AtuartigukAvataasiorluni qaleralittassat neqeroortitsinissamut immikkoortinneqarsimasut pillugit ilisimatitsissut
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Kalaallit Nunaata Kitaani avataasiorluni qaleralinnut ukiumut pisassiissutinik agguaassinissaq pillugu Naalakkersuisut 28. oktober aalajangiipput.
Ukiumut pisassiissutit kisitsisit allattorsimaffiat 1 naapertorlugu agguaanneqassapput,
tassalu ingerlatseqatigiiffinnut Qaleralik A/S-imut aamma Royal Greenland A/S-imut tunniunneqarlutik.
Naalakkersuisut pisassiissutit ilaat 7. februar 2025-mi neqeroorutigaat, matumani Kalaallit Nunaata Kitaani avataasiorluni qalerallit 4.600 tonsit ilanngullugit. Pisassiissutit pisassiissutitut niuerutigineqarsinnaasutut namminerlu pigisatut (PNNP aallaavigalugu aaqqissuussaq atorlugu) ingerlatsisunut nutaanut tunniunneqassasut takorloorneqarput, takuuk Aalisarneq pillugu Inatsisartut Inatsisaanni nr. 29, 23. maj 2024-meersumi § 29, imm. 3 (aalisarneq pillugu inatsit). Qinnuteqarnissamut killigititaq tassaavoq 30. april 2025.
PNNP tunngavigalugu aaqqissuussaq 1. januar 2025 aallarnerfigalugu atuutilerpoq, tamatuma kingorna aalisartut pioreersut 2019-imit 2024-mut pisatik tunngavigalugit pisassiissutit ilaannik tunineqarlutik. Pisassiissutinit tamakkiisunit 66,667 %-it ingerlatsisunut siuliani eqqaaneqartunut agguaanneqarput. 33,333 %-it sinneruttut neqeroorutigineqartussanngorlugit ingerlatsisunut nutaanut immikkoortinneqarput.
Ingerlatsisunut nutaanut pisassiissutit ilaannik tunniussinissamut suli aalajangiisoqarnikuunngimmat pisassiissutit 4.600 tonsiusut agguaanneqanngillat taamaalillutillu aalisarneqarsinnaanatik. Inuiaqatigiit aningaasaqarnerat aallaavigalugu - aamma aalisarneq pillugu inatsimmi § 1 naapertorlugu - Naalakkersuisut naliliipput, ukiumut pisassiissutit, kikkut aalisartuuneri apeqqutaatinnagit, aalisarneqartarnissaat pingaaruteqarluinnartoq kiisalu sinneruttut ukiup attuuttup ingerlanerani aalisarneqassasut.
Ukiumut pisassiissutit agguaannissaannut tunuliaqutaasut
Ukiup naanera sioqqullugu ingerlatsisussat nutaat pisassiissutigineqartunik atuisinnaanissaminnut angumersisinnaanngitsut naliliiffigineqarput. Avataasiorlutik qaleralinniartut pioreersut kisimiillutik 2025-mi pisassiissutinik sinneruttunik piviusumik aalisarnissamik taamaammat periarfissaqarput.
Aalisarneq pillugu inatsimmi § 20, imm. 1, nr. 2 naapertorlugu pisassiissutit ilaat agguaanneqarsimanngitsut taamaammallu akuersissummut attuumassuteqanngitsut Naalakkersuisunit ukiumut pisassiissutitut tunniunneqarsinnaapput. Taamaalilluni qalerallit sinneruttut 2025-mi ukiumut pisassiissutitut tunniunneqarsinnaapput.
Aalisarneq pillugu inatsimmi § 32-mi aalisarnernut aalajangersimasunut pisassiissutit ilaat pigineqarsinnaasut amerlanerpaaffilerneqarsimapput. Ingerlatseqatigiiffinnut namminersortunut raajanut qaleralinnullu ataatsimut pisassiissutinik piginnittuusinnaatitaaneq 20 %-inut killeqartinneqarput, pisortallu ingerlatseqatigiiffiinut 40 %-it killigitinneqarlutik. Tamanna aalisarneq pillugu inatsisip § 32, imm. 1, nr. 5-iani aamma imm. 3, nr. 5-iani takuneqarsinnaavoq.
§ 32, imm. 5-imi aamma takuneqarsinnaavoq, ukiumut pisassiissutit tamarmiusut ingerlatsisut ataasiakkaat ukiumut pisassiissutit amerlassusaasa killingat qaangissanngikkaat. Tassa aalisartoq ukiumut pisassanik ukiumut pisassat killigititaat tikillugu imaluunniit ukiumut pisassiissutit killigititaat sinnerlugit pisassanik – pisilluni imaluunniit pisassiinikkut - tunineqaqqissinnaanngilaq.
Avataasiorlutik qaleralinniartunit sisamaasunit marluk pisassiissutinik pigisanik pigisaqartut killigititaasunik sippuereersimapput. Taamaammat inatsimmi § 32, imm. 5 unioqqutinnagu ukiumut pisassiissutinik taakku tunineqarsinnaanngillat.
Aalajangiineq una 2025-mut ukiumut pisassiissutinik agguaassinermut taamaallaat tunngassuteqarpoq, neqeroortitsinikkullu pisassiissutissat ilaannik tunniussinissaq pillugu suliamut ingerlanneqareersumut sunniuteqarani. Qinnuteqartut tamarmik tamanna pillugu immikkut ilisimatinneqassapput.
Paasisaqarnerorusukkuit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigiuk apn@nanoq.gl