Nuna tamakkerlugu 2026-mi arfernut angisuunut pisassiissutit

Kalaallit Nunaannut arferit angisuut pisassiissutigineqartut Arfanniarnermut Ataatsimiititaliarsuup (IWC) inassutai naapertorlugit aalajangerneqartarput, ataatsimiitsitaliarsuaq pisassiissutigineqartut amerlassusiinut aalajangiisartuuvoq. Ukiunut arfinilinnut atuuttumik tikaagulliusaanik, arfivinnik, qipoqqarnik Kitaanilu tikaagullinnut kiisalu Tunumi tikaagullinnut pisassiissutit 2026-2031-mut atuupput.

Ilisimatitsissutigineqassaaq pisassiissutit annertussusissavii 31. december 2025-p kingornagut aalajangerneqarumaarmata tamannalu pillugu allannguallatsitsisoqarsinnaavoq. 2026-mut pisassiissutigineqartut imaapput:

Tikaagulliusaat
Kitaanut pisassiissutit tamakkerlugit tikaagulliusaat 19-iupput. Angallatit tikaagulliusaarniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januarip aallaqqaataaniit decemberip 31-iat ilanngullugu tikaagulliusaarniarsinnaapput.

Arfiviit
Kitaanut arfiviit marluk pisassiissutigineqarput. Angallatit, pingaartumik Qeqertarsuup Tunuani angerlarsimaffeqartut arfivinniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut aprilip aallaqqaataaniit decemberip 31-iat ilanngullugu arfivinniarsinnaapput. Piniarnerup isumannaatsumik ingerlanneqarnissaa eqqanaarniarlugu ukiut siuliinitut piumasaqaatinik piumasaqartoqassaaq Namminersorlutik Oqartussat, kommunet aamma piniartut akornanni suleqatigiilluarnissamik piumasaqartumik.

Qipoqqaat
Kitaanut qipoqqartassiissutit tamakkerlutik quliupput. Angallatit qipoqqarniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januarip aallaqqaataaniit decemberip 31-iat ilanngullugu qipoqqarniarsinnaapput.

Tikaagulliit
Kitaa
Kitaani tikaagullittassat tamakkerlutik 164-iupput. Qamutilissortut kiisalu ataatsimoorluni tikaagullinniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januarip aallaqqaataaniit decemberip 31-iat ilanngullugu tikaagullinniarsinnaapput. Piniaqatigiillutik qoorortoorsorlutik tikaagullinniat januarip aallaqqaataaniit decemberip 31-iat ilanngullugu tikaagullinniarsinnaapput.

Tunu
Tunumi tikaagullittassiissutit tamakkerlutik 20-upput. Ataatsimoorluni tikaagullin-niarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januarip aallaqqaataaniit decemberip 31-iat ilanngullugu tikaagullinniarsinnaapput.

Nunatta Kitaanut Tunumullu pisassat nalunaarutigineqassapput:
Nunap immikkoortuinut 2026-mi pisassiissutissat immikkut nalunaarutigineqaru-maarput.

2025-mi pisarineqanngitsoortunik nuussisoqarsinnaanera naapertorlugu 2025-mi pisassiissutit nalimmassarneqarsinnaapput. Taakkua immikkut nalunaarutigineqarumaarput.

Piniarnissani piumasaqaatit (www.nalunaarutit.gl)
Arfernik angisuunik uku tunngavigalugit piniartoqarsinnaavoq:

• Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 9, 6. december 2018-imeersoq.
• Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.
  
  
  

Sukumiinerusumik paasisaqarusukkaanni immikkoortortaqarfimmi pisortaq Amalie A. Jessen saaffigineqarsinnaavoq, e-mail: amalie@nanoq.gl – tlf. + 299 34 53 04