AtuartigukAalisartut piniartullu tamassi pilluaritsi
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Aalisartut piniartullu tamaasa Naalakkersuisut sinnerlugit pilluaqqorusuppakka.
Aalisartut piniartullu ulluat pingaaruteqarluinnarpoq. Aalisarneq piniarnerlu nunatsinni nunatsinnullu inuussutissarsiutaapput pingaarutillit. Taamaattumik aalisartut piniartullu nunatsinnut tunniuttagaannut Naalakkersuisut nersorinninnissaat pingaaruteqarpoq.
Taamaattumik aalisartut piniartullu ulluat pisortatigoortumik erfalasulerfissatut Inatsisartut aalajangermassuk nuannaarutigeqaara. Ukioq manna aalisartut piniartullu ulluannut atatillugu pisortatigoortumik illorsuit tamarmik erfalasulissapput. Nalliuttorsiutiginissaa naleqqulluinnarpoq.
Nunatsinni aalisarneq inuussutissarsiutit annersaralugulu pingaarnersaraat. Aalisarnerup silarsuaani aalisarnermulluunniit atatillugu suliffissuaqarfinni niuerfinnilu inuit 4.300-nit amerlanerusut suliffeqarput, taakkulu nunarput tamakkerlugu sulisut tamarmiusut 15 procentit missaanniipput. Naalakkersuisoqarfiga 2016-2024-mi umiatsiaararsorluni aalisarnerup ineriartornera pillugu nalunaarummik saqqummersitseqqammerpoq. Tassani takuneqarsinnaavoq piffissami tassani aalisartut 147-nik amerleriarsimasut. Tassuunakkut aalisarneq suli ineriartortoq inuussutissarsiutitullu pilerigineqarluartoq takuneqarsinnaalluarpoq. Aamma arnanit, piffissami tassani aalisarnermi arnat amerleriarsimallutik.
Aalisarneq pillugu inatsit ukioq manna januaarip aallaqqaataani atuutilersoq timitalernissaa suli sulissutigaarput. Timitaliiniarneq inuussutissarsiortut kattuuffiillu qanimut oqaloqatiginerisigut ingerlanneqarpoq. Timitaliiniarnermut periutsinik isumaqatigiittuaannanngilagut pitsaasumilli, ammasumik kinguneqarluartumillu oqaloqatigiittarnerput qujamasuutigilluinnarpara.
Aalisarneq pillugu inatsit naapertorlugu aalisartut inuussutissarsiornikkut patajaatsunik siunissamullu ungasinnerusumut tunngavissaqarnissaat qulakkeerneqassaaq aamma nutaanik nalunaarusiornikkut aaqqissuussinerit paasissutissanillu tamanut saqqummiussisarnikkut tamakkiisumik atuutilerpat inuussutissarsiut una pingaaruteqarluinnartoq siunissamut qulakkeerneqarumaartoq qularinngilara.
Taamatuttaaq Aalisarneq Pillugu Ukiumoortumik Nalunaarusiaq nutaaq Aalisarneq pillugu inatsimmi § 53 naapertorlugu Inatsisartunut agguaanneqartoq 2024-milu aalisarnerup aqutsivigineqarneranut assigiinngisitaartumik ataatsimut takutitsisoq nuannaarutigaara. Tamatuma saniatigut aalisarneq pillugu paasissutissat amerlanerusut www.gfjk.gl aqqutigalugu saqqummersinneqartalernissaat qilanaaraara, taamaalillutik inuiaqatigiit pisuussutinik ataatsimoorussanik atuinermut ataatsimut paasissutissanik pissarsisinnaalissapput. Ammasumik periuseqarneq aalisarneq pillugu inatsimmi tunngaviit pingaarutillit ilagaat.
Piniarneq aallaaniarnerlu inuussutissarsiutaapput tamanit assigiinngitsunik isummerfigineqartartut. 2023-mi 2024-milu piniarneq aallaaniarnerlu pillugit inatsimmik nutartikkamik ullutsinnullu nalimmassakkamik Inatsisartut akuersinerat nuannaarutigaara. Piniarnermut aallaaniarnermullu inatsit nakkutilliinermut pitsaasunik erseqqissunillu inatsisinik maleruaasitsinissamut sakkussaqartitsivoq.
Piniagassat pillugit uumassusulerinikkullu illersorneqarsinnaasumik inatsisitigut naleqquttumik qulakkeerinninissaq siunertarineqarpoq. Inatsisartut inatsisaannik aqutsinermi piniagassanik pisuussutinillu piujuartinnissaq, piniagassattalu kinguaassiorneri taamatullu ukiup qanoq ilinerani pitsaanerpaamik atuinissaq uumassusilerinikkut nalinginnaasumik siunnersuinermi pingaartinneqassapput. Pingaaruteqarluinnarpoq piniartut atuisullu ilisimasaat pissarsiarineqarsinnaasut nalilersuinerni akuutinneqarnissaat, tamanna pisariaqarluinnarpoq.
Taamatuttaaq nunat marluk akornanni, nunap immikkoortuisa nunallu tamalaat akornanni Naalakkersuisut isumaqatigiissuteqarput, aalajangiinerni isiginiarneqartartunik, nunarsuarmi inuiaqatigiinnut ilaagatta, imaani miluumasunik uumasoqatigiinnik nunanik sanilerisatsinnik avitseqateqartarluta.
Piujuartitsisumik atuineq kiisalu pinngortitatsinni pisuussutinik pitsaanerusumik annertunerusumillu atuineq pitsaalluinnartuuvoq kikkullu tamarmik akisussaaqataapput taamaalillutik kinguaassavut kalaaliminernik naleqarteqisatsinnik aamma nuannaaruteqarniassammata.
Pilluaritsi. Nunatsinnut tunniussisarnersi ullumikkut nalliuttorsiutigaarput.
Paasisaqarnerorusukkuit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigiuk apn@nanoq.gl.