersut takusinnaanissaannut periarfissaqa-lerpoq.

Suliniut PAME-ip suliaanut Issittumi Siunersuisoqatigiit ataani ilaavoq - Issittumi Siunnersuisoqatigiit ataanni suleqatigiissitani pingasuusuni Pinngortitamut Avatangiisinullu Naalakkersuisoqarfiup peqataaffigaasaani suliniut una ataatsimut tungassuteqarpoq. Kalaallit Nunaanni imaanut avalatsitsinermi Danmarkimi Avatangiisinut Aqutsisoqarfimmit, Aarhus Universitetimit, Namminersorlutik Oqartussanit aamma Ocean North Kalaallit Nunaannit suliarineqarpoq - Royal Greenlandimit aningaasatigut tapiissuteqarfigineqarpoq aamma piareersarnermi aqunneqarluni.

Puiaasat ingerlaarnerat ugguuna malinnaaffigiuk: https://pame.is/ourwork/arctic-marine-litter/plastic-in-a-bottle/

Aalisarnermut, Piniarnermut, Nunalerinermut, Imminut Pilersornermut Avatangii-sinullu Naalakkersuisup aaqqissuussamut oqalugiaataa uani atuarneqarsinnaavoq

Attavissaq
Paasisaqarnerorusukkuit Pinngortitamut Avatangiisinullu Naalakkersuisoqarfik pan@nanoq.gl-imut attavigiuk