AtuartigukEU Greenland Resources-imut toqqaannartumik tapersiivoq
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Periusissiaq nutaaq, Europami aatsitassanik pingaarutilinnik pissarsinissamik qulakkeerisussaq, Europakommissionip ulloq 3. december akueraa. Periusissiaq taaguuteqarpoq REEsourcesEU, nunani EU-mut ilaasortaasuni aammalu nunani suleqatigisartakkani, ilanngullugu Kalaallit Nunaat, aatsitassarsiorfissanut aningaasalersuinikkut tapersiinissamut EU-mut periarfissiivoq.
Periusissiap nutaap taassuma toqqaannartumik sunniutigisaanik EU aalajangerpoq Tunumi Malmbjergimi suliniummi, Greenland Resources A/S-imit suliaqarfigineqartumi, nammineq aningaasaatinik aallarniutissatut akiliuteqarniarluni.
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen tassunga atatillugu oqarpoq:
”EU-mi pisuussutinut periusissiaq nutaaq eqqortup tungaanut alloriarneruvoq annertoorujussuaq. Siusinnerusukkut EU aatsitassarsiorfissanut toqqaannartumik tapersiisinnaasimanngilaq, tamannalu aatsitassanik pissarsisinnaanerup siulliuniarfiginerani ingerlasumi aporfiusarsimavoq. Kalaallit Nunaata tungaaniit periarfissaq EU-kommissionip maannakkut akuerisaa taperserlugu akueraarput. Niuernikkut aningaasassarsiniartarneq tatisimaneqarpoq, aammalu aatsitassarsiorluni suliassarpassuit aallartinnissaminnut pisortanit tapersiivigineqarnissamik imaluunniit tapersersorneqarnissamik pisariaqartitsipput. Taamaattumik maannakkut toqqaannartumik aningaasaliisoqarsinnaalernera, aammalu Kalaallit Nunaanni suliassap tigusisussat akornanniinnerat, nutaarsiassaavoq tusarluarnartorujussuaq. Aatsitassarsiornermik suliaqarnerput ataatsimut isigalugu, kisianni aamma Greenland Resources suliassaanut immikkut, tamanna tatiginninnermut takussutissaavoq”.
Pissusiviusut
Greenland Resources A/S Piiaffik Høstakken-imi (”Malmbjerget”) molybdæn-inik magnesium-inillu piiaanissamut ukiunut 30-nut akuersissummik ulloq 19. juni 2025 tunineqarpoq.
Ingerlatseqatigiiffiup VVM-imut aamma VSB-imut nassuiaatai suli akuersissuteqarfigineqanngillat kiisalu Naalakkersuisut, Kommuneqarfik Sermeersuup ingerlatseqatigiiffiullu akornanni IBA/suleqatigiit pingasut isumaqatigiissutaata akuerineqarnissaa kiisalu Aatsitassarsiorfimmut matusinissamullu pilersaarutip akuerineqarnissaa amigaataallutik.
Maannakkorpiaq VVM aamma VSB pillugit 2026-mi tamanut ammasumik tusarniaalluni ataatsimiititsinissat naatsorsuutigineqarput.
Paasissutissanik annertunerusunik piniarnissamut attaveqarnissamulluunniit
Paasissutissanik annertunerusunik piniarnermi attaveqarfigineqassaaq Naalakkersuisup allattaa Jeanette L. Petersen, jalp@nanoq.gl imaluunniit oqarasuaammut angallattakkamut 265476
Suliassamut tunngasunik paasissutissanik annertunerusunik piniarnermi attaveqarfigineqassaaq Naalakkersuisoqarfimmi pisortaaneq Jørgen T. Hammeken-Holm, joeh@nanoq.gl imaluunniit oqarasuaat nr.: +299 346846.