AtuartigukTusilartunik isumasioqatigiissutissaq suliniutinut nunatsinnilu naligiissitaanermi nukittorsaassaaq
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Peqqissutsimut inunnullu Innarluutilinnut Naalakkersuisoqarfik KTK, nunatsinni tusilartut peqatigiiffiat, suleqatigalugu Nuummi ulloq 29. novembarimiit 2. decembarip tungaanut tusilartunut suliassaqarfimmi piginnaasat suliniutillu pitsanngorsarniarlugit tusilartunik isumasioqatigiissitsissaaq.
Tusilartut innuttaasut tusaasaqarsinnaasut naligalugit suliniutinut pisariaqartitaat kissaataalu aamma tusilartut kommuninut attaveqarnissaannut unamminartut kiisalu Naalagaaffiit Peqatigiit tusilartunut suliassaqarfimmi nunatsinnut innersuussutigineqartut isumasioqatigiinnissami sammineqassapput.
”Nunatsinni tusilartut, kommunini innarluutilinnik sullissisut, Tilioq aamma Pissassarfik isumasioqatigiinnissamut maani ataatsimoortissinnaagatsigit nuannersuuvoq, tassanilu tusilartunut unamminartut nunatsinnilu innuttaasutut naligalugit ilaatinnissai suliniutinut kissaatigisaat qitiutinneqarput.”, Peqqissutsimut inunnullu Innarluutilinnut Naalakkersuisoq, Anna Wangenheim, oqarpoq.
Tusilartut amerlasuut ulluinnarni innuttaasut allat, pisortat il. il. attaveqaqatigiinnikkut unamminartut peqqutaallutik paattooqatigiinneq misigisarpaat. Aatsaat siullerpaamik isumasioqatigiittoqalerpoq, tassani tusilartut suliniutit kissaatigineqartut pisariaqartinneqartullu pillugit atorfillit attuumassutillit oqartussaneersut Tiliumeersullu oqaloqatigineqassapput. Pissassarfiup iluani tusilartut akuttunngitsumik naapeqatigiittarnerannut atatillugu isumasioqatigiinneq tusilartunut ataatsimiititaliaavoq ataatsimoorussaq.
”Inuit innarluutilinnut piviusumik pitsanngorsaanissamik suliniuteqarnissaq Naalakkersuisut inunnut innarluutillit pillugit politikkiannut naapertuuppoq. Nunatsinni tusilartut ulluinnarni inuuneranni misigisartagai pillugit kissaatai siunnersuutaalu pillugit oqaloqatigiinnissaannut qilanaarpunga”, Peqqissutsimut inunnullu Innarluutilinnut Naalakkersuisoq, Anna Wangenheim, oqarpoq.
Erseqqinnerusumik paasisaqarnerorusukkuit naalakkersuisut allattaanut Nivé Lynge Biilmannimut, e-mail: nilb@nanoq.gl-imut Peqqissutsimut, Inunnullu Innarluutilinnut Naalakkersuisoqarfimmut, attaveqarsinnaavut. E-mail: pn@nanoq.gl, oqarasuaat +299 34 50 00.