AtuartigukEqqaaniut Rasmus (Rassi) Thygesen
Nassiussisuuvoq: Ilinniartitaanermut, Kulturemut, Timersornermut Ilageeqarnermullu Naalakkersuisoqarfik
Aliatsaatigisatsinnik Rasmus (Rassi) Thygesen 69-inik ukioqarluni toqukkut qimagunnera pillugu nalunaarut tiguarput.
Rassi isiginnaartitsisartuuvoq, illarsaarisartoq, ilitsersuisoq aammalu taalliortoq, ukiut ingerlaneranni isiginnaartitsinermut aammalu filmiliortarnermut sunniuteqarluarsimasoq. Kalaallisut kinaassusitsinnik ersertitsisumik oqaluttuariaatsinut piginnaaneqarpoq, isiginnaartitsinikkullu eqqumiitsuliornermik nutaaliortuusimalluni.
Rassi Tuukkaq Teater-imi isiginnaartitsisartutut ilinniagaqarsimavoq, tassanilu isiginnaartitsisartutut atuuffeqarnini aallartissimallugu, aammalu Tuukkaq Teater-imi eqqumiitsuliortutut kulturikkullu pingaarutilimmik kalaallit ileqquinik nutaaliornermik ersarissumik piumassuseqarluarluni inissisimasuusimalluni.
Rassi sulinermini isiginnaartitsinerpassuarni assigiinngitsuni peqataasimavoq,tv-kkut aallakaatitassiani aammalu Nunatta Isiginnaartitsiviani isiginnaartitsisarsimavoq.
Amerlasuut eqqaamassavaat nissiaraq Titsitut aamma quiasaarisartoq Kaalisaatut, taakku tv-kkut juullimi meeqqanut ammartagaani aammalu aallakaatitassiami Ukioq Naagujoq-mi pingaarutilittut aliikkusersuinermi Nuna tamakkerlugu inissisimapput.
Filmiliani aammalu filmilianik naatsunik suliaqarnermi Traanilamppu (1997) aammalu Godnat – Sinilluarit (1999) ilaatigut Rassi aqutsisutut aammalu isiginnaartitsisutut peqataasimavoq, taakku tamarmik eqqumiitsuliornerup aammalu piviusup ersersinneqarneratigut maluginiarneqarsimapput.
Rassi isiginnaartitsisartoqatigiit Silamiut Nuummi 1984-imi pilersitseqataaffigaa taanna Kalaallit Nunaanni inuussutissarsiutigalugu isiginnaartitsisartut isiginnaartitsisarfigivaat siulleq, kingorna Nunatta Isiginnaartitsisarfianngortoq. Taamaasilluni ukiuni taakkunani peqatigisani ilagalugit nunatsinni isiginnaartitsisarfeqarnermik tunngavileeqataasimalluni.
Rassip qungujunnartunik nuannarisaqarnera, paasisimasaqarluartuunera pimoorussisuuneralu kinguaariinnut annertuumik nuannaarnermik tunniussisimavoq.
Eqqumiitsuliornermut kulturitsinnullu annertuumik tunniussaqarsimanera qujamasulluta eqqaaniarparput.
Naalakkersuisut sinnerlugit ilaqutaasunut qanigisaasunullu qamannga pisumik misiginneqatiginninnerput ingerlatipparput.
Rasmus (Rassi) Thygesen-ip eqqaaneqarnera ataqqinartuuli.
Naalakkersuisut sinnerlugit
Nivi Olsen
Naalakkersuisoq