AtuartigukNaalakkersuisut aamma NAKUUSA suleqatigiinnermut isumaqatigiissummik nutarteripput
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
NAKUUSA-mut isumaqatigiissummik piffissamut 2026-2028-mut sivitsuinermut atatillugu illuatungeriit nuna tamakkerlugu meeqqanut inuusuttunullu suliniuteqarnerminnik sakkortunerulersitsipput.
Meeqqanut, Inuusuttunut Ilaqutariinnullu Naalakkersuisoq, NAKUUSA aamma UNICEF pingasunngormat nutaamik ukiunut pingasunoortumik isumaqatigiissusiorput, aalajangiinernut inuunerminnut ilusiliisuusunut meeqqat inuusuttullu sunniuteqarnerulernissaannik qulakkeerisussamik.
Isumaqatigiissut patajaatsumik suleqatigiinnermik, ukiut arlallit ingerlaneranni meeqqat peqataatinneqartarnerannik pisinnaatitaaffiinillu nukittorsaasimasumik, nangitsineruvoq.
Ukiuni kingullerni misilittakkat takutippaat, meeqqat aallussisumik peqataasarnissaq kissaatigigaat. Ukioq manna meeqqat ataatsimeersuarneranni, piffissami matumani qulequttat meeqqanut politikkeqarnermut tunngasut eqqartorniarlugit Nakuusaaqqat politikkikkut aalajangiisartunik ataatsimeeqateqarsimapput. Tamatuma saniatigut Naalagaaffiit Peqatigiit meeqqat pillugit isumaqatigiissutaannut iliuusissatut pilersaarutissamut meeqqat 330-t akissutissamut tapersiisimapput, tamanna piumassuseqarnerannik tusarneqarnissamillu kissaateqarnerannik ersersitsisuuvoq.
”Inuunerminnik ilusiliisuusunik aalajangiisoqaraangat, isummatik ilaatinneqartassasut meeqqat ersarissaatiginikuuaat. Digitalikkut atornerluinernut iliuuseqartoqarnissaa ilaqutariinnilu kiisalu avatangiiserisaminni toqqissisimanerulernissamik kissaateqarnertik, matumani aalakoornartumik eqqaminni atuissoqannginnerunissaa pillugu sapiissuteqarlutik ujartornikuuaat. Oqariartuutaat sakkortupput siunissatsinnilu ataatsimoorussatsinni oqariartuutaannik pingaarutaannik takutitsillutik” Meeqqanut, Inuusuttunut Ilaqutariinnullu Naalakkersuisoq, Mads Pedersen oqaaseqarpoq.
Suliniuteqarnerup ingerlaavartuunissaa qulakkeerniarlugu, UNICEF Danmark aamma Naalakkersuisut ukiumoortumik tamarmik immikkut 1 million kronenik tapiisarniarput, tamanna suliniutit assigiinngitsut ingerlannissaannut nunarpullu tamakkerlugu sammisassat piviusunngortinnissaannut periarfissiivoq.
Atsioqatigiinnermi ilaatigut UNICEF-ip Danmarkimi allattaanera Susanne Dahl, siulersuisut siulittaasuat Anne Louise Eberhard, Kalaallit Nunaanni UNICEF-ip pilersaarusiornermut pisortaa Tina Dam kiisalu Meeqqanut, Inuusuttunut Ilaqutariinnullu Naalakkersuisoq Mads Pedersen peqataapput, matuma nunatta meeqqanut tamanut avatangiisinik toqqissisimasunik pilersitsiniarneranut inerisaaniarneranullu nunat tamalaat tapersersuinerat erseqqissarpaa.
Attavissaq
Sukumiisumik paasisaqarusukkuit naalakkersuisup allattaa Eqaluk Høegh e-mailikkut eqho@nanoq.gl imaluunniit oqarasuaatikkut: +299 34 50 00 attavigiuk.